.jpg)
ការប្រកួតប្រដាល់គុនខ្មែរ ដែលរៀបចំដោយវិស័យឯកជន ដើម្បីចូលរួមលើកកម្ពស់ក្បាច់គុនជាតិ។ ភ្នំពេញ ប៉ុសិ៍្ត
ភ្នំពេញ៖ ស្ថាប័នជំនាញផ្នែកកីឡាប្រចាំនៅកម្ពុជា គឺគណៈកម្មាធិការជាតិអូឡាំពិកកម្ពុជា (NOCC) និងក្រសួងទេសចរណ៍គ្រោងនឹងសហការជាមួយភាគីចិន បង្កើតព្រឹត្តិការណ៍កីឡាដ៏ធំជាប្រវត្តិសាស្រ្តមួយរយៈពេល ៣ ថ្ងៃ នៅលើទឹកដីអង្គរ ដើម្បីផ្សព្វផ្សាយព្រលឹងក្បាច់គុនខ្មែរទៅកាន់ពិភពលោក និងទាក់ទាញភ្ញៀវទេសចរនៅតំបន់អង្គរឲ្យកាន់តែមានចំនួនច្រើនថែមទៀត។
លោក វ៉ាត់ ចំរើន អគ្គលេខាធិការ NOCC បានប្រាប់ភ្នំពេញប៉ុស្តិ៍ថា៖ «យើងបានពិភាក្សាជាមួយខាង អ្នកក្បាច់គុនចិន (សៅលិញ) ថា យើងនឹងរៀបចំមហាស្រពយុទ្ធគុនពិភពលោកមួយនៅអង្គរ ហើយនេះជាសញ្ញាណនៃទំនាក់ទំនងមិត្តភាព ព្រមទាំងការរឹតបន្តឹង និងពង្រឹងសាមគ្គីភាព មិត្តភាព រវាងប្រទេសទាំង ២ ក្នុងការបញ្រ្ជាប និងផ្លាស់ប្តូរវប្បធម៌ក្បាច់គុនរវាងប្រជាជន និងប្រជាជន ដើម្បីធ្វើឲ្យកាន់តែមានភាពរលូន»។
«យុទ្ធគុនចក្រភពអង្គរ» អាចជាឈ្មោះសម្រាប់ព្រឹត្តិការណ៍ដ៏ធំមួយនេះ ហើយការទៅទស្សនកិច្ចរបស់អ្នកជំនាញកីឡាកម្ពុជា នៅវត្តសៅលិញ ប្រទេស ចិន និងការនាំយកកីឡាករសៅលិញ ឲ្យមកប្រកួតក្នុងព្រឹត្តិការណ៍ដណ្តើមខ្សែក្រវាត់ពិភពលោក នៅបុណ្យសមុទ្រខេត្តកំពតកាលពីចុងឆ្នាំ ២០១៩ ត្រូវបានលោក វ៉ាត់ ចំរើន ចាត់ទុកថាជាកិច្ចសហប្រតិបត្តិការក្បាច់គុនប្រកបដោយជោគជ័យ ដែលនាំឲ្យភាគីទាំង ២ ឈានដល់ការរៀបចំគម្រោងបង្កើតព្រឹត្តិការណ៍យុទ្ធគុនពិភពលោកនេះឡើង។
លោក វ៉ាត់ ចំរើន បានបន្តថា៖ «កម្ពុជា និងចិន បានផ្លាស់ប្តូរបទពិសោធជាមួយគ្នាច្រើន ហើយគម្រោងបង្កើតយុទ្ធគុនពិភពលោកនេះ យើងបានត្រៀមរៀបចំហើយ ដែលអាចនៅក្នុងឆ្នាំ ២០២០ នេះ ឬឆ្នាំក្រោយនៅអង្គររបស់យើង ព្រោះនៅទីនោះជាតឹកតាងក្នុងការដាក់បង្ហាញឲ្យគេស្គាល់អំពី ក្បាច់គុនដ៏ចំណាស់របស់ខ្មែរ ដែលមានភ័ស្តុតាងស្រាប់នៅតាមជញ្ជាំងប្រាង្គប្រាសាទអង្គរ»។
ជាមួយគ្នានេះ លោក វ៉ាត់ ចំរើន ដែលជារដ្ឋលេខាធិការក្រសួងទេសចរណ៍ផងនោះ បានចាត់ទុកព្រឹត្តិការណ៍យុទ្ធគុនពិភពលោកនោះ ថាជាព្រឹត្តិការណ៍យុទ្ធគុនទេសចរណ៍ផងដែរ ដែលវាមានទំនាក់ទំនងគ្នាមិនអាចកាត់ផ្តាច់បាន ខណៈលោក ថោង ខុន រដ្ឋមន្រ្តីក្រសួងទេសចរណ៍ និងជាប្រធាន NOCC ជាមនុស្សយ៉ាងសំខាន់ក្នុងការផ្សារភ្ជាប់កីឡា និងទេសចរណ៍ ដើម្បីជាប្រយោជន៍រួមរបស់សង្គមជាតិ។
លោក វ៉ាត់ ចំរើន បានបន្ថែមថា៖ «ការរឹតចំណងរវាងក្បាច់គុនកម្ពុជា និងក្បាច់គុនចិន (សៅលិញ) វាជារឿងសំខាន់មួយ ដែលឯកឧត្តម ថោង ខុន បានធ្វើឲ្យមានព្រឹត្តិការណ៍យុទ្ធគុនទេសចរណ៍ ដោយយើងបានទៅសិក្សានៅវត្តសៅលិញ ហើយឃើញថា វត្តសៅលិញមានភ្ញៀវទេសចររាប់លាននាក់ ក្នុង ១ ឆ្នាំៗ បានទៅមើលទីតាំង និងការបង្ហាញក្បាច់គុននៅទីនោះ អ៊ីចឹងយើងរៀនសូត្រតាមគេ ដើម្បីឲ្យអង្គររបស់យើងក្លាយទៅជាកន្លែងមួយ ដែលរក្សានូវមរតកក្បាច់គុន និងផ្សព្វផ្សាយនូវចំណេះដឹង និងប្រវត្តិក្បាច់គុនរបស់បុព្វបុរសខ្មែរ ទៅឲ្យភ្ញៀវជាតិ និងអន្តរជាតិបានដឹង»។
ជាមួយគម្រោងនេះ លោក វ៉ាត់ ចំរើន មានការរំពឹងថា នឹងអាចទាក់ទាញភ្ញៀវ និងអ្នកនិយមក្បាច់គុនរាប់លាននេះ ឲ្យមកកាន់តំបន់អង្គរ។ លោកបានបញ្ជាក់ថា៖ «ទេសចរណ៍ក្បាច់គុន ជាទេសចរណ៍មួយដែលអាចទាក់ទាញអ្នកហាត់ក្បាច់គុនរាប់សិបលាននាក់មកកម្ពុជា ព្រោះអ្នកទាំងនោះ ឲ្យតែឭថា មានរៀបចំព្រឹត្តិការណ៍ បែបនេះគាត់នឹងមកចូលរួម ដើម្បីទស្សនាហើយ»។
លោកបានបញ្ជាក់បន្ថែមថា៖ «នេះ ជាការបង្កើតនូវផលិតផលទេសចរណ៍ថ្មីមួយទៀត តាមរយៈយុទ្ធគុនរបស់ខ្មែរយើង និងយុទ្ធគុនចម្រុះនៅលើពិភពលោក ហើយគោលដៅសំខាន់ ដើម្បីទាក់ទាញទេសចរ និងពង្រីកសក្តានុពលវប្បធម៌ព្រលឹងក្បាច់គុនជាតិរបស់យើងទៅកាន់ពិភពលោក ខណៈព្រឹត្តិការណ៍នេះ យើងនឹងធ្វើជាមួយគ្នានឹងទិវារត់ពាក់កណ្តាលម៉ារ៉ាតុងនៅអង្គរក្នុងខែធ្នូ ដោយយើងនឹងធ្វើ ៣ យប់ ៣ ថ្ងៃតែម្តង»៕
