.jpg)
សកម្មភាពការប្រណាំងកង់បែបទេសចរណ៍ ដែល NOCC និងសហព័ន្ធខ្មែរកីឡាទោចក្រយាន បានរៀបចំកន្លងមក។ សហការី
ភ្នំពេញៈ គណៈកម្មការកីឡា និងទេសចរណ៍ និងស្ថាប័នយ៉ាងតិចចំនួន ៤ ទៀត បានប្រជុំគ្នាផ្តាច់ព្រ័ត្រ ដើម្បីរៀបចំគម្រោងព្រឹត្តិការណ៍ប្រណាំងកង់កម្រិតពិភពលោក ដែលនឹងត្រូវបានកំណត់ឆ្លងកាត់ខេត្តចំនួន ៤ មានខេត្តកោះកុង ព្រះសីហនុ កំពត និងខេត្តកែប រយៈពេលចំនួន ៣ ថ្ងៃ នាដើមខែ មករា ឆ្នាំ ២០២០។
ព្រឹត្តិការណ៍កីឡា និងទេសចរណ៍ដ៏ធំមួយនេះ ត្រូវបានគណៈកម្មការរៀបចំបានអះអាងថា ជាលើកទី១ ផ្តើមចេញពីព្រះរាជាណាចក្រកម្ពុជា ក្នុងគោលបំណងឆ្ពោះទៅរកភាពទាក់ទាញផ្នែកកីឡា និងទេសចរណ៍ និងទាញការចាប់អារម្មណ៍ទៅរកការប្រកួតកីឡាស៊ីហ្គេម លើកទី៣២ ដែលកម្ពុជាធ្វើម្ចាស់ផ្ទះនៅឆ្នាំ ២០២៣។
លោក វ៉ាត់ ចំរើន អគ្គលេខាធិការ NOCC និងជារដ្ឋលេខាធិការក្រសួងទេសចរណ៍បានប្រាប់ថា៖ «ព្រឹត្តិការណ៍ប្រណាំងកង់កម្រិតពិភពលោកនេះ ជាការប្រកួតផ្លូវវែងបំផុត មិនធ្លាប់មាននៅកម្ពុជា ហើយយើងបានសម្រេចជ្រើសរើសយកខេត្តចំនួន ៤ ជាប់តំបន់ឆ្នេរសមុទ្ររបស់កម្ពុជា គឺខេត្តកោះកុង កំពត កែប និងព្រះសីហនុ ដោយចំណាយរយៈពេលប្រណាំងចំនួន ៣ ថ្ងៃ គឺចាប់ពីថ្ងៃទី ៤ ដល់ថ្ងៃទី ៦ ខែ មករា ឆ្នាំ ២០២០។
លោក វ៉ាត់ ចំរើន ដែលជាប្រធានគណៈកម្មការកីឡា និងទេសចរណ៍ ផងនោះបានបន្ថែមថា ព្រឹត្តិការណ៍កីឡានេះ រៀបចំឡើងដោយ NOCC ក្រសួងទេសចរណ៍ សហព័ន្ធខ្មែរកីឡាទោចក្រយាន សហព័ន្ធកីឡាប្រណាំងកង់អន្តរជាតិ និងក្លិបឆ្នេរសមុទ្រស្អាតជាងគេ ក្នុងគោលបំណងធំចំនួន ២ គឺទាក់ទាញភ្ញៀវទេសចរ និងបង្កើតព្រឹត្តិការណ៍កីឡាឲ្យបានច្រើនកម្រិតពិភពលោក ក្នុងដំណើរឆ្ពោះទៅស៊ីហ្គេម ឆ្នាំ ២០២៣ ហើយ ១ ទៀត គឺយល់ដឹងពីបរិស្ថានល្អស្អាត បង្ហាញពីស្ថានភាពសន្តិសុខ សន្តិភាព សេដ្ឋកិច្ច វប្បធម៌ និងទេសចរណ៍ របស់ព្រះរាជាណាចក្រកម្ពុជាទៅកាន់ពិភពលោក តាមរយៈព្រឹត្តិការណ៍នេះ។
លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយានបានប្រាប់ថា ការប្រកួតនេះ បានត្រៀមរួចជាស្រេច ដោយការប្រណាំងឆ្លងកាត់ខេត្តជាប់មាត់សមុទ្រមានឆ្នេរស្អាតបំផុតចំនួន ៤ ក្នុងចម្ងាយផ្លូវសរុបជាង ៥០០ គីឡូម៉ែត្រ ដោយក្នុងនោះ ការប្រកួតចែកចេញជា ៣ ដំណាក់កាល គឺដំណាក់កាលទី១ ចេញដំណើរពីខេត្តកោះកុង រួចចេញទៅខេត្តកំពត (បូកគោ) ទី២ ចេញដំណើរពីភ្នំបូកគោ ឆ្ពោះទៅខេត្តកែប និងដំណាក់កាលទី៣ ចេញពីខេត្តកែប ទៅបញ្ចប់នៅខេត្តព្រះសីហនុតែម្តង។
លោកបន្ថែមថា៖ «តាមគម្រោងនៃការប្រកួត បានកំណត់ក្រុមចូលរួមសរុប មិនឲ្យលើសពី ២០ ប្រទេស ហើយអត្តពលិកមិនឲ្យលើសពី ២០០ នាក់ ប៉ុន្តែក្នុង ១ ក្រុម ដែលមានគ្នាចំនួន ១០ នាក់នោះ គឺមានអត្តពលិកតែ ៦ នាក់ ក្រៅពីនេះ ជាជាងជុសជុល ឬក្រុមជំនួយការដើម្បីជួយរៀបចំបង្កលក្ខណៈឲ្យកីឡាករ។ នេះជាព្រឹត្តិការណ៍ធំកម្រិតពិភពលោក ដែលផ្តើមចេញពីព្រះរាជាណាចក្រកម្ពុជា ខណៈដែលសហព័ន្ធកីឡាប្រណាំងកង់អន្តរជាតិ សហការជាមួយកម្ពុជាជាម្ចាស់ផ្ទះ និងភាគីពាក់ព័ន្ធជាច្រើនទៀត»៕
