ក្រុងប៉ារីស: កីឡាករ Grigor Dimitrov បានឲ្យដឹងកាលពីថ្ងៃចន្ទថា ខ្លួនធ្វើតេស្តវិជ្ជមាននៃជំងឺកូវីដ ១៩ ហើយការផ្ដល់ដំណឹងនេះ ធ្វើឲ្យគេកា្លយជាកីឡាករវាយកូនបាល់ (តេន្នីស) អាជីពលំដាប់អន្តរជាតិ ដែលបង្ហាញថាខ្លួនបានឆ្លងជំងឺផ្លូវដង្ហើមថ្មីនេះ ខណៈរូបគេកំពុងធ្វើការប្រកួតប្រជែង ក្នុងកម្មវិធី Adria Tour នៅប្រទេសក្រូអាស៊ី។
កីឡាករសញ្ជាតិប៊ុលហ្គារីវ័យ ២៩ ឆ្នាំ បានប្រកាសដកខ្លួន ក្រោយទទួលបានលទ្ធផលតេស្ត ហើយសម្រាប់ការប្រកួតពានកម្ដៅសាច់ដុំនេះ គូរវាងកីឡាករចំណាត់ថ្នាក់ទី១ពិភពលោក Novak Djokovic របស់ស៊ែប៊ី និងកីឡាកររុស្ស៊ី Andrey Rublev ជុំផ្ដាច់ព្រ័ត្រ ក៏ត្រូវបានលុបចោលដែរ។
Dimitrov អតីតកីឡាករឈរនៅលេខ៣ ក្នុងតារាងចំណាត់ថ្នាក់អត្តពលិកវាយតេន្នីសផ្នែកបុរសរបស់ពិភពលោក បានសរសេររៀបរាប់ប្រាប់តាមរយៈគណនី Instagram របស់ខ្លួនថា៖ «ខ្ញុំចង់ប្រាប់អ្នកគាំទ្រ និងមិត្តភក្ដិរបស់ខ្ញុំទាំងអស់ឲ្យដឹងថា ខ្ញុំទទួលបានលទ្ធផលតេស្តវិជ្ជមាននៃជំងឺកូវីដ១៩ ដែលធ្វើចុងក្រោយបង្អស់នៅប្រទេសម៉ូណាកូ។ ការណ៍ដែលខ្ញុំប្រាប់ដំណឹងនេះ ព្រោះខ្ញុំចង់ប្រាកដថា គ្រប់គ្នាដែលមានទំនាក់ទំនងដោយផ្ទាល់ជាមួយខ្ញុំ ក្នុងពេលប៉ុន្មានថ្ងៃចុងក្រោយនេះ ទៅត្រួតរកមើលវីរុស និងអនុវត្តតាមគោលការណ៍សុវត្ថិភាពដែលចាំបាច់»។
ចុងក្រោយនៃសារតាមរយៈបណ្ដាញសង្គមរបស់កីឡាករ Dimitrov បានសរសេរថា៖ «ខ្ញុំសោកស្ដាយណាស់ ដែលធ្វើឲ្យមានហានិភ័យសម្រាប់គ្រប់គ្នា។ ពេលនេះ ខ្ញុំត្រឡប់ទៅផ្ទះវិញហើយ ដើម្បីធ្វើការព្យាបាល។ អរគុណសម្រាប់ការលើកទឹកចិត្តពីអ្នកគ្រប់គ្នា ហើយសូមអ្នកគ្រប់គ្នារស់នៅដោយសុវត្ថិភាព និងសុខភាពល្អ»។
ការប្រកួតជើងទី ២ សម្រាប់ព្រឹត្តិការណ៍សប្បុរសនៃតំបន់បាល់កង់ គឺកម្មវិធី Adria Tour ដែលត្រូវបានរៀបចំឡើងដោយកីឡាករ Djokovic ខណៈការប្រកួតវាយតេន្នីសអន្តរជាតិ នៅតែផ្អាកដដែលដោយសារជំងឺកូវីដ ១៩ ធ្វើឡើងនៅឯទីក្រុងដ៏មានវ័យចំណាស់សាដា (Zadar) របស់ប្រទេសក្រូអាស៊ី។
ប្រធានទទួលខុសត្រូវសម្រាប់ព្រឹត្តិការណ៍នេះ លោក Goran Ivanisevic បាននិយាយជាមួយអ្នកគាំទ្រនៅខាងក្រៅទីលានថា៖ «យើងត្រូវបានផ្ដល់ព័ត៌មានមកថា កីឡាករ Grigor Dimitrov ធ្វើតេស្តវិជ្ជមានវីរុសកូរ៉ូណា ហើយយើងនឹងត្រូវតែលុបចោលការប្រកួតវគ្គផ្ដាច់ព្រ័ត្រនៃព្រឹត្តិការណ៍នេះ នាក្រុងសាដា»៕ AFP/VN