The Phnom Penh Post Search

Search form




Logo of Phnom Penh Post newspaper Phnom Penh Post - អ៊ីតាលី​បន្ត​ដាក់​សម្ពាធ​ដល់​ការ​នាំ​ចេញ​អង្ករ​កម្ពុជា

អ៊ីតាលី​បន្ត​ដាក់​សម្ពាធ​ដល់​ការ​នាំ​ចេញ​អង្ករ​កម្ពុជា

អង្ករ​ក្រអូប​កម្ពុជា​ដែល​ត្រូវ​បាន​ដាក់​តាំង​បង្ហាញ​ក្នុង​វេទិកា​អង្ករ​លើក ទី១ ដែល​ត្រូវ​បាន​ប្រារព្ធ​ឡើង​នៅ​ទីរួម ខេត្ត​សៀមរាប កាល​ពី ឆ្នាំ​២០១៣។
អង្ករ​ក្រអូប​កម្ពុជា​ដែល​ត្រូវ​បាន​ដាក់​តាំង​បង្ហាញ​ក្នុង​វេទិកា​អង្ករ​លើក ទី១ ដែល​ត្រូវ​បាន​ប្រារព្ធ​ឡើង​នៅ​ទីរួម ខេត្ត​សៀមរាប កាល​ពី ឆ្នាំ​២០១៣។ ហុង មិនា

អ៊ីតាលី​បន្ត​ដាក់​សម្ពាធ​ដល់​ការ​នាំ​ចេញ​អង្ករ​កម្ពុជា

បើ​គិត​ទៅ​វា​ជា​ច្រើន​លើក​ច្រើន​សា​មក​ហើយ ដែល ប្រទេស​អ៊ីតាលី ជា​ពិសេស​ប្រជា​កសិករ​អ៊ីតាលី បាន​ព្យាយាម និង​ប៉ុនប៉ង​បង្ក​ជា​បញ្ហា​ក្នុង​ការ​បញ្ចុះ​បញ្ចូល​ទៅ​សភា​របស់​សហគមន៍​អឺរ៉ុប​ដើម្បី​លុប​ចោល​នូវ​ការ​អនុវត្ត​គោល​ការណ៍​អ្វីៗ​គ្រប់​យ៉ាង​លើក​លែង​តែ​អាវុធ (Everything But Arms, EBA) ដល់​កម្ពុជា​ជា​ពិសេស​គឺ​ការ​នាំ​អង្ករ​ចូល​ពី​កម្ពុជា​ដែល​ធ្វើ​ឲ្យ​តម្លៃ​អង្ករ​របស់​ប្រជា​កសិករ​អ៊ីតាលី មិន​អាច​ប្រកួត​ប្រជែង​បាន។

ចំពោះ​ការ​ផ្តល់ EBA នេះ​សហគមន៍​អឺរ៉ុប​បាន​ផ្តល់​ទៅ​ដល់​បណ្តា​ប្រទេស​ក្រីក្រ​ឬ​អភិវឌ្ឍន៍​តិច​តួច​ចំនួន​ប្រមាណ​ជាង ៤៦ ដែល​អនុញ្ញាត​ឲ្យ​ប្រទេស​ទាំង​នោះ​ធ្វើ​ការ​នាំ​ទំនិញ​គ្រប់​មុខ​លើក​លែង​តែ​អាវុធ​ទៅ​កាន់​ទីផ្សារ​អឺរ៉ុប​ដោយ​រួច​ពន្ធ​នាំ​ចូល ហើយ​នៅ​ក្នុង​បណ្តា​ប្រទេស​នៅ​តំបន់​អាស៊ី​អាគ្នេយ៍​ទាំង ១០ គឺ​មាន​តែ​បី​ប្រទេស​ប៉ុណ្ណោះ​ដែល​ទទួល​បាន​ការ​អនុគ្រោះ​នេះ គឺ​មាន កម្ពុជា ឡាវ និង មីយ៉ាន់ម៉ា។

បើ​យោង​ទៅ​តាម​របាយ​ការណ៍​របស់​ក្រសួង​កសិកម្ម​បាន​បង្ហាញ​ថា ការ​នាំ​ចេញ​អង្ករ​របស់​កម្ពុជា​ប្រមាណ​ជា ៨០ ភាគរយ​នៃ​ការ​នាំ​ចេញ​សរុប​គឺ​ទៅ​កាន់​ទីផ្សារ​អឺរ៉ុប ដែល​ជា​ទីផ្សារ​ដ៏​ធំ​បំផុត​សម្រាប់​ស្រូប​ទាញ​អង្ករ​ពី​កម្ពុជា បើ​ទោះ​បី​ជា​មាន​ការ​ខិតខំ​ធ្វើ​ពិពិធកម្ម​ការ​នាំ​ចេញ​ទៅ​កាន់​ទីផ្សារ​ផ្សេងៗ​នៅ​អាស៊ី​ក៏​ដោយ ក៏​វា​មិន​ទាន់​អាច​ជំនួស​ទីផ្សារ​អឺរ៉ុប​បាន​ឡើយ។ ការ​នាំ​ចេញ​អង្ករ​កម្ពុជា​ទៅ​កាន់​សហភាព​អឺរ៉ុប​បាន​ឡើង​ដល់ ៣៨០ ០០០ តោន​កាល​ពី​ចុង ឆ្នាំ​២០១៣ ដែល​កើន​ឡើង​ពី ២០០ ០០០ តោន​កាល​ពី​ចុង ឆ្នាំ​២០១២។

របាយ​ការណ៍​ដដែល​បាន​បង្ហាញ​ថា កម្ពុជា បាន​ធ្វើ​ការ​នាំ​ចេញ​ប្រមាណ​ជា​ជាង ១៨ ម៉ឺន​តោន​នៅ​ក្នុង​ឆមាស ទី១ ឆ្នាំ​នេះ ដែល​មាន​កំណើន​ត្រឹម​តែ ១ ភាគ​រយ​ប៉ុណ្ណោះ​បើ​ធៀប​ទៅ​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។

កសិករ​នៅ ស្រុក​ភ្នំ​ព្រឹក ខេត្ត​បាត់ដំបង កំពុង​លើក​ស្រូវ​កិន​កាល​ពី​រដូវ​ចម្រូត​ឆ្នាំ​មុន។
កសិករ​នៅ ស្រុក​ភ្នំ​ព្រឹក ខេត្ត​បាត់ដំបង កំពុង​លើក​ស្រូវ​កិន​កាល​ពី​រដូវ​ចម្រូត​ឆ្នាំ​មុន។ ហេង ជីវ័ន

ភាព​ចម្រូង​ចម្រាស​នេះ​កំពុង​យាយី​ដល់​ការ​នាំ​អង្ករ​ចូល​ពី​កម្ពុជា​គឺ​ចាប់​តាំង​ពី ខែ​កុម្ភៈ មក​ម៉្លេះ​ពី​សំណាក់​ប្រជាជន​អ៊ីតាលី ចោទ​ប្រកាន់​ថា ការ​នាំ​អង្ករ​ចេញ​ពី កម្ពុជា គឺ​មាន​ការ​លាយ​អង្ករ​ពី វៀតណាម ហើយ​ក៏​បាន​ជំរុញ​ឲ្យ​មន្ត្រី​របស់​សហគមន៍​អឺរ៉ុប​មាន​ការ​ស៊ើប​អង្កេត​ពី​រឿង​នេះ​ផង​ដែរ និង​បាន​ជំរុញ​ឲ្យ​ក្រសួង​ពាណិជ្ជកម្ម​កម្ពុជា​បង្កើត​ឲ្យ​មាន​ក្រម​សីលធម៌​មួយ​ក្នុង​វិស័យ​ស្រូវ​អង្ករ​ដោយ​តម្រូវ​ឲ្យ​ក្រុម​ហ៊ុន​នាំ​ចេញ​ទាំង​អស់​ចុះ​ហត្ថលេខា​លើ​សំណើ​នេះ ដោយ​មាន​លោក​ឯកអគ្គ​រដ្ឋទូត​សហគមន៍​អឺរ៉ុប​ប្រចាំ​នៅ ប្រទេស​កម្ពុជា ធ្វើ​ជា​សាក្សី​ជាមួយ​នឹង​លោក​រដ្ឋ​មន្ត្រី​ក្រសួង​ពាណិជ្ជកម្ម​កម្ពុជា​ផង​ដែរ។

ដោយ​ឡែក​កាល​ពី​ដើម​ខែ​នេះ​សហករណ៍​កសិកម្ម​អ៊ីតាលី រួម​ទាំង​តំណាង​ពី​សមាគម​ឧស្សាហកម្ម​អង្ករ​អ៊ីតាលី បាន​តវ៉ា​ប្រឆាំង​នឹង​ការ​ផ្តល់​ឲ្យ​កម្ពុជា​នេះ។

បើ​តាម​គេហទំព័រ​ឧស្សាហកម្ម​អង្ករ Oryza កាល​ពី​សប្ដាហ៍​មុន​រដ្ឋាភិបាល ប្រទេស​អ៊ីតាលី បាន​ដាក់​សំណើ​ជា​ផ្លូវ​ការ​មួយ​ទៅ​សហភាព អឺរ៉ុប​អំពាវនាវ​ឲ្យ​មាន​ការ​ការពារ​សុវត្ថិភាព​ថ្មី​មួយ ហើយ​បើ​អាច​នឹង​អនុម័ត​បញ្ចប់​កិច្ច​ព្រម​ព្រៀង​រួច​ពន្ធ​របស់​កម្ពុជា​ក្នុង​ការ​នាំ​ចូល​អង្ករ​ទៅ​សហភាព​អឺរ៉ុប។

ស្ថិត​ក្រោម​កិច្ច​ព្រម​ព្រៀង​នេះ កម្ពុជា​បង់​ពន្ធ​សូន្យ​លើ​ការ​នាំ​ចេញ​ទាំង​អស់​ដែល​រួម​ទាំង​អង្ករ​ទៅ​កាន់​បណ្ដា​ប្រទេស​សហគមន៍​អឺរ៉ុប ស្ថិត​នៅ​ក្រោម EBA ដែល​ត្រូវ​បាន​ផ្ដល់​ឲ្យ​តែ​ប្រទេស​កំពុង​អភិវឌ្ឍន៍​តិច​តួច​តែ​ប៉ុណ្ណោះ។

អនុ​រដ្ឋ​មន្ដ្រី​អភិវឌ្ឍន៍​សេដ្ឋកិច្ច​របស់ ប្រទេស​អ៊ីតាលី ត្រូវ​បាន​គេ​ដក​ស្រង់​សម្តី​ដែល​លើក​ឡើង​ក្នុង​របាយ​ការណ៍​កាល​ពី​ថ្ងៃ ទី១៧ ខែ​កក្កដា របស់​គេហទំព័រ Oryza ថា៖ «ការ​នាំ​ចូល​ខុស​ធម្មតា​កំពុង​កាត់​បន្ថយ​កូតា​អង្ករ​អឺរ៉ុប ដែល​នាំ​ឲ្យ​តម្លៃ​ផលិត​កើន​ឡើង។ នេះ​កំពុង​ធ្វើ​ឲ្យ​ខូច​ខាត​យ៉ាង​ខ្លាំង​ដល់​កសិករ និង​ម្ចាស់​រោង​ម៉ាស៊ីន​ស្រូវ​របស់​យើង»។

ការ​អះអាង​នេះ​ធ្វើ​ឡើង​មួយ​ខែ​បន្ទាប់​ពី​គេហទំព័រ​អង្ករ​អ៊ីតាលី risoitaliano.eu បាន​បង្ហាញ​ឯកសារ​មួយ​រៀបចំ​ឡើង​ដោយ​រដ្ឋាភិបាល​អ៊ីតាលី ដែល​អះអាង​ថា ការ​ផ្តល់​ឲ្យ​ជា​ពិសេស​ដល់​កម្ពុជា​ដោយ​សហភាព​អឺរ៉ុប​បាន​បង្ក​ឲ្យ​ការ​ដាំ​ដុះ​ស្រូវ​ប្រចាំ​ឆ្នាំ​របស់​កសិករ​នៅ ប្រទេស​អ៊ីតាលី ធ្លាក់​ចុះ ២២ ភាគរយ។

កសិករ​កំពុង​រោយ​ស្រូវ​ដើម្បី​ដាក់​ហាល​ថ្ងៃ​មុន​នឹង​យក​ទៅ​កិន​នៅ​ក្នុង​ស្រុក​មួយ​នា ខេត្ត​បាត់ដំបង កាល​ពី​ឆ្នាំ​មុន។
កសិករ​កំពុង​រោយ​ស្រូវ​ដើម្បី​ដាក់​ហាល​ថ្ងៃ​មុន​នឹង​យក​ទៅ​កិន​នៅ​ក្នុង​ស្រុក​មួយ​នា ខេត្ត​បាត់ដំបង កាល​ពី​ឆ្នាំ​មុន។ ផា លីណា

ឯកសារ​នេះ​ឲ្យ​ដឹង​ថា ជាមួយ​នឹង​អង្ករ​អ៊ីតាលី នៅ​ក្នុង​តម្លៃ​ប្រហែល ៨៧០ ដុល្លារ​អាមេរិក​ក្នុង​មួយ​តោន ធៀប​នឹង​អង្ករ​កម្ពុជា ៥៩០ ដុល្លារ​ក្នុង​មួយ​តោន ក្រុម​ហ៊ុន​អង្ករ​អ៊ីតាលី ត្រូវ​បាន​គេ​បង្ហាញ​ថា មិន​អាច​ប្រកួត​ប្រជែង​បាន​ទេ។ ឯកសារ​នេះ​អំពាវនាវ​ឲ្យ​សហភាព​អឺរ៉ុប​យក​ពន្ធ​លើ​ការ​នាំ​ចូល​អង្ករ​កម្ពុជា ២៣០ ដុល្លារ​ក្នុង​មួយ​តោន​ឲ្យ​ស្មើ​ភាព​គ្នា។

ប្រសិន​បើ​សភា​សហគមន៍​អឺរ៉ុប​ពិត​ជា​អនុម័ត​បញ្ឈប់​ឬ​លុប​ចោល EBA នោះ​មែន​តើ​វា​នឹង​ប៉ះពាល់​យ៉ាង​ណា​ដល់​ការ​នាំ​ចេញ​អង្ករ​របស់​កម្ពុជា? តើ​ការ​ខិតខំ​ប្រឹង​ប្រែង​ទាំង​ខាង​រដ្ឋាភិបាល និង​វិស័យ​ឯកជន​ក្នុង​ការ​ជំរុញ​ការ​អភិវឌ្ឍ​វិស័យ​ស្រូវ​អង្ករ​ដើម្បី​សម្រេច​ឲ្យ​បាន​តាម​ផែនការ​នៃ​ការ​នាំ​ចេញ​ឲ្យ​បាន ១ លាន​តោន​នៅ​ចុង ឆ្នាំ​២០១៥ វា​នឹង​សម្រេច​បាន​ឬ​អត់?

បើ​តាម​លោក ដាវីដ វ៉ាន់ អគ្គ​លេខាធិការ​ស្តីទី​របស់​សហព័ន្ធ​ស្រូវ​អង្ករ​កម្ពុជា (CRF) បាន​ប្រាប់​កម្ពុជា​ចុង​សប្តាហ៍​ថា ទាក់​ទិន​ទៅ​នឹង​បញ្ហា​នេះ​សហព័ន្ធ​បាន​ប្រគល់​ភារកិច្ច​នេះ​ទៅ​ឲ្យ​ក្រសួង​ពាណិជ្ជកម្ម ជា​អ្នក​ដោះ​ស្រាយ។

លោក​បាន​មាន​ប្រសាសន៍​បន្ត​ថា៖ «អ្វី​ដែល​ខ្ញុំ​អាច​និយាយ​បាន​នៅ​ពេល​នេះ​គឺ​ក្រសួង​ពាណិជ្ជកម្ម​មិន​ទាន់​អាច​ចាត់​វិធាន​ការ​អ្វី​បាន​នោះ​ទេ​នៅ​ពេល​នេះ គឺ​ត្រូវ​រង់​ចាំ​មើល​ការ សម្រេច​ចុង​ក្រោយ​របស់​សហគមន៍​អឺរ៉ុប​នៅ ទីក្រុង​ប្រ៊ុចសែល ទៅ​នឹង​ការ​ទាមទារ​របស់ អ៊ីតាលី»។

លោក​ធ្លាប់​បាន​លើក​ឡើង​យ៉ាង​ដូច្នេះ​ថា លទ្ធភាព​ទប់​ទល់​របស់​អង្ករ​កម្ពុជា​កំពុង​ទទួល​បាន​ពី​ឧស្សាហកម្ម​អង្ករ​អ៊ីតាលី ដែល​អាច​អនុវត្ត​តាម​គោល​នយោបាយ​កសិកម្ម​រួម។ កំណែ​ទម្រង់​របស់​គោល​នយោបាយ​នេះ កំពុង​ផ្លាស់​ប្តូរ​រចនា​សម្ព័ន្ធ​គាំទ្រ​របស់​សហភាព​អឺរ៉ុប​ចំពោះ​កសិករ។ ចំពោះ​ករណី​របស់​កសិករ​ដាំ​ដំណាំ​ស្រូវ​របស់ អ៊ីតាលី កំណែ​ទម្រង់​នេះ​មាន​ន័យ​ថា ពួក​គេ​នឹង​ទទួល​បាន​មូលនិធិ​តិច​ជាង​មុន​ក្នុង​មួយ​ហិកតា។ ការណ៍​នេះ​នឹង​ធ្វើ​ឲ្យ​អង្ករ​ល្អ​របស់​កម្ពុជា​មាន​លទ្ធភាព​ប្រកួត​ប្រជែង​កាន់​តែ​ខ្លាំង ដោយ​ធ្វើ​ឲ្យ​ក្រុម​ហ៊ុន​ផលិត​អង្ករ​របស់ អ៊ីតាលី ព្រួយ​បារម្ភ។

លោក​ធ្លាប់​បាន​ថ្លែង​ថា៖ «ការ​បញ្ចុះ​បញ្ចូល​របស់​ឧស្សាហកម្ម​អង្ករ​អ៊ីតាលី ដើម្បី​រារាំង​មិន​ឲ្យ​អង្ករ​របស់​កម្ពុជា​ចូល​ទៅ​កាន់​ទីផ្សារ​អឺរ៉ុប​នោះ​គឺ​អយុត្តិធម៌​ណាស់ ពាក់ព័ន្ធ​នឹង​ក្រុម​កសិករ​អ៊ីតាលី ដែល​ទទួល​បាន​ឧបត្ថម្ភធន​ច្រើន»។

លោក​បាន​បន្ត​ថា សហភាព​អឺរ៉ុប​បាន​ផ្តល់​ទឹក​ប្រាក់​រាប់​រយ​អឺរ៉ូ​សម្រាប់​ផ្ទៃ​ដី​ដាំ​ដុះ​មួយ​ហិកតា​រៀង​រាល់​ឆ្នាំ​ដល់​កសិករ​ដាំ​ដំណាំ​ស្រូវ អ៊ីតាលី ដើម្បី​បន្ត​ផលិតកម្ម​ស្រូវ និង​ប្រតិបត្តិការ​ដី​ស្រែ។ ចំណែក​ឯ​រដ្ឋាភិបាល​កម្ពុជា​ពុំ​បាន​ផ្តល់​ឧបត្ថម្ភធន​ជា​សាច់​ប្រាក់​ប្រចាំ​ឆ្នាំ​ដល់​កសិករ​ដាំ​ដំណាំ​ស្រូវ​ទេ ហើយ​ក៏​ពុំ​បាន​ផ្តល់​ឧបត្ថម្ភធន​តាម​រយៈ​ប្រព័ន្ធ​ឥណទាន​ដែល​ផ្តល់​ហិរញ្ញប្បទាន​ដល់​ការ​ដាំ​ដុះ​ថ្មី ព្រម​ទាំង​មិន​ផ្តល់​ឧបត្ថម្ភ​ធន​សម្រាប់​ការ​ចំណាយ​លើ​ឧបករណ៍ និង​គ្រឿង​ម៉ាស៊ីន​កសិកម្ម​ផង​ដែរ។

កម្មករ​កំពុង​លើក​អង្ករ​ដាក់​កុងតឺន័រ​នៅ​ក្នុង​ក្រុម​ហ៊ុន ខ្មែរ​ហ៊្វូដ ដើម្បី​នាំ​ចេញ​កាល​ពី​ឆ្នាំ​ទៅ។
កម្មករ​កំពុង​លើក​អង្ករ​ដាក់​កុងតឺន័រ​នៅ​ក្នុង​ក្រុម​ហ៊ុន ខ្មែរ​ហ៊្វូដ ដើម្បី​នាំ​ចេញ​កាល​ពី​ឆ្នាំ​ទៅ។ ហេង ជីវ័ន

គឹម សាវុធ ប្រធាន​ក្រុម​ហ៊ុន ខ្មែរ​ហ្វូដ ដែល​ជា​ក្រុម​នាំ​ចេញ​ដ៏​ធំ​ជាង​គេ​នៅ​កម្ពុជា ជា​ពិសេស​ទីផ្សារ​អឺរ៉ុប​បាន​មាន​ប្រសាសន៍​ថា ការណ៍​នេះ​នឹង​មិន​អាច​ជា​បញ្ហា​ចោទ​សម្រាប់​ការ​នាំ​ចេញ​របស់​កម្ពុជា​ទៅ​កាន់​ទីផ្សារ​អឺរ៉ុប​នោះ​ឡើយ។ ដោយ​លោក​បាន​លើក​ឡើង​ថា៖ «ខ្ញុំ​បាន​តាម​ដាន​យ៉ាង​យក​ចិត្ត​ទុក​ដាក់​ចំពោះ​បញ្ហា​នេះ ហើយ​ខ្ញុំ​គិត​ថា វា​មិន​មាន​អ្វី​ប៉ះពាល់​ដល់​ទីផ្សារ​អង្ករ​នាំ​ចេញ​របស់​ខ្ញុំ​និង​ក្រុម​ហ៊ុន​ដទៃ​ទៀត​ដែល​ធ្វើ​ការ​នាំ​ចេញ​ទៅ​ទីផ្សារ​អឺរ៉ុប​នោះ​ទេ ព្រោះ​អ្វី​ដែល​ខាង​រោង​មាស៊ីន​កិន​ស្រូវ​អ៊ីតាលី ដែល​គាត់​តវ៉ា​គឺ​វា​មាន​លក្ខណៈ​ជា​មុខ​ជំនួញ ដូច្នេះ​ជំនួញ​វា​មាន​ការ​ប្រកួត​ប្រជែង​គ្នា​វា​គឺជា​រឿង​ធម្មតា នៅ​ពេល​ដែល​ភាគី​មួយ​មាន​ប្រៀប ហើយ​ភាគី​ដែល​ចាញ់​ប្រៀប​គឺជា​រឿង​ធម្មតា ហើយ​នេះ​វា​មិន​មែន​ជា​លក្ខណៈ​នយោបាយ​នោះ​ទេ គឺ​វា​ជា​លក្ខណ​បច្ចេកទេស​សុទ្ធ​សាធ»។

លោក​បាន​បន្ត​ថា៖ «ប្រសិន​បើ​សំណើ​របស់​ក្រុម​អ្នក​ដែល​ចាញ់​ប្រៀប​ស្នើ​ទៅ ហើយ​សភា​អឺរ៉ុប​អនុម័ត​ឲ្យ​នោះ គឺ​វា​ជា​រឿង​មួយ​ហួស​ពី​គោល​នយោបាយ ហើយ​ប្រសិន​បើ​គេ​កាត់ EBA ចេញ​ពី​កម្ពុជា គឺ​វា​មិន​អាច​ទៅ​រួច​នោះ​ទេ ព្រោះ​វា​នៅ​មាន​ប្រទេស​ប្រមាណ​ជា ៤៥ ទៀត​តើ​ត្រូវ​ដោះស្រាយ​ដោយ​របៀប​ណា? ដូច្នេះ​បើ​កាត់​គឺ​កាត់​ទាំង​អស់​គ្នា មិន​មែន​កាត់​តែ​កម្ពុជា​នោះ​ទេ ចុះ មីយ៉ាន់ម៉ា ចុះ ឡាវ និង​ប្រទេស​ឯ​ទៀត?» «ខ្ញុំ​យល់​ឃើញ​ថា បើ​សហគមន៍​អឺរ៉ុប​កាត់​ការ​នាំ​អង្ករ​ចេញ​ពី​កម្ពុជា​ក្នុង​ក្រប​ខ័ណ្ខ EBA គឺ​ពិត​ជា​មិន​អាច​ទៅ​រួច​នោះ​ទេ ហើយ​ខាង អ៊ីតាលី គួរ​ខិតខំ​រិះ​រក​មធ្យោបាយ​យ៉ាង​ណា​ធ្វើ​ឲ្យ​ថ្លៃ​ដើម​នៃ​ការ​ផលិត​អង្ករ​របស់​ខ្លួន​ថោក​ទៅ​វិញ​ជា​ជាង​ការ​ទាម​ទារ​បែប​នេះ។ ពួក​គាត់​គួរ​តែ​គិត​ថា ប្រសិន​បើ​ការ​នាំ​ចូល​ពី​យើង​បាន​ថោក​នោះ​វា​នឹង​ធ្វើ​ឲ្យ​អ្នក​ទទួល​ទាន​នៅ​អឺរ៉ុប​ក៏​មាន​ការ​ចំណាយ​តិច​ផង​ដែរ អ៊ីចឹង​អ្វី​ដែល​ជា​ការ​ទាមទារ​របស់ អ៊ីតាលី គឺជា​រឿង​សេដ្ឋកិច្ច គឺ​វា​មិន​មែន​ជា​រឿង​នយោបាយ​នោះ​ទេ»។

លោក ស្រី ចន្ធី អ្នក​វិភាគ​សេដ្ឋកិច្ច​ឯករាជ្យ​បាន​សម្តែង​នូវ​ក្តី​បារម្ភ​ចំពោះ​ការ​នាំ​ចេញ​របស់​កម្ពុជា​ទៅ​ទីផ្សារ​អឺរ៉ុប​ដែល​ក្នុង​នោះ​រាប់​ទាំង​អង្ករ សម្លៀក​បំពាក់ និង​របស់​របរ​ផ្សេងៗ​ទៀត​ផង​ដែរ។

លោក​ថ្លែង​ថា៖ «ជា​ការ​ពិត ប្រសិន​បើ​សភា​អឺរ៉ុប​ពិចារណា​សម្រេច​លុប​ចោល EBA ពី កម្ពុជា នោះ​គឺ​វា​ពិត​ជា​ច្បាស់​ណាស់​ថា នឹង​ប៉ះពាល់​ដល់​ស្ថានភាព​នាំ​ចេញ​របស់​យើង ជា​ពិសេស​គឺ​អង្ករ និង​សម្លៀក​បំពាក់ ព្រោះ​អី​ទីផ្សារ​អឺរ៉ុប​គឺជា​ទីផ្សារ​ដ៏​ធំ​សម្រាប់​ផលិតផល​ទាំង​អស់​នេះ ហើយ​បើ​យើង​ពិត​ជា​បាត់បង់ EBA មែន​នោះ គឺ​យើង​នឹង​មិន​អាច​ប្រកួត​ប្រជែង​ជាមួយ​បណ្តា​ប្រទេស​ផ្សេងៗ​បាន​នោះ​ទេ ដោយ​សារ​តែ​ការ​ចំណាយ​លើ​ប្រតិបត្តិការ​របស់​យើង​នៅ​មាន​កម្រិត​ខ្ពស់​នៅ​ឡើយ»។

«ប្រសិន​បើ​យើង​បាត់បង់​ផ្សារ​អឺរ៉ុប នោះ​មាន​ន័យ​ថា យើង​នឹង​បាត់បង់​ការងារ​ហើយ​ការណ៍​នេះ ជាក់​ច្បាស់​ណាស់​វា​នឹង​ប៉ះពាល់​ដល់​កំណើន​ផលិត​សរុប​ក្នុង​ស្រុក (ផសស)»។

លោក​បាន​ថ្លែង​ថា បើ​ទោះ​បី​ជា​ប្រទេស​មួយ​ចំនួន​នៅ​អាស៊ី​អាច​ជា​ជម្រើស​របស់​កម្ពុជា​ក៏​ពិត​មែន តែ​វា​ហាក់​មាន​ការ​លំបាក​ក្នុង​ការ​នាំ​ចេញ​ដោយ​សារ​ប្រទេស​ទាំង​នោះ​ក៏​មាន​ផលិតផល​ដូច​គ្នា​នឹង​កម្ពុជា​ដែរ។

លោក​ថា៖ «ខ្ញុំ​ជឿ​ជាក់​ថា សភា​សហគមន៍​អឺរ៉ុប​នឹង​ធ្វើ​ការ​ថ្លឹង​ថ្លែង​អំពី​ចំណូល​របស់​ប្រជា​ពលរដ្ឋ​កម្ពុជា បើ​ទោះ​បី​ជា​វា​មាន​កំណើន​ដល់​ជាង ១៣០ ដុល្លារ​ដែល​នឹង​ក្លាយ​ទៅ​ជា​ប្រទេស​មាន​ចំណូល​ទាប​មធ្យម​តែ​យើង​នៅ​មាន​ប្រជាជន​ជាច្រើន​ទៀត​ដែល​នៅ​ក្នុង​ចំណូល​ទាប​នៃ​ភាព​ក្រីក្រ ដូច្នេះ​បើ​គេ​ក្រឡេក​មើល​ទិដ្ឋភាព​នេះ នោះ​សភា​អឺរ៉ុប​ដែល​មាន​សមាជិក​ជាង ១០០ នាក់​មក​ពី​បណ្តា​ប្រទេស​ផ្សេងៗ​គ្នា​នឹង​មិន​កាត់ EBA ពី​យើង​ឡើយ»៕

អត្ថបទគួរចាប់អារម្មណ៍