The Phnom Penh Post Search

Search form

Logo of Phnom Penh Post newspaper Phnom Penh Post - Hooters ចាប់​អារម្មណ៍​ទីផ្សារ​កម្ពុជា​

Hooters ចាប់​អារម្មណ៍​ទីផ្សារ​កម្ពុជា​

នារី​រត់តុម្នាក់​របស់​ហាង Hooters មួយ​កន្លែង​នៅ​ក្នុង​ប្រទេស​ចិន​ កំពុង​លើក​អាហារ​ជូនភ្ញៀវ​​ ។​ AFP
នារី​រត់តុម្នាក់​របស់​ហាង Hooters មួយ​កន្លែង​នៅ​ក្នុង​ប្រទេស​ចិន​ កំពុង​លើក​អាហារ​ជូនភ្ញៀវ​​ ។​ AFP

Hooters ចាប់​អារម្មណ៍​ទីផ្សារ​កម្ពុជា​

បន្ទាប់​ពី​ទទួល​បាន​ជោគ​ជ័យ​នៅ​ប្រទេស​ថៃ​ ភោជនីយដ្ឋាន​ដែល​បម្រើ​ដោយ​នារី​ស្លៀក​ពាក់​សិចស៊ី​របស់​សហរដ្ឋ​អាមេរិក Hooters បាន​ឲ្យ​ដឹង​ថា ក្រុមហ៊ុន​គ្រោង​​នឹង​ពង្រីក​វត្តមាន​របស់​ខ្លួន​នៅ​ទូទាំង​តំបន់​អាស៊ី​អាគេ្នយ៍​បន្ថែម​ទៀត​ ដោយ​រួម​មាន​ទាំង​ប្រទេស​កម្ពុជា​ផង​ដែរ។

ភោជនីយដ្ឋាន Hooters ដែល​មាន​មូលដ្ឋាន​នៅ​ទីក្រុង​អាត្លង់តា សហរដ្ឋ​អាមេរិក ហើយ​ភាគ​ច្រើន​ត្រូវ​បាន​គេ​ស្គាល់​​ដោយ​សារ​មាន​នារី​រត់​តុ​ស្លៀក​សម្លៀក​បំពាក់​​ខើច​លើ​ខើច​ក្រោម​នោះ​បាន​ឲ្យ​ដឹង​ថា ក្រុមហ៊ុន​ទទួល​បាន​សិទ្ធិ​ធ្វើ​អាជីវកម្ម Destination Resorts Co. ដែល​មាន​មូលដ្ឋាន​នៅ​ប្រទេស​ថៃ កំពុង​ប្តេជ្ញា​ចិត្ត «ពង្រីក​អាជីវកម្ម​ដ៏​ទូលំ​ទូលាយ» នៅ​ទូទាំង​តំបន់​អាស៊ី។

លោក Gary Murray អគ្គនាយក​ក្រុមហ៊ុន Destination Resorts Co បាន​ថ្លែង​ក្នុង​សេចក្តី​ថ្លែងការណ៍​មួយ​ថា៖ «នៅ​ពេល​ដែល​ទ្វារ​បើក​ចំហ​សម្រាប់​ Hooters យើង​មាន​ជំនឿ​ថា នេះ​គឺ​ឱកាស​ដ៏​ល្អ​ដើម្បី​ពង្រីក​កិច្ច​ប្រឹង​ប្រែង​ក្នុង​ការ​អភិវឌ្ឍ​យីហោ Hooter នៅ​ទូទាំង​តំបន់​អាស៊ី»។

ក្រុមហ៊ុន​ដែល​ទទួល​បានសិទ្ធិ​អាជីវ-​កម្ម​ខាង​លើ​នៅ​ពេល​នេះ​កំពុង​សម្លឹង​មើល​គ្រប់​ប្រទេស​នៅ​តំបន់​អាស៊ាន មាន​ដូច​ជា​កម្ពុជា មីយ៉ាន់ម៉ា និង​ឡាវ រហូត​ដល់​ប្រទេស​ឥណ្ឌូនេស៊ី ​និង​ម៉ាឡេស៊ី ដែល​មាន​ប្រជាជន​ភាគ​ច្រើន​ជា​អ្នក​កាន់​សាសនា​អ៊ិស្លាម​ផង​ដែរ។

ក្រុមហ៊ុន Destination Resorts Co. ដែល​បាន​ប្រតិបត្តិការ​ភោជនីយដ្ឋាន Hooters នៅ​ទីក្រុង Patong ក្នុង​ខេត្ត​ភូកេត កាល​ពី​ជិត​១​ឆ្នាំ​កន្លង​មក​បាន​ឲ្យ​ដឹង​ថា ក្រុមហ៊ុន​នឹង​ពង្រីក​អាជីវកម្ម ដោយ​ចាប់​ផ្តើម​ពី​ក្នុង​ប្រទេសថៃ ​ទៅ​កាន់​ទីក្រុង​​ ហុងកុង និង​ប្រទេស ​ហ្វីលីពីន។

ប៉ុន្តែ​សម្រាប់​យីហោ​របស់​ភោជនីយ​ដ្ឋាន Hooters ភាពជោគ​ជ័យ​នៅ​ក្នុង​ប្រទេស​កម្ពុជា​ ហាក់​ស្ថិត​នៅ​ផ្លូវ​ដ៏​វែង​ឆ្ងាយ​មួយ។

លោក Mike Chenda Im ម្ចាស់​ហាង​​ប៊ឺហ្គើរ​ស្ទីល​អាមេរិក Mike's Burger House ក្នុង​ទីក្រុង​ភ្នំពេញ បាន​ថ្លែង​ថា វប្បធម៌​អភិរក្ស​របស់​កម្ពុជា​អាច​ជា​ឧបសគ្គ​មួយ។

លោក​មាន​ប្រសាសន៍​​​ថា៖ «កាល​ពី​លើក​មុន ខ្ញុំ​បានឮ​ថា ភរិយា​របស់​លោក​នាយករដ្ឋ​មន្ត្រី​កម្ពុជា​បាន​ប្រតិកម្ម​ទៅ​នឹង​ការ​ស្លៀក​ពាក់ខ្លី ខណៈ​នៅ​ភោជនីយ​ដ្ឋាន Hooters ពួកគេ​ស្លៀក​ពាក់ខ្លី​មែន​ទែន»។

លោក​បាន​បន្ត​ថា៖ «បុរសៗ​នឹង​ចូល​ចិត្ត ប៉ុន្តែ​ខ្ញុំ​គិត​ថា នៅ​ក្នុង​ប្រទេស​ថៃ​ មានភាព​បើក​ចំហ​ជាង»។

អ្នក​នាំ​ពាក្យ​របស់​ក្រសួង​ពាណិជ្ជកម្ម​លោក កែន រដ្ឋា មិន​បានឆ្លើយ​តប​​នឹង​សំណើសុំ​ធ្វើ​អត្ថាធិប្បាយ​នោះ​ទេ៕

អត្ថបទគួរចាប់អារម្មណ៍