ជា​រៀង​រាល់​ឆ្នាំ​គិត​ចាប់​ពី​ថ្ងៃ ១ រោច​រហូត​ទៅ​ដល់​ថ្ងៃ ១៥ រោច ខែ​ភទ្របទ តាម​ប្រតិទិន​ចន្ទគតិ​ខ្មែរ​នោះ ជា​កាល​វេលា​កំណត់​រដូវ​កាល​បុណ្យ​ភ្ជុំ​បិណ្ឌ​តាម​គន្លង​ព្រះ​ពុទ្ធ​សាសនា​តាំង​ពី​បរម​បុរាណ​នៅ​គ្រប់​ទីវត្ត​អារាម​នានា​ទូទាំង​ប្រទេស។ រយៈ​ពេល ១៥​ថ្ងៃ នេះ​ប្រជាជន​ខ្មែរ​ក្មេង​ចាស់​ប្រុស​ស្រី​តែង​នាំ​នូវ​ចង្ហាន់ និង​ទ័យ​ទាន​ទៅ​ប្រគេន​ព្រះ​សង្ឃ ដើម្បី​ឧទ្ទិស​មគ្គផល​បញ្ជូន​កុសល​ទៅ​ដល់​បុព្វការី​ជន ដូន​តា ឬ​សាច់​ញាតិ​ដែល​បាន​ចែក​ឋាន​ទៅ​លោក​ខាង​មុខ។