.jpg)
លោក សុខ មង្គលរស្មី (ពីស្តាំ) តឹក ប៊ុនវី, សំបូរ ណាន និង ណុំ សុបិន្ត កាលថតជុំគ្នាឆ្នាំ ២០១៦។ ភ្នំពេញប៉ុស្តិ៍
ភ្នំពេញ: ម្ចាស់មេដាយមាសជើងឯកអាស៊ាន តឹក ប៊ុនវី បានប្រកាសលាឈប់ពីតួនាទីជាអគ្គលេខាធិការខេមរៈសហព័ន្ធកាយវប្បកម្ម និងបានចោទលោក សុខ មង្គលរស្មី ជាប្រធានសហព័ន្ធថាបានយកកីឡានេះធ្វើជាជំនួញបម្រើតែប្រយោជន៍ផ្ទាល់ខ្លួន ហើយបញ្ហានេះត្រូវបានមន្ត្រីជំនាញប្រាប់ថា សហព័ន្ធនេះអាចនឹងត្រូវរំលាយចោល បើសិនជាបញ្ហាផ្ទៃក្នុងពិតជាមានអំពើពុករលួយដូចការចោទរបស់ ប៊ុនវី មែន។
ជុំវិញការចោទប្រកាន់គ្នានេះលោក តឹក ប៊ុនវី បានសរសេរបង្ហោះនៅលើហ្វេសប៊ុក ( Steven Amy) របស់លោកកាលពីថ្ងៃសៅរ៍ថា៖ «ខ្ញុំបាទ តឹក ប៊ុនវី ជាអគ្គលេខាធិការខេមរៈសហព័ន្ធកាយវប្បកម្ម និងជាកីឡាករជម្រើសជាតិម្នាក់ដែរ សុំប្រកាសលាលែងពីសហព័ន្ធចាប់ពីពេលនេះតទៅ មូលហេតុមកពីប្រធានសហព័ន្ធគិតតែពីផលប្រយោជន៍ផ្ទាល់ខ្លួន គិតតែពីផលចំណេញរបស់គាត់ផ្ទាល់»។
«រយៈពេល ៣ ឆ្នាំមកហើយដែលសហព័ន្ធត្រូវបានទទួលស្គាល់ដោយក្រសួងអប់រំ យុវជន និងកីឡា និង NOCC ហើយខ្ញុំបាទជាកីឡាទទួលបានមេដាយមាសអាស៊ីអាគ្នេយ៍មុនគេនៅឆ្នាំ ២០១៦ និងមេដាយសំរឹទ្ធពិភពលោកនៅឆ្នាំ ២០១៦ ផង ហើយកាលនោះដោយអាណិតដល់បងប្អូនកីឡាករដូចគ្នាដែលចេញទៅប្រកួតម្តងៗ មិនមានប្រាក់ចេញទៅ ខ្ញុំសុខចិត្តកាត់ប្រាក់រង្វាន់ខ្លួនឯងផ្ទាល់ចំនួន ២០ ភាគរយ ដើម្បីដាក់ចូលក្នុងសហព័ន្ធ សម្រាប់ទុកឲ្យកីឡាករក្រោយៗចេញទៅប្រកួតអន្តរជាតិតទៀត»។
ប៊ុនវី បន្ថែមថា៖ «ចំណែកលោកប្រធានរកបានពីក្រៅប្រទេស ឬក្នុងប្រទេស គាត់មិនដែលយកមកដាក់ក្នុងសហព័ន្ធទេ គាត់គិតតែយកចំណេញលើកីឡាករទាំងអស់ និយាយរួមគាត់យកកីឡាករធ្វើជាមុខជំនួញគាត់ ដើម្បីដើរសុំលុយគេ តែពេលបានលុយមិនដែលយកមកឲ្យកីឡាករទេ»។
បន្ថែមទៅលើនេះ តឹក ប៊ុនវី បានបង្ហោះសារមួយទៀតកាលពីថ្ងៃអាទិត្យ ដោយបញ្ជាក់ថា៖ «មូលហេតុខ្ញុំសម្រេចចិត្តលាលែងចេញពីអគ្គលេខាធិការសហព័ន្ធគឺខ្ញុំមិនចង់ឲ្យប្រធានសហព័ន្ធយកសហព័ន្ធ និងកីឡាករធ្វើជាអាជីវកម្មផ្ទាល់ខ្លួន ព្រោះលោកប្រធានមិនដែលរកលុយបាន ១០០ រៀលចូលសហព័ន្ធទេ ហើយពេលកីឡាករចេញទៅប្រកួតក្រៅប្រទេសម្តងៗត្រូវរកប្រាក់ដោយខ្លួនឯង»។
ទាក់ទងទៅនឹងការចោទប្រកាន់នេះ ភ្នំពេញ ប៉ុស្តិ៍ បានព្យាយាមទាក់ទងទៅលោក សុខ មង្គលរស្មី ជាច្រើនលើក ប៉ុន្តែលោកមិនបានលើកទូរស័ព្ទនោះទេ។
យ៉ាងណាក៏ដោយជុំវិញបញ្ហាដ៏រសើបដែលបានប្រើហ្វេសប៊ុកបរិហារកេរ្តិ៍គ្នា ជាលើកដំបូងនេះគឺលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានជំរុញគណៈកម្មាធិការប្រតិបត្តិរបស់ខេមរៈសហព័ន្ធកាយវប្បកម្ម ធ្វើមហាសន្និបាតវិសាមញ្ញមួយ ដើម្បីធ្វើការដោះស្រាយបញ្ហានេះ មុនពេល NOCC និងក្រសួងអប់រំ ធ្វើការស៊ើបអង្កេតបន្ថែម ដើម្បីឈានទៅដល់ការសម្រេចចុងក្រោយថា ត្រូវរំលាយសហព័ន្ធនេះចោលឬយ៉ាងណា?
លោក វ៉ាត់ ចំរើន បានប្រាប់ភ្នំពេញប៉ុស្តិ៍កាលពីម្សិលមិញថា៖ «នៅពេលអគ្គលេខាធិការសុំឈប់បែបនេះគួរធ្វើមហាសន្និបាតវិសាមញ្ញមួយ ព្រោះជាបញ្ហាផ្ទៃក្នុងរបស់សហព័ន្ធ ហើយបើសិនជាពិនិត្យឃើញថាសហព័ន្ធមានបញ្ហាមិនប្រក្រតី អយុត្តិធម៌ ឬក៏ពុករលួយដូចការចោទប្រកាន់របស់អគ្គលេខាធិការមែនគឺសហព័ន្ធនេះអាចនឹងត្រូវរំលាយ ឬក៏ត្រូវបញ្ឈប់សមាជិកភាព ព្រោះមហាសន្និបាតរបស់ NOCC នៅដើមឆ្នាំនេះបានកំណត់ថា ត្រូវព្យាបាល និងវះកាត់ គ្រប់សហព័ន្ធណាដែលមានប៉ះពាល់ទៅនឹងភាពមិនប្រក្រតី និងការអភិវឌ្ឍរបស់ខ្លួន។ អ៊ីចឹងយើងត្រូវតែបន្ថែមនូវការស៊ើបអង្កេតឲ្យច្បាស់ជាមុនសិន»៕
