.jpg)
បាង កាណុន បានធាក់ទៅលើ សុវណ្ណម៉ាយ ក្នុងពេលប្រកួត។ រូប ពន្លក
ភ្នំពេញ៖ បាង កាណុន របស់ក្លិបអាណាចក្រគុនខ្មែរ បានបង្ហាញបច្ចេកទេសប្រកួតយ៉ាងល្អក្នុងការយកឈ្នះលើអ្នកប្រដាល់ជើងថ្មីដូចគ្នាគឺ សូដា សុវណ្ណម៉ាយ ដោយពិន្ទុជាឯកច្ឆន្ទ ដើម្បីឡើងទៅកាន់វគ្គទី ២ នៃការប្រកួតដណ្តើមពានរង្វាន់ TV5 Boxing Knock Out Series ដោយ កាណុន នឹងត្រូវប្រឈមជាមួយជើងខ្លាំង។
សូដា សុវណ្ណម៉ាយ ក៏ជាអ្នកប្រដាល់ ដែលលំបាកបង្ក្រាបណាស់ដែរ គឺស៊ូជាមួយគ្នាយ៉ាងស្វិតស្វាញបំផុតមុននឹងចាញ់ បាង កាណុន ដោយពិន្ទុ។ សូដា សុវណ្ណម៉ាយ បាននិយាយថា ចាញ់ដោយអស់ចិត្ត ព្រោះប្រឹងអស់ពីសមត្ថភាព។ បន្ថែមពីលើនេះ សុវណ្ណម៉ាយ មានស្នាមរបួស ២ កន្លែងលើផ្ទៃមុខ និងចិញ្ចើម គឺជាំនៅភ្នែកស្ដាំ និងថ្ងាស ដែលមើលទៅទំនងគ្រាំគ្រាខ្លួនមិនតិចដែរ។
តាមរយៈការប្រកួតជម្រុះវគ្គទី១ កាលពីយប់ថ្ងៃសៅរ៍ កន្លងមកនេះ បាង កាណុន មានប្រៀបឈ្នះដាច់លើ សុវណ្ណម៉ាយ នៅទឹកទី២ និងទឹកទី៣ ដោយការប្រើក្បាច់កណ្តាប់ដៃកែង និងជង្គង់ បានល្អ គឺវាយចំគោលដៅគួរឱ្យកោតសរសើរ ហើយតាមរយៈជ័យជម្នះនេះ កាណុន ត្រូវឡើងទៅកាន់វគ្គទី២ ដែលគិតមកដល់ពេលនេះ បានរកឃើញ ៤ នាក់ហើយ គឺ ធន់ អៀងឡៃ, ទូច ដាវីដ, ពេជ្រ ប៊ុនសិទ្ធ និង បាង កាណុន។
នៅពេលសួរដល់ការត្រៀមប្រកួតជុំទី២ នោះ បាង កាណុន បាននិយាយក្រោយពេលឈ្នះ សុវណ្ណម៉ាយ ថា៖ «សម្រាប់ជំនួបប្រកួតជុំទី២ ដែលប្រជុំទៅដោយអ្នកខ្លាំង និងជើងចាស់មួយចំនួននោះ ខ្ញុំក៏ព្រួយបារម្ភតិចតួចដែរ ប៉ុន្តែការហ្វឹកហាត់ និងតាំងចិត្តប្រកួតដោយមិនខ្លាចនោះ ខ្ញុំត្រូវតែធ្វើឱ្យបានល្អ ព្រោះអ្នកប្រដាល់ បើនៅតែខ្លាចដៃគូប្រកួត គឺមិនអាចឈានទៅល្បីល្បាញបានទេ»។
តាមរយៈរូបមន្តប្រកួតដែលបានកំណត់រួចហើយនោះ គឺនៅជុំទី២ ពេជ្រ ប៊ុនសិទ្ធ ត្រូវប៉ះ រិន ដេវីដ ហើយ បាង កាណុន ត្រូវជួបជើងខ្លាំងល្បីឈ្មោះ ធន់ អៀងឡៃ ខណៈការទស្សន៍ទាយក្រៅផ្លូវការពីអ្នកតាមដានភាគច្រើន លាន់មាត់ថា បាង កាណុន មិនអាចនឹងយកឈ្នះ ធន់ អៀងឡៃ នោះឡើយ។
ទោះជាយ៉ាងណា កាណុន ទំនងមិនខ្លាចញញើតនឹងការប្រកួតនោះទេ។ កាណុន បញ្ជាក់ថា៖ «រឿងប្រកួតជុំក្រោយ គឺខ្ញុំមិនខ្វល់ថា ដៃគូរបស់ខ្ញុំខ្លាំងប៉ុនណាទេ សំខាន់ខ្ញុំហាត់ល្អប្រកួតល្អ គឺត្រូវការឈ្នះជាដាច់ខាត ប៉ុន្តែលទ្ធផលចេញមកយ៉ាងណា ចាំមើលសិនទៅ»។
ដោយឡែក ការប្រកួតគូមិត្តភាពវិញ អ្នកប្រដាល់ជើងចាស់ យុគ យក្សផ្លែ បានយកឈ្នះជើងថ្មី សូដា ម៉ាឡាកាំង ដោយពិន្ទុ ទាំងវេទនាភ្នែក ខណៈក្នុងការប្រកួតចំនួន ៥ ទឹកនោះ អ្នកទាំង ២ នេះ ចាប់ផ្ដើមវាយសម្រុកគ្នាតាំងពីដើមទឹកទី១។ យក្សផ្លែ ដែលដឹងខ្លួនថា កម្លាំងស្រុតចុះនោះ នៅតែចិត្តធំមានឆន្ទៈប្រកួតមិនរាថយ ប៉ុន្តែមិនអាចផ្តួលជើងថ្មី សូដា ម៉ាឡាកាំង ឱ្យសន្លប់បានឡើយ។
លោក ផាត់ សូដា គ្រូបង្វឹក សូដា សុវណ្ណម៉ាយ និង សូដា ម៉ាឡាកាំង បាននិយាយថា៖ «សប្តាហ៍នេះ កូនសិស្សខ្ញុំ ចាញ់ទាំង ២ នាក់ ប៉ុន្តែបានបង្ហាញនូវសមត្ថភាពប្រកួតល្អ គឺចាញ់ដោយវាយអស់ពីលទ្ធភាព គ្រាន់តែបច្ចេកទេសនៅមិនទាន់ល្អដល់គេ។ យ៉ាងណាក៏ដោយ មួយរយៈពេលទៀត ក្លិបគោព្រៃនឹងធ្វើឱ្យមហាជនមានការភ្ញាក់ផ្អើលពីសមត្ថភាពកីឡាកររបស់ក្លិបយើង»៕
