The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា ត្រៀម​ប៉ះ​ក្លិប​ថៃ​ដើម្បី​យក​ប្រាក់​ជួយ​គន្ធបុប្ផា

កម្ពុជា ត្រៀម​ប៉ះ​ក្លិប​ថៃ​ដើម្បី​យក​ប្រាក់​ជួយ​គន្ធបុប្ផា

Content image - Phnom Penh Post
​កីឡាករ និង​មន្ត្រី​រៀប​ចំ​ការ​ប្រកួត​ធ្វើ​សន្និ​សីទ​សារ​ព័ត៌​មាន​នៅ​ទីក្រុង​បាងកក​កាល​ពី​ថ្ងៃ​អាទិត្យ​​។ ផាន់​ណា​រ៉ា​

កម្ពុជា ត្រៀម​ប៉ះ​ក្លិប​ថៃ​ដើម្បី​យក​ប្រាក់​ជួយ​គន្ធបុប្ផា

បាងកក: ក្រុម​កីឡាករ​ឆ្នើម​របស់​កម្ពុជា ឬ ​Cambodian All Stars ដែល​ត្រូវបាន​ជ្រើសរើស​ចេញ​ពី​ក្លិប​ក្នុង ក្រប​ខ័ណ្ឌ​មិត្ត​ហ្វូនខេមបូឌាន​លីក​ដោយ​លោកគ្រូ ប្រាក់ សុវណ្ណារ៉ា នោះ​នឹង​ត្រូវ​បើក​ទ្វារ​ពហុកីឡដ្ឋាន​ជាតិ ទទួល​ស្វាគមន៍​ក្រុម​ចំណាត់​ថ្នាក់​លេខ ២ នៃ​លីក​កំពូលរបស់​ថៃ SCG Muangthong United នា​ថ្ងៃ​ទី ១៦ ខែមករា ឆ្នាំ ២០១៦ ខណៈចំណូល​ពីការ​សំបុត្រ​ក្នុង​ការ​ប្រកួត​មិត្ត​ភាព​ជាប្រវត្តិសាស្រ្ដ​នេះ នឹង​ត្រូវ​បរិច្ចាគ​ជូន​មន្ទីរ ពេទ្យ​គន្ធបុប្ផា​ ទាំង​អស់។

ថ្លែង​ក្នុង​សន្និសីទ​កាសែត SCG MUANGTHONG UNITED ASEAN Tour 2016 នៅ​ទីក្រុងបាងកក ​កាល​ពី​ល្ងាច​​ថ្ងៃ​អាទិត្យ លោក​ Ronnarit Seuwaja នាយក​គ្រប់គ្រង​ក្លិប​ SCG Muangthong United បាន​និយាយ​ថា​៖​ «នេះ​គឺជា​លើក​ទីមួយ​ហើយ ដែល​ក្រុមរបស់​យើង​ធ្វើ​ដំណើរ​ទៅ​ប្រកួត​មិត្តភាព​អន្ដរជាតិ​នៅ​ក្នុង​តំបន់ ដើម្បី​ជំរុញ​មិត្តភាព​រវាង​ប្រទេស​ជិត​ខាង និងក្នុង​តំបន់​អាស៊ាន​ផងដែរ ហើយ​ការប្រកួត​នេះ ​នឹង​ផ្ដល់​ឱកាស​ឲ្យ​​ក្រុម​​របស់​យើង​​លេង​ផ្លាស់​ប្តូរ​បទ​ពិសោធ​ជាមួយ​កីឡាករ​ឆ្នើមៗ​របស់​​កម្ពុជា​ និង​វៀតណាម ដើម្បី​ពង្រឹង​សមត្ថភាព​ក្រុម​​បន្ថែម​ទៀត​ ត្រៀម​ខ្លួន​មុន​បើក​​រដូវកាល​ថ្មី និង​ចូល​ប្រកួត​ក្នុង​ក្រប​ខ័ណ្ឌ AFC ផង​ដែរ»។

ចំណែក លោក ឫទ្ធី សំណាង តំណាងក្រុម Cambodian All Stars និង​ជា​ម្ចាស់​ក្លិប​ភ្នំពេញ​ក្រោន ដែល​ទើប​លើកពាន Metfone Cambodian League 2015 នេះ បាន​ថ្លែង​ក្នុងសន្និសីទ​នោះដែរ​ថា​៖​ «ការ​ប្រកួត​នេះ​ពិត​ជា​សំខាន់​ណាស់ ​សម្រាប់​វិស័យ​បាល់ទាត់​កម្ពុជា ដែល​នឹង​ជំរុញ​ឲ្យ​វិស័យ​នេះ​​កាន់​តែ​រីក​ចម្រើន ។ បន្ថែម​លើ​នេះ​ការ​ប្រកួត​ នេះ​ បាន​​បង្កើន​នូវ​​ទំនាក់​ទំនង ផ្លាស់​ប្តូរ​បទ​ពិសោធ​ វប្បធម៌​ ​ជា​ពិសេស​គឺ​សកម្មភាព​សប្បុរសធម៌​មួយ ​ជួយ​ដល់​មន្ទីរពេទ្យ​កុមារ​គន្ធបុប្ផា ហើយ​ខ្ញុំ​សង្ឃឹម​ថា​ សកម្មភាព​ប្រកួត​បែប​នេះ ​នឹង​កើត​មាន​ជា​រៀងរាល់​ឆ្នាំ»។

ក្រុម SCG Muangthong United ក៏​នឹង​ធ្វើ​ដំណើរ​ទៅ​ប្រទេស​វៀតណាម ដើម្បី​ធ្វើ​ការ​ប្រកួត​មិត្ត​ភាព​ជាមួយ​ម្ចាស់​ជើង​ឯក​លីក​កំពូល​វៀតណាម Becamex Binh Doung ផង​ដែរ ​នា​ថ្ងៃ​ទី ២៣ ខែ​មករា ឆ្នាំ ២០១៦ ដែល​ជា​ផ្នែក​មួយ​នៃ SCG MUANGTHONG UNITED ASEAN Tour 2016 ។

លោក Yuttana Jiamtragan អនុ​ប្រធាន​ក្រុម​ហ៊ុន​ SCG ដែល​ជា​អ្នក​ឧបត្ថម្ភ​ធំ​ដល់​ក្លិប SCG Muangthong United បាន​ថ្លែង​ប្រាប់​អ្នក​សារព័ត៌មាន​ថា៖ «SCG ​កំពុង​ពង្រឹង​ការ​ប្តេជ្ញា​ចិត្ត​សម្រាប់​អាជីវកម្ម​ឈាន​​មុខ​នៅ​តំបន់​អាស៊ាន។ ខ្ញុំ​ជឿ​ថា​ ​ព្រឹត្តិការណ៍​នេះ​នឹង​ពង្រឹង​ទំនាក់​ទំនង​ជា​មួយ​ប្រជា​ជន​អាស៊ាន ក៏​ដូច​ជាបង្កើន​អ្នក​គាំទ្រ​ទៅ​កាន់​ក្រៅ​ប្រទេស ហើយ​ការ​ប្រកួត​នេះ ​ក៏​ជា​កាដូ​ស្វាគមន៍​សហគមន៍​សេដ្ឋកិច្ច​អាស៊ាន​ ឬ​ AEC នា​ដើម​ឆ្នាំ​នេះ​ផង​ដែរ។ ហេតុ​នេះ​ខ្ញុំសង្ឃឹម​ថា ​ការប្រកួត​នេះនឹង​មាន​អ្នក​ចូល​រួម​ទស្សនា​ច្រើន ដើម្បីភាព​រីក​ចម្រើន​នៃ​វិស័យ​បាល់​ទាត់​ក្នុង​តំបន់»។

ចំណែក​កីឡាករ ធារី ចន្ថាប៊ីន របស់​ក្លិប​ភ្នំពេញ​ក្រោន បាន​និយាយ​ក្នុង​សន្និសីទ​សារព័ត៌មាន​នៅ​បាង​កក​នោះថា៖​ «ការ​ប្រកួត​នេះ វា​មិន​មែន​ត្រឹម​ជា​ការ​ប្រកួតបាល់ទាត់​ទេ ប៉ុន្តែ​ជា​ការ​សិក្សា​ពី​គ្នា​ទៅ​វិញ​ទៅ​មក និង​ការ​ពង្រឹង​មិត្តភាព។ វា​ជា​បទ​ពិសោធ​ដ៏​ល្អមួយ ហើយ​យើង​សប្បាយ​ចិត្ត ព្រោះ​យើង​អាច​រៀន​បាន​ច្រើន​ទៀត​ពីកី​ឡាករ​របស់​​ក្លិប SCG Muangthong United នេះ»។

ក្នុង​បទ​សម្ភាស​ដាច់​ដោយ​ឡែកមួយ​ជាមួយ​អ្នក​សារព័ត៌មាន​កម្ពុជា ដែល​ត្រូវ​បាន​អញ្ជើញ​ទៅ​ទស្សនា ការប្រកួត​បាល់​ទាត់​របស់ក្រុម SCG Muangthong United នោះ​ខ្សែ​ប្រយុទ្ធ​ឆ្នើម​របស់​ក្លិប SCG គឺកីឡាករ Teerasil Dangda បាន​និយាយ​ថា​៖​ «កម្រិត​បាល់​ទាត់​របស់​កម្ពុជា មាន​ការ​រីក​ចម្រើន​គួរ​ឲ្យ​សម្គាល់ ដូច្នោះ​វា​ជារឿង​រីក​រាយ​មួយ ដែល​យើង​បាន​ទៅ​ជាមួយ​កីឡាករ​ឆ្នើមៗ​របស់​កម្ពុជា»។

ខ្សែ​ប្រយុទ្ធ​ជម្រើស​ជាតិ​ថៃ ​ដែលធ្លាប់​ចុះ​កុង​ត្រា​លេង​​នៅ​ក្លិប​អេស្ប៉ាញ Almeria រូបនេះ​​បា​ប្រាប់​បន្ដ​ឲ្យ​ដឹដង​ទៀត​ថា​៖​ «ក្រុម​យើង​នឹង​ប្រឹងលេង​ឲ្យ​អស់​ពី​​លទ្ធភាព ទោះ​ជា​ការ​ប្រកួត​មិត្តភាព​ក៏​ដោយ»៕

អត្ថបទគួរចាប់អារម្មណ៍