.jpg)
សមាសភាពកីឡាករកម្ពុជាទាំង ៤ នាក់ ដែលត្រៀមប្រកួតដណ្តើមខ្សែក្រវាត់ខារ៉ាបាវជាមួយថៃ។ យឺន ពន្លក
ភ្នំពេញៈ ព្រឹត្តិការណ៍ប្រកួតដណ្តើមខ្សែក្រវាត់ខារ៉ាបាវ រដូវកាលថ្មី លើកទី ៧ របស់សង្វៀនអាស៊ីអាគ្នេយ៍ នឹងចាប់ផ្តើមប្រកួត រៀងរាល់ល្ងាចថ្ងៃសៅរ៍ ដែលតម្រូវទៅលើកីឡាករកម្ពុជា និងថៃសរុបចំនួន ៨ នាក់ ចែកចេញជា ២ ពូល ក្នុងប្រភេទទម្ងន់ ៦០ គីឡូក្រាម ហើយសមាសភាពអ្នកប្រដាល់ទាំង ៨ នាក់នេះ មាន ទាំងអ្នកប្រដាល់ជើងចាស់ មានបទពិសោធយូរឆ្នាំ និងជើងថ្មីទើបតែទទួលបានការគាំទ្រ។
តាមការប្រកាសក្នុងសន្និសីទកាសែត កាលពីចុងសប្តាហ៍មុន បានឲ្យដឹងថា ភាគីកម្ពុជា ដែលឈរនៅពូល A មានកីឡាករ សូត្រ ប៊ុនធី,ឃីម បូរ៉ា, សុខ ខេវិន និងជើងថ្មី លី ភា ចំណែកភាគីថៃ ក្នុងពូល B មានជើងចាស់ Phat Chhayakphum និង PhatNgenthong និងជើងថ្មី Phat Maha និង PhaThana។
ចំពោះរូបមន្តប្រកួត គឺនឹងត្រូវធ្វើឡើងដូចលើកមុនៗដែរ គឺកីឡាករកម្ពុជាទាំង ៤ នាក់ ត្រូវធ្វើការប្រកួតជម្រុះវិលជុំជាមួយ អ្នកប្រដាល់ថៃទាំង ៤ គឺអ្នកឈរនៅពូលជាមួយគ្នា មិនជួបគ្នាទេ ហើយក្រោយការប្រកួតវិលជុំចំនួន ៤ លើកបានបញ្ចប់ គឺអ្នកមានពិន្ទុខ្ពស់ជាងគេ ក្នុងពូល A និងពូល B ត្រូវឡើងទៅប្រកួត នៅវគ្គផ្តាច់ព្រ័ត្រតែម្តង។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានដាក់គោលការណ៍ម៉ឺងម៉ត់ សម្រាប់ការប្រកួតលើកនេះ។ លោកបានសង្កត់ធ្ងន់ថា៖ «កីឡាករ និងគណៈកម្មការចៅក្រម ត្រូវអនុវត្តតាមបទបញ្ជាការប្រកួត ដោយម៉ឺងម៉ាត់។ អ្នកធ្វើអ្វីដែលខុស ត្រូវទទួលខុសត្រូវខ្លួនឯង គឺលែងមានការយោគយល់បន្តទៀតហើយ អ៊ីចឹងអ្នកមិនចេះកែខ្លួន ត្រូវតែទទួលពិន័យតាមច្បាប់ ជាធរមាន»។
ជាមួយគ្នានេះ លោក តែម ម៉ឺន បានបន្ថែមថា៖ «រូបមន្តប្រកួត មិនត្រូវមានការផ្លាស់ប្តូរក្នុងអំឡុងប្រកួតវគ្គសន្សំពិន្ទុនោះទេ គឺអនុវត្តឲ្យបានល្អជាដាច់ខាត រហូតចប់ចុងចប់ដើមហើយការប្រកាសលទ្ធផលក្រោយការប្រកួត ត្រូវធ្វើឡើងដោយតម្លាភាព គឺប្រកាសដោយពិធីករចំៗឈ្មោះចៅក្រមតែម្តង ព្រោះការធ្វើដូចនេះទើបមហាជនដឹងថា ចៅក្រមណាដែលផ្តល់ពិន្ទុផ្ទុយពីគេ»។
ចំណែកលោក ហ៊ុយ សុខា នាយកទីផ្សារខារ៉ាបាវ បានថ្លែងថា៖ «ក្រុមហ៊ុន នៅតែបន្តការឧបត្ថម្ភជានិច្ច ចំពោះកម្មវិធីប្រដាល់ដ៏ទាក់ទាញនេះ ព្រោះនៅសង្វៀនអាស៊ីអាគ្នេយ៍នេះយើងសហការគ្នាបានល្អ ក្នុងការប្រកួត ដោយក្នុងនោះមានភាពអវិជ្ជមានតិចតួចបំផុត»។
ទាក់ទងទៅនឹងប្រាក់រង្វាន់ ដែលម្ចាស់ជយលាភី នឹងត្រូវទទួលបាន លោក ញាន សុធីអ្នកគ្រប់គ្រងកម្មវិធីប្រកួតនេះ បានឲ្យដឹងថា អ្នកឈ្នះលេខ ១ នឹងទទួលបានខ្សែក្រវាត់ និងប្រាក់រង្វាន់ ៥០០០ ដុល្លារ ឯអ្នកចាញ់បានលេខ ២ បានពាន ១ និងប្រាក់ចំនួន ៣០០០ ដុល្លារ។
លោកបន្ថែមថា៖ «សម្រាប់ការប្រកួតរដូវកាលទី ៧ នេះ នឹងចាប់ដំណើរការប្រកួត ពីថ្ងៃទី ៨ ខែកញ្ញា តទៅ ដោយគ្រោងប្រកួតចំនួន ១១ សប្តាហ៍ បញ្ចប់នៅថ្ងៃទី ១៧ ខែវិច្ឆិកា ឆ្នាំ ២០១៨ ដោយគ្មានការប្រកួតវគ្គពាក់កណ្តាលផ្តាច់ព្រ័ត្រនោះទេ»៕
