ភ្នំពេញ៖ សហព័ន្ធខ្មែរកីឡាហែលទឹក បានសហការជាមួយ Garden City Water Park រៀបចំវគ្គបណ្តុះបណ្តាលឆ្មាំអាងហែលទឹក (Pool Lifeguard Training Course) ដល់មន្ត្រី និងគ្រូបង្វឹករបស់សហព័ន្ធជាលើកដំបូង ហើយវគ្គខ្លីដែលធ្វើនៅអាងហែលទឹកនៃពហុកីឡដ្ឋានជាតិមរតកតេជោនេះ បានបញ្ចប់កាលពីថ្ងៃអង្គារ។
បើទោះបីជាវគ្គបណ្តុះបណ្តាលឆ្មាំអាងហែលទឹកលើកដំបូងនេះ មានរយៈពេលខ្លី គឺត្រឹម ២ ថ្ងៃ ប៉ុន្តែសិក្ខាកាមទាំង ១៦ នាក់ ដែលទទួលបានការបណ្តុះបណ្តាលពីគ្រូឧទ្ទេសមកពីប្រទេស អេហ្ស៊ីប នេះ ត្រូវបានលោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានចាត់ទុកថា ជាធនធានដ៏មានតម្លៃដែលនឹងអាចជួយបង្កើនសុវត្ថិភាព ដល់អ្នកហែលទឹក និងអ្នកហាត់ហែលទឹក។
លោក ហែម គីរី បាននិយាយថា៖ «តាមរយៈការសិក្សារយៈពេល ២ ថ្ងៃនេះ សិក្ខាកាមរបស់យើងមានការយកចិត្តទុកដាក់ខ្លាំង ហើយមេរៀនដែលគ្រូឧទ្ទេសបានដាក់ឲ្យសុទ្ធតែជាមេរៀនសំខាន់ក្នុងការជួយសង្រ្គោះអ្នកលង់ទឹកទាំងក្នុងទឹក និងលើគោក ពិសេសសម្រាប់នៅក្នុងអាងហែលទឹកតែម្តង ព្រោះគោលបំណងសំខាន់ក្នុងវគ្គនេះ គឺសម្រាប់ជួយសង្គ្រោះអ្នកដែលមានបញ្ហាក្នុងអាងហែលទឹក ខណៈវិធីសាស្រ្តនៃការជួយសង្គ្រោះនោះ មិនត្រឹមតែជួយសង្គ្រោះក្នុងអាងហែលទឹកប៉ុណ្ណោះទេ តែយើងត្រូវជួយសង្គ្រោះបឋមថែមទៀត ដើម្បីធ្វើឲ្យអ្នកលង់ទឹកដឹងខ្លួនឡើងវិញ ឬធ្វើអ្វីបន្តទៀត»។
លោកបានបន្ថែមថា៖ «កន្លងមក ទាំងនៅតាមសណ្ឋាគារ ឬកន្លែងមានអាងហែលទឹក គឺបើទោះបីជាមានអ្នកយាម ឬមានអ្នកធ្វើការងារ នៅតាមអាងហែលទឹកទាំងនោះក៏ពួកគាត់មិនមែនជាឆ្មាំអាងហែលទឹកដ៏ពិតប្រាកដ ដែលបានឆ្លងកាត់វគ្គបណ្តុះបណ្តាលត្រឹមត្រូវនោះដែរ អ៊ីចឹងហើយលើកនេះ សហព័ន្ធ និង Garden City Water Park បានធ្វើការងារជាមួយគ្នា ដើម្បីបណ្តុះបណ្តាល និងបង្កើនសុវត្ថិភាពដល់អ្នកហែលទឹកនៅក្នុងប្រទេស កម្ពុជា យើង»។
តាមអគ្គលេខាធិការរូបនេះ បានប្រាប់ឲ្យដឹងថា សហព័ន្ធខ្មែរកីឡាហែលទឹក និង Garden City Water Park ដែលជាអ្នកផ្តល់គ្រូឧទ្ទេស មានជំនាញពិតប្រាកដមកជួយបណ្តុះបណ្តាលនោះ គ្រោងនឹងបង្កើតធនធានឆ្មាំអាងហែលទឹកឲ្យបានកាន់តែច្រើន តាមរយៈការអញ្ជើញមន្រ្តី ឬអ្នកធ្វើការងារនៅតាមអាងហែលទឹក នៅក្នុងប្រទេស កម្ពុជា យកមកបណ្តុះបណ្តាល ដើម្បីជួយឲ្យពួកគាត់ មានជំនាញឆ្មាំអាងហែលទឹក ច្បាស់លាស់ក្នុងការបំពេញភារកិច្ចប្រកបដោយសុវត្ថិភាព។
លោក ហែម គីរី បាននិយាយថា៖ «ដោយសារតែសិក្ខាកាមរបស់យើងលើកនេះ សុទ្ធតែមានជំនាញហែលទឹកស្រាប់ អ៊ីចឹងគ្រូឧទ្ទេសរបស់យើងមានភាពងាយស្រួលក្នុងការបណ្តុះបណ្តាល និងអនុវត្ត ខណៈការរៀនឆ្មាំអាងហែលទឹកនេះ ក៏មានការប្រកួតគ្នាប្រចាំឆ្នាំផងដែរ ហេតុនេះបន្ទាប់ពីបញ្ចប់វគ្គទី ១ នេះ យើងនឹងរៀបចំឲ្យមានវគ្គជាបន្តបន្ទាប់ទៀត ហើយយើងនឹងស្វែងរកមន្រ្តីមកពីខាងក្រៅ ដូចជានៅតាមសណ្ឋាគារ ឬមន្រ្តីដែលមានអាងហែលទឹកយកមកបណ្តុះបណ្តាល ដើម្បីឲ្យយើងមានឆ្មាំអាងហែលទឹកត្រឹមត្រូវទៅតាមស្តង់ដា»។
លោកបានបញ្ជាក់ថា៖ «បញ្ហាប្រឈមមុខនាពេលកន្លងមក គឺយើងអត់មានឆ្មាំអាងហែលទឹកត្រឹមត្រូវនោះទេ ទាំងនៅតាមសណ្ឋាគារ និងអាងហែលទឹកផ្សេងៗ គឺលើកលែងតែកន្លែងហ្វឹកហាត់របស់កីឡាករ កីឡាការិនីយើង ដែលចេះជំនាញនេះ អ៊ីចឹងហើយយើងចង់បណ្តុះបណ្តាលជំនាញនេះ ទៅដល់មន្រ្តីនៅខាងក្រៅផ្សេងៗទៀត ដើម្បីជាសុវត្ថិភាពមួយដល់ផ្នែកទេសចរណ៍ ឬក៏ការរស់នៅរបស់ប្រជាពលរដ្ឋយើង ដែលគាត់ចង់ហែលទឹក និងហាត់ហែលទឹក»៕