ភ្នំពេញ៖ គណៈកម្មការជំនាញរបស់គណៈកម្មាធិការជាតិអូឡាំពិកកម្ពុជា (NOCC) រួមជាមួយគណៈកម្មាធិការស៊ីហ្គេម ឆ្នាំ ២០២៣ ហៅកាត់ថា CAMSOC បាននិងកំពុងប្រឹងប្រែងដុតដៃដុតជើង ដើម្បីធ្វើយ៉ាងណាឲ្យកម្ពុជាទទួលបានលទ្ធផលចំណាត់ថ្នាក់ល្អប្រសើរមួយ ក្នុងនាមម្ចាស់ផ្ទះ ដោយបានកំណត់នូវគោលដៅបណ្តោះអាសន្នដណ្តើមយកមេដាយមាសចំនួន ៦៨ ហើយអាចឈរក្នុងចំណាត់ថ្នាក់លេខ ៥ ឬលេខ ៦ ក្នុងចំណោម ១១ ប្រទេសដែលនឹងចូលរួម។
ទោះជាយ៉ាងនេះក្តី លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC និងជាអនុប្រធានអចិន្ត្រៃយ៍ CAMSOC បានហៅផែនការនេះថា៖ គ្រាន់តែជាគោលដៅបណ្តោះអាសន្ន ហើយអ្វីៗ និងបន្តប្រឹងប្រែង និងកំណត់ឲ្យច្បាស់តាមលទ្ធភាព និងសក្តានុពលនៅឆ្នាំ ២០២១ គឺក្រោយស៊ីហ្គេម លើកទី៣១ នៅប្រទេស វៀតណាម សិន។
នៅក្នុងមហាសន្និបាតប្រចាំឆ្នាំរបស់គណៈកម្មាធិការជាតិអូឡាំពិកកម្ពុជា និងទិសដៅផែនការសម្រាប់ឆ្នាំ ២០២០ កាលពីថ្ងៃសៅរ៍ លោក ថោង ខុន មានប្រសាសន៍ថា៖ «តាមផែនការយុទ្ធសាស្ត្ររបស់យើងសម្រាប់ស៊ីហ្គេម លើកទី ៣២ ដែលកម្ពុជាធ្វើជាម្ចាស់ផ្ទះ គឺយើងបានត្រៀមនូវកីឡាចំនួន ៤៥ ប្រភេទ ដែលបែងចែកជាចំណាត់ថា្នក់កម្រិតអាទិភាពទី ១ ចំនួន ១៧ ប្រភេទ ទី២ ចំនួន ១៥ ប្រភេទ និងអាទិភាពទី៣ មាន ១៣ ប្រភេទ ដោយយើងដាក់សន្ទស្សន៍ដណ្តើមមេដាយមាសឲ្យបានខ្ទង់ ៦៨ គ្រឿង ទើបអាចឈរក្នុងលំដាប់ទី ៥ និងទី ៦ ក្នុងចំណោមប្រទេសចំនួន ១១ ដែលបានចូលរួម»។
ចំណែកលោក វ៉ាត់ ចំរើន អគ្គលេខាធិការ NOCC និងជាអគ្គលេខាធិការ CAMSOC ដែលជាអ្នកជំនាញផ្នែករៀបចំព្រឹត្តិការណ៍កីឡា បានថ្លែងថា នៅក្នុងសន្ទស្សន៍នេះ គឺជាផែនការបណ្តោះអាសន្ន ដែលយើងបានដាក់គោលដៅក្នុងអាទិភាពទី១ មានកីឡា ១៧ ប្រភេទ គឺអត្តពលកម្មត្រូវបានមេដាយមាស ៣ ហែលទឹក ៣ តេក្វាន់ដូ (WTF) ៣ ប៉េតង់ ៣ វ៉ូវីណាម ៩ ជីជិតស៊ូ ២ ម៉ូតូទឹក ២ ប្រដាល់គុនខ្មែរ ២ ល្បុក្តតោ ២ អុកចត្រង្គ ១ ចំបាប់ ២ តេក្វាន់ដូ ITF ១៥ សូហ្វតិន្នីស ២ ប្រដាល់សកល ២ សីដក់ ២ និងវាយកូនបាល់មេដាយមាស ១ ហើយបាល់ទាត់ត្រូវចូលដល់វគ្គផ្តាច់ព្រ័ត្រ។
លោកបានបន្តថា ចំណែកប្រភេទកីឡាក្នុងកម្រិតទី២ មាន ១៥ ប្រភេទ ត្រូវបានដាក់សន្ទស្សន៍ដណ្តើមយកមេដាយមាសឲ្យបាន ១ ក្នុងនោះមានវាយសី ប្រណាំងកង់ ទ្រីយ៉ាត្លុង វាយកូនឃ្លីលើតុ ការ៉ាតេដូ គុនដាវ ទូកក្តោង កាយសម្ព័ន្ធ យូដូ កីឡារាំ ជិះសេះ វាយកូនហ្គោល ទូកកានូ និងរ៉ូវីង ខណៈដែលបាល់បោះ និងបាល់ទះ ចង់បានត្រឹមពាក់កណ្តាលផ្តាច់ព្រ័ត្រ ក៏អស់ចិត្តដែរ។ ចំណែកកីឡា ដែលត្រៀមក្នុងកម្រិតទី៣ មាន E-sports លើកទម្ងន់ កីឡាវ៉ូស៊ូ សូរិនហ្ស៊ិកាំប៉ូបញ្ចសិលា បាញ់ធ្នូ បាញ់កាំភ្លើង ប៊ីយ៉ាស្នូឃ័រ ហុកគី បាល់ឱប បេស្បល និងកីឡាឡើងភ្នំ។
លោក វ៉ាត់ ចំរើន បានបញ្ជាក់ពីជំនាញបច្ចេកទេសថា៖ «ដើម្បីអនុវត្តផែនការឲ្យមានប្រសិទ្ធភាពល្អ មានគុណផលល្អ និងមានសក្តានុពល នៅ Asian Games និងស៊ីហ្គេម គឺប្រភេទកីឡាចំាបាច់ និងបរិបទកម្ពុជាបច្ចុប្បន្ន ត្រូវផ្អែកលើគោលការណ៍សំខាន់ ៤ ចំណុច ទី១ ឧបត្ថម្ភគ្រូបង្វឹកជំនាញមកពីក្រៅប្រទេស ទី២ មានទីលានឧបករណ៍សម្ភារបច្ចេកទេសបម្រើការហ្វឹកហាត់ ទី៣ ឧបត្ថម្ភការប្រកួតក្រៅប្រទេសញឹកញាប់ និងទី៤ ឧបត្ថម្ភការហ្វឹកហាត់ក្រៅប្រទេស»៕