សភាស៊ើបសួរសាលាឧទ្ធរណ៍ កាលពីម្សិលមិញ បានបដិសេធបណ្តឹងសុំនៅក្រៅឃុំរបស់លោក មាជ សុវណ្ណរ៉ា ប្រធាននាយកដ្ឋានព័ត៌មាន គណបក្សសង្ក្រោះជាតិ និងលោក អ៊ុក ពេជ្រសំណាង សកម្មជនសិទ្ធិមនុស្សដោយសំអាងថា ការដោះលែងអ្នកទាំងពីរឲ្យនៅក្រៅឃុំអាចបង្កចលាចល ព្រោះសាលាដំបូងបានបិទការស៊ើបសួរ និងបញ្ជូនទៅជំនុំជម្រះហើយ។
សវនាការបណ្តឹងសុំនៅក្រៅឃុំ របស់ជនជាប់ចោទទាំងពីររូប ត្រូវបានធ្វើឡើង ដោយបិទទ្វារ ខណៈ អ្នកគាំទ្រជាច្រើនក៏ដូចជាតំណាងរាស្ត្រគណបក្សសង្គ្រោះជាតិមួយចំនួន បានរង់ចាំស្តាប់លទ្ធផលនៅខាងក្រៅបន្ទប់។
បន្ទាប់ពីប្រកាសលទ្ធផល លោក មាជ សុវណ្ណរ៉ា ដែលរងការចោទពីបទដឹកនាំក្រុមបះបោរ ពាក់ព័ន្ធនឹងការតវ៉ា ដែលដឹកនាំដោយគណបក្សប្រឆាំង កាលពីថ្ងៃ ទី១៥ ខែកក្កដា បានស្រែកទាំងដៃជាប់ខ្នោះថា៖ «រឿងនេះ ជាការគុំរបស់លោក ហ៊ុន សែន កាលពីថ្ងៃ ទី២២ កក្កដា គឺគាត់បានគំរាមចាប់ មាជ សុវណ្ណរ៉ា (ខ្ញុំ) មួយទៀត ដាក់គុក អ៊ីចឹងបើអ្នកផ្សេងមានទោសដូចគ្នា ហេតុអី្វគេចេញអស់ ហើយខ្ញុំនៅជាប់ទោសទៀត... នេះជាគំនុំរបស់លោក ហ៊ុន សែន...តែយុត្តិធម៌នឹងកើតមាន»។
ចំណែកលោក ពេជ្រសំណាង ដែលរងការចោទពីបទចូលរួមធ្វើកុបកម្ម ប្រឆាំងរាជការសាធារណៈ មានស្ថានទម្ងន់ទោសនោះ បានស្រែកថា៖ «ពេជ្រសំណាង ខ្ញុំជាអ្នកស្រឡាញ់យុត្តិធម៌ មិនខ្លាច មិនញញើតនឹងការគំរាមណាមួយទេ...យើងមិនខ្លាចស្លាប់ទេ យើងអត់មានកំហុសទេ»។
លោក ជួង ជូងី មេធាវីការពារក្តី លោក សុវណ្ណរ៉ា បានថ្លែងថា ហេតុផលនៃការសម្រេចនេះ គឺជារឿងអយុត្តិធម៌ ព្រោះមិនមានភ័ស្តុតាងឬសាក្សីណាមួយ ដែលអាចបញ្ជាក់ថា កូនក្តីរបស់លោក បានធ្វើឬដឹកនាំកុបកម្មនោះទេ។
លោក អំ សំអាត ដែលបានឃ្លាំមើលសវនាការនេះ ថ្លែងថា សំអាងហេតុប្រហាក់ប្រហែលគ្នា ដែលចៅក្រមបានលើកឡើងថា ការមិនដោះលែងគឺដើម្បីបង្ការចលាចលក្នុងសង្គមនោះគឺហាក់ផ្ទុយទៅនឹងទិដ្ឋភាពជាក់ស្តែង ដែលជនជាប់ចោទ គឺជាជនរងគ្រោះទៅវិញ។ «មុនការចាប់ខ្លួនគាត់ (ពេជ្រសំណាង) គាត់រងរបួសបែកក្បាល ដោយសារសន្តិសុខវាយ ព្រោះជួយការពារប្រជាពលរដ្ឋ ចំណែកម៉ូតូរ៉ឺម៉ករបស់គាត់ រងការបំផ្លាញទៀត។ ខ្ញុំគិតថា ការចោទប្រកាន់នេះ ជារឿងនយោបាយសុទ្ធសាធ»។
មិនអាចសុំការឆ្លើយតបពីចៅក្រម លោក ឃុន លាងម៉េង បានទេកាលពីម្សិលមិញ៕
