.jpg)
កីឡាករតេក្វាន់ដូរបស់កម្ពុជា ត្រូវបានគូប្រកួតទាត់ចូលមុខ ពេលប្រកួតស៊ីហ្គេម ឆ្នាំ ២០១៧។ ភ្នំពេញ ប៉ុស្តិ៍
ភ្នំពេញ៖ គណៈកម្មាធិការជាតិរៀបចំស៊ីហ្គេមលើកទី៣២ ឆ្នាំ ២០២៣ ហៅកាត់ថា CAMSOC បានសម្រេចដាក់គោលដៅ និងប្ដេជ្ញាចិត្តហើយថា ការប្រកួតស៊ីហ្គេមលើកទី៣១ នៅទីក្រុងហាណូយ ប្រទេសវៀតណាម នាចុងឆ្នាំ ២០២១ នេះ គឺកម្ពុជាត្រូវតែដណ្តើមឱ្យបានលទ្ធផលល្អប្រសើរជាងការប្រកួត ៣ លើកចុងក្រោយ ពោលគឺឱ្យមានចំណាត់ថ្នាក់ ក្រោមលេខ ៨ ក្នុងចំណោម ១១ ប្រទេសក្នុងអាស៊ាននេះ។
ការដាក់ចេញនូវគោលការណ៍នេះ គឺបន្ទាប់ពីគណៈកម្មាធិការគ្រប់ជំនាញបានកិច្ចប្រជុំជាបន្តបន្ទាប់ស្របពេលឆ្នាំ ២០២១ នេះ គឺជាឆ្នាំយុទ្ធសាស្ត្រដែលកម្ពុជាត្រូវតែធ្វើចំណាត់ថ្នាក់របស់ខ្លួនឱ្យបានល្អប្រសើរជាងមុន ព្រោះចំណាត់ថ្នាក់ស៊ីហ្គេម ទាំងនៅសិង្ហបុរី ឆ្នាំ ២០១៥ ស៊ីហ្គេមលើកទី២៩ នៅម៉ាឡេស៊ី ឆ្នាំ ២០១៧ និងស៊ីហ្គេមលើកទី៣០ ឆ្នាំ ២០១៩ នៅហ្វីលីពីន គឺកម្ពុជាឈរទ្រឹងនៅលំដាប់លេខ ៨ ក្នុងចំណោម ១១ ប្រទេស។
លោកបណ្ឌិត ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) និងជាអនុប្រធានអចិន្ត្រៃយ៍ CAMSOC បានថ្លែងថា៖ «ស៊ីហ្គេមលើកទី៣១ ឆ្នាំ ២០២១ នេះ គឺជាការត្រួតពិនិត្យមើលពីសក្ដានុពលនៃក្រុមកីឡាករ-កីឡាការិនីជម្រើសជាតិកម្ពុជា ពិសេសការពិនិត្យមើលលើគ្រប់ប្រភេទកីឡាទាំងអស់ ដោយគប្បីបញ្ជូនទៅហ្វឹកហាត់នៅក្រៅប្រទេសឱ្យបានច្រើនបំផុត»។
លោកបានបន្ថែមថា៖ «ចំណែកស៊ីហ្គេមនៅកម្ពុជា គឺជាស៊ីហ្គេមដែលស្អាតជាងគេ ខណៈដែលចំណាត់ថ្នាក់ យើងត្រូវប្រជែងឱ្យបាននៅចន្លោះលេខ ៥ ឬលេខ ៦ ប៉ុន្តែជាការប្រកួតប្រជែង ដោយមានគុណភាព តម្លាភាព និងយុត្តិធម៌។ ការដណ្ដើមបានមេដាយច្រើនក្នុងស៊ីហ្គេម ពេលកម្ពុជាធ្វើជាម្ចាស់ផ្ទះ គឺយើងត្រូវលុបបំបាត់ចោលនូវវប្បធម៌ដែលថា ប្រទេសជាម្ចាស់ផ្ទះត្រូវតែមានឧត្តមភាពខ្ពស់ក្នុងការឈ្នះមេដាយ ដែលនាំឱ្យបាត់បង់តម្លៃ និងកម្រិតបច្ចេកទេស អ៊ីចឹងយើងកុំឱ្យមានករណីប្រមូលយកមេដាយ ឬវប្បធម៌ចែកមេដាយគ្នាជាលក្ខណៈឃុបឃឹតគ្នាឱ្យសោះ»។
លោក ថោន ខុន បានបញ្ជាក់ថា៖ «ដើម្បីឱ្យមានតម្លាភាព យើងត្រូវដាក់ចេញនូវគោលដៅយុទ្ធសាស្ត្រសំខាន់ចំនួន ៣ ទី១ សហព័ន្ធកីឡាជាតិមួយ ត្រូវបង្កើតយន្តការឱ្យបានច្បាស់លាស់ ដោយផ្តល់ការគាំទ្រដល់ក្រុមនេះ (ក្រុមត្រៀមប្រកួតស៊ីហ្គេម) ឱ្យមានភាពកក់ក្តៅក្នុងការអភិវឌ្ឍជំនាញរបស់ខ្លួន និងលើកទឹកចិត្ត ទី២ អភិវឌ្ឍបច្ចេកទេសដល់ក្រុមពិសេសនេះ ឱ្យមានកម្រិតបច្ចេកទេស (គុណផល) កាន់តែខ្ពស់ជាងមុន ហើយទី៣ ត្រូវស្វែងរកនូវមូលនិធិថវិកាបន្ថែមពីវិស័យឯកជន ដើម្បីទ្រទ្រង់ឧបត្ថម្ភគាំទ្រទៅដល់ក្រុមពិសេសនេះ ដើម្បីសម្រួចគោលដៅបាញ់ឆ្ពោះទៅស៊ីហ្គេម ឆ្នាំ ២០២៣ ឱ្យមានប្រសិទ្ធភាពខ្ពស់»។
ចំណែក លោក វ៉ាត់ ចំរើន ជាអគ្គលេខាធិការ CAMSOC បានឱ្យដឹងថា៖ «សហព័ន្ធកីឡាជាតិនានា ត្រូវមានការប្ដេជ្ញាចិត្តខ្ពស់ក្នុងការប្រជែងយកមេដាយ និងដាក់គោលដៅជាមួយ CAMSOC ខណៈពេលនេះ មានប្រទេសចំនួន ១២ បានប្រកាសទទួលយកអត្តពលិកកម្ពុជាឱ្យទៅហ្វឹកហាត់ត្រៀមស៊ីហ្គេម ឆ្នាំ ២០២៣ ហើយក្នុងនោះមានទាំងប្រទេសនៅទ្វីបអឺរ៉ុប និងទ្វីបអាស៊ី ដូចជាប្រទេសចិន ជប៉ុន និងកូរ៉េ ជាដើម។ ជាមួយគ្នានេះកម្ពុជា ត្រៀមនឹងបញ្ជូនអត្តពលិកទៅហ្វឹកហាត់រយៈពេលវែង នៅតាមបណ្ដាប្រទេសទាំងនោះមិនតិចជាង ១០០ នាក់ទេ»។
លោកបញ្ជាក់ថា៖ «ដើម្បីធ្វើឱ្យប្រាកដថា យើងត្រូវដណ្តើមឱ្យបានទីតាំងចំណាត់ថ្នាក់ ក្រោមលេខ ៨ នោះ គឺថ្នាក់ដឹកនាំសហព័ន្ធកីឡាជាតិនីមួយៗ ត្រូវធ្វើការជិតស្និទ្ធជាមួយក្រសួងអប់ យុវជន និងកីឡា និង CAMSOC ទើបធានាបាននូវលទ្ធផលដូចក្តីរំពឹង»៕
