.jpg)
សកម្មភាពប្រកួតបើកឆាកកីឡាកាយសម្ព័ន្ធជ្រើសរើសជើងឯកថ្នាក់ជាតិ ឆ្នាំ ២០១៨ កាលពីថ្ងៃចន្ទ។ ស្រេង ម៉េងស្រ៊ុន
ភ្នំពេញៈ សហព័ន្ធកីឡាកាយសម្ព័នកម្ពុជា បានកំណត់យកនូវបទបញ្ជាប្រកួតដ៏ជាក់លាក់មួយ សម្រាប់អនុវត្ត ក្នុងការប្រកួតកីឡាកាយសម្ព័នជ្រើសរើសជើងឯកថ្នាក់ជាតិ និងពានរង្វាន់លោកបណ្ឌិត ថោង ខុន លើកទី ២ ឆ្នាំ ២០១៨ ដែលបានចាប់ផ្តើម ជាផ្លូវការ នៅក្នុងសាលដំបូលទូកនៃពហុកីឡដ្ឋានជាតិ កាលពីព្រឹកថ្ងៃចន្ទ នឹងបញ្ចប់នៅថ្ងៃព្រហស្បតិ៍ ដើម្បីធ្វើឲ្យការជ្រើសរើសរកអត្តពលិកឆ្នើមថ្នាក់ជាតិ កាន់តែមានភាពប្រាកដ និងយុត្តិធម៌។
ជាមួយគ្នានេះសហព័ន្ធ បានបើកវគ្គសិក្ខាសាលាបំប៉នបច្ចេកទេស ចៅក្រម ដើម្បីបញ្ជ្រាបនូវចំណេះដឹង និងបទបញ្ជាថ្មីៗ ដែលសហព័ន្ធកីឡាកាយសម្ព័ន្ធអន្តរជាតិ ទើបកែប្រែ ទៅដល់គណៈកម្មការបច្ចេកទេស ដែលត្រូវដឹកនាំការប្រកួតនេះរួចហើយ។
លោយ ណយ ផាន់ណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា បានថ្លែងប្រាប់ ក្នុងអំឡុងពេលប្រកួត កាលពីព្រឹកថ្ងៃចន្ទថា៖ «យើងបាននាំយកនូវបទបញ្ជាមួយចំនួន ដែលសហព័ន្ធកីឡាសម្ព័ន្ធអន្តរជាតិ ទើបមានការកែប្រែ មកអនុវត្តក្នុងការប្រកួតនេះ ព្រោះនេះជាចំណុចសំខាន់ ដែលយើងត្រូវពង្រឹងគណៈកម្មការបច្ចេកទេសរបស់យើង គឺសូម្បីតែគ្រូបង្វឹក ឬប្រតិភូមួយចំនួន ក៏យើងឲ្យចូលរួមវគ្គបំប៉នបច្ចេកទេសចៅក្រមនេះដែរ ដើម្បីឲ្យគាត់បានយល់ពីលក្ខណៈបច្ចេកទេស ចៀសវាងការប្រកួតមានការប្រទូសរ៉ាយគ្នា»។
លោក ណយ ផាន់ណា ដែលជាប្រធានគណៈកម្មការបច្ចេកទេស និងចៅក្រម ផងនោះ បានសង្កត់ធ្ងន់ថា៖ «យើងបានដាក់បទបញ្ជាតឹងរ៊ឹងបំផុត សម្រាប់ការប្រកួតនេះ ដោយមិនមានការយោគយល់គ្នាអ្វីនោះទេ ព្រោះគោលការណ៍កីឡាត្រូវតែមានយុត្តិធម៌ និងតម្លាភាពក្នុងការផ្តល់ពិន្ទុ អ៊ីចឹងបើខ្ញុំសង្កេតឃើញថា គ្រូ ឬបុគ្គលណាមួយ បំពេញការងារ មានការលម្អៀង ខ្ញុំអាចនឹងបញ្ឈរជើងគាត់ ហើយខ្ញុំនឹងមិនឲ្យគាត់ដាក់ពិន្ទុទៀត អាចដល់ ២ ឆ្នាំ ឬរហូតដល់ ៤ ឆ្នាំ»។
លោកបន្ថែមថា៖ «អ្វីដែលយើងធ្វើនេះ គឺដើម្បីឆ្ពោះទៅរកភាពជោគជ័យ ក្នុងការប្រកួតស៊ីហ្គេម ឆ្នាំ ២០២៣ នៅកម្ពុជា ព្រោះបើយើងគិតតែកូនសិស្សយើង បក្សពួកយើង ឬបងប្អូនយើង គឺមិនអាចទៅរួចទេ ហើយនេះជាទស្សនដ៏ច្បាស់លាស់មួយរបស់ឯកឧត្តមប្រធាន ថោង ខុន បានចង្អុលបង្ហាញថា ត្រូវរើសកីឡាករល្អ កីឡាការិនីល្អ និងគ្រូល្អ ដែលមានឆន្ទៈ ដោយក្នុងនោះគណៈកម្មការបច្ចេកទេស ត្រូវតែធ្វើឲ្យមានលក្ខណៈយុត្តិធម៌បំផុត សម្រាប់ការប្រកួតនេះ ទើបយើងទទួលបានអត្តពលិកល្អ សម្រាប់ថ្នាលរបស់យើង»។
យ៉ាងណាក៏ដោយ ប្រតិភូកីឡាតំណាងឲ្យខេត្តក្រចេះ ខេត្តតាកែវ ខេត្តកំពង់ឆ្នាំង និងក្រសួងមហាផ្ទៃ ដែលបានចូលរួមការប្រកួតនេះ បានទទួលយកការពង្រឹងបទបញ្ជាប្រកួតនេះដោយរីករាយ ព្រោះការធ្វើបែបនេះនឹងធ្វើឲ្យអត្តពលិកទាំង ៧៤ នាក់កាន់តែមានភាពជឿជាក់ក្នុងការប្រកួតប្រជែងទៅលើប្រភេទវិញ្ញាសាទាំង ១៣ ដែលបានដាក់ឲ្យប្រកួតក្នុងឆ្នាំនេះ។
បន្ថែមលើនេះ លោក ថោង ខុន បានបន្ថែមភាពកក់ក្តៅមួយទៀតឲ្យពួកគេ គឺការបង្កើនប្រាក់រង្វាន់ទ្វេដង ដោយអ្នកលេខ ១ នឹងទទួលបាន ៥០ ម៉ឺនរៀល លេខ ២ បាន ៤០ ម៉ឺន និងលេខ ៣ បាន ៣០ ម៉ឺនរៀល ដ្បិតអីលោកបាន ចំណាយថវិកាផ្ទាល់ខ្លួន ១១០០០ ដុល្លារ សម្រាប់ទ្រទ្រង់ការប្រកួត នេះ គឺបន្ថែមលើកញ្ចប់ថវិការបស់ក្រសួងអប់រំ យុវជន និងកីឡា ដែលមានត្រឹម ៩០០០ ដុល្លារ៕
