.jpg)
លោក ណយ ផាណា ពេលថតជាមួយក្រុមអត្តពលិកទាំង ១០ នាក់ នៅព្រលានយន្តហោះ។ រូបថត ឈន ណន
ភ្នំពេញ៖ ក្រុមអត្តពលិក និងគ្រូបង្វឹកកីឡាកាយសម្ព័ន្ធកម្ពុជាបានចាត់ទុកការចេញទៅប្រកួត Korea Open និង Pre-Sea Games 2019 ដែលនឹងត្រូវធ្វើឡើងពីថ្ងៃទី ២៤ ដល់ថ្ងៃទី ២៥ ខែតុលា នៅទីក្រុងសេអ៊ូល ប្រទេស កូរ៉េ ថា ជាការប្រកួតធ្វើតេស្តយ៉ាងល្អ សម្រាប់ក្រុមកាយសម្ព័ន្ធកម្ពុជា ក្នុងការពង្រឹងសមត្ថភាព ដើម្បីត្រៀមចូលរួមការប្រកួតស៊ីហ្គេម លើកទី ៣០ នៅប្រទេស ហ្វីលីពីន នាចុងឆ្នាំ ២០១៩ នេះ។
លោក ណយ ផាណា ជាប្រធានប្រតិភូដឹកនាំក្រុមអត្តពលិកកាយសម្ព័ន្ធកម្ពុជាទៅចូលរួមការប្រកួត Korea Open និង Pre-Sea Games 2019 លើកនេះ បានថ្លែង នៅព្រលានយន្តហោះអន្តរជាតិភ្នំពេញ កាលពីយប់ថ្ងៃចន្ទថា៖ «នៅក្នុងរយៈពេល ៣ ឆ្នាំចុងក្រោយនេះ គឺនេះជាលើកទី ១ ហើយ ដែលយើងបានបញ្ជូនក្រុមអត្តពលិក ជាលក្ខណៈទ្រង់ទ្រាយធំ ទៅប្រកួតនៅលើឆាកអន្តរជាតិ ហើយនេះជាការប្រកួតប្រជែង ឬតេស្តយ៉ាងល្អ សម្រាប់ត្រៀមប្រកួតស៊ីហ្គេម នៅឆ្នាំចុង ២០១៩ នេះ»។
នៅពេលសួរពីក្តីរំពឹង ដែលនឹងទទួលបានពីការប្រកួតនេះ លោក ណយ ផាណា ដែលជាគ្រូបង្វឹកក្រុមជម្រើសជាតិកាយសម្ព័ន្ធកម្ពុជាផងនោះ បានឆ្លើយតបជាមួយការប្រើពាក្យប្រៀបធៀបថា៖ «បើនិយាយពីក្តីរំពឹងយើង គឺជាបទពិសោធមួយ ដើម្បីត្រៀមចូលរួមប្រកួតអន្តរជាតិ។ មាន់ជល់ បើយើងចិញ្ចឹមហើយ គ្រាន់តែក្រុងទុក សម្រួចតែខ្នាយ ហើយយកទៅជល់ មិនឈ្នះគេនោះទេ គឺគ្រាន់តែលែងចូលទីលាន ទម្លាក់ស្លាបសុំចុះចាញ់បាត់ទៅហើយ។ កីឡាក៏ដូចគ្នា បើកីឡាករគ្រាន់តែហាត់ៗៗ ហាត់រហូតដល់ចាស់ ហើយគ្មានការប្រកួតអន្តរជាតិ ក៏មិនអាចធ្វើអ្វីបានដែរ»។
សហព័ន្ធកីឡាកាយសម្ព័ន្ធកម្ពុជា ដែលទទួលបានការគាំទ្រពី CAMSOC និងមានការជ្រោមជ្រែងពីលោករដ្ឋមន្រ្តីក្រសួងទេសចរណ៍ ថោង ខុន ជាប្រធានសហព័ន្ធ និងលោក សុខ ហុង ជាអនុប្រធាននោះ បានបញ្ជូនអត្តពលិករហូតដល់ ១០ នាក់ (ស្រី ៥ នាក់) ទៅចូលរួមការប្រកួត Korea Open និង Pre-Sea Games 2019 លើកនេះ ដោយពួកគេ បានចាកចេញពីមាតុប្រទេស កាលពីយប់ថ្ងៃចន្ទ នឹងគ្រោងត្រឡប់មកវិញ នៅថ្ងៃទី ២៦ ខែតុលា ខាងមុខនេះ។
នៅក្នុងចំណោមអត្តពលិកទាំង ១០ នាក់នេះ គឺមានទាំងអ្នកដែលត្រូវត្រៀមស៊ីហ្គេម ឆ្នាំ ២០១៩ ព្រមទាំងក្រុមយុវជន ត្រៀមទៅស៊ីហ្គេម ឆ្នាំ ២០២១ និងស៊ីហ្គេម ឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ។ ហេតុនេះ សម្រាប់ការប្រកួតនៅកូរ៉េនេះ ពួកគេត្រូវបានបែងចែកឲ្យមានការប្រកួតទៅតាមប្រភេទអាយុខុសៗគ្នា គឺមានក្រុមអាយុ ១៨ ឆ្នាំឡើង ក្រុមអាយុក្រោម ១៧ ឆ្នាំ និងក្រុមអាយុ ១៥ ឆ្នាំ។
កីឡាករ សោ សុផេង ដែលជាបេក្ខភាព ត្រូវប្រកួតស៊ីហ្គេម នៅឆ្នាំនេះបាននិយាយថា៖ «សម្រាប់ការចេញទៅប្រកួតនេះ វាសំខាន់ខ្លាំងណាស់ សម្រាប់ពួកយើងក្នុងការដកស្រង់បទពិសោធ ពីព្រោះប្រទេសជាច្រើន ដែលត្រូវប្រកួតស៊ីហ្គេម នាពេលខាងមុខនេះ ក៏បានចូលរួមក្នុងព្រឹត្តិការណ៍នេះដែរ អ៊ីចឹងតាមរយៈការប្រកួតនេះ យើងនឹងអាចបំពេញបន្ថែម នៅចន្លោះខ្វះខាតរបស់យើង ហើយយើងក៏នឹងខំប្រឹងដើម្បីទទួលបានលទ្ធផលល្អពីការប្រកួតនេះផងដែរ»។
ចំណែកកីឡាការិនី សោ សុគីម និយាយថា៖ «ការចេញទៅប្រកួតលើកនេះ ពិតជាមានសារប្រយោជន៍មែនទែន ព្រោះយើងបានបញ្ចេញសមត្ថភាពរបស់យើង មុនការប្រកួតស៊ីហ្គេម ហើយម្យ៉ាងទៀត តាមរយៈការប្រកួតនេះ យើងអាចបានដឹងពីសមត្ថភាពគូប្រកួតរបស់យើងមួយចំនួន ដែលត្រូវប៉ះនៅស៊ីហ្គេម ដោយសារពួកគេក៏ត្រូវចូលរួមនៅក្នុងការប្រកួតនេះផងដែរ»៕
