ភ្នំពេញៈ ទុក្ខលំបាករបស់អ្នកប្រដាល់ ដែលបានអូសបន្លាយអស់រយៈពេលជាច្រើនឆ្នាំជុំវិញការគ្មានប្រាក់ចេញថ្លៃព្យាបាលរបួស ទៅតាមការកំណត់របស់មន្ទីរពេទ្យ ឬគ្លីនិកឯកជន ដោយតម្រូវឲ្យបង់ថ្លៃសេវាភ្លាមៗមិនឲ្យជំពាក់នោះ ត្រូវបានសហព័ន្ធកីឡាប្រដាល់គុនខ្មែរ រកដំណោះស្រាយបានល្អប្រសើរហើយ គឺសហព័ន្ធមានប្រាក់បម្រុង និងមានគ្រូពេទ្យប្រចាំការជាមួយកីឡាកររងរបួស ដើម្បីដោះស្រាយផ្តល់ប្រាក់បង់ភ្លាមៗទៅឲ្យពេទ្យ ទោះបីពេលវេលាយប់ជ្រៅ និងម៉ោងប៉ុន្មានក៏ដោយ។
ជាច្រើនឆ្នាំមកហើយ កីឡាកររងរបួស បន្ទាប់ពីប្រកួតនៅលើសង្វៀន មានការលំបាកខ្លាំង ក្នុងពេលទៅព្យាបាល ព្រោះពេទ្យ តម្រូវឲ្យបង់ប្រាក់មុន ទើបព្យាបាលឲ្យ គឺមិនអាចជំពាក់បានឡើយ ប៉ុន្តែការឧបត្ថម្ភពីម្ចាស់សង្វៀន និងសហព័ន្ធ ចំពោះថ្លែសេវាព្យាបាលរបួសនេះ គឺលុះត្រាមានវិក្កយបត្រចំណាយថ្លៃព្យាបាលពីពេទ្យ ទើបបើកលុយនោះមកបាន ហើយសង្វៀនខ្លះ ត្រូវប្រើពេលជាង ១ ខែ ទើបបើកប្រាក់បាន។
លោកវេជ្ជបណ្ឌិត ជឹម ផល្លា គ្រូពេទ្យកីឡាជម្រើសជាតិ និងជាគ្រូពេទ្យប្រចាំការនៅតាមសង្វៀនប្រដាល់ បានប្រាប់ភ្នំពេញ ប៉ុស្តិ៍ ថា៖ «បច្ចុប្បន្ននេះបញ្ហាលំបាករបស់កីឡាកររងរបួស ពីការប្រកួត ត្រូវដោះស្រាយបានយ៉ាងល្អ គឺអស់កង្វល់ហើយ ដោយសារតែគ្រប់ការរងរបួស គឺខ្ញុំនៅប្រចាំការគ្រប់ពេលវេលា ដោយធានាបាននូវការចំណាយនានាជាក់ស្តែងតាមតម្រូវការរបស់ស្ថាប័ន ឬមន្ទីរពេទ្យព្យាបាលនោះ»។
លោកបន្ថែមថា៖ «ដោយមានគោលនយោបាយ ដំណោះស្រាយល្អពីឯកឧត្តម តែម ម៉ឺន ប្រធានសហព័ន្ធកីឡាប្រដាល់គុនខ្មែរ គឺខ្ញុំគ្រូពេទ្យប្រចាំការឲ្យសហព័ន្ធ មានសិទ្ធិក្នុងការបើកប្រាក់ទៅចំណាយភ្លាមៗ នៅពេលកីឡាកររងរបួសកំពុងព្យាបាល ទោះបីយប់ជ្រៅយ៉ាងណា គឺមានប្រាក់បម្រុងជានិច្ច»។
ទោះជាយ៉ាងណាលោកគ្រូពេទ្យរូបនេះ បានទទូចសុំឲ្យមានសប្បុរសជន ឬស្ថាប័នណាមួយ ជួយឧបត្ថម្ភឲ្យមានរថយន្តសង្គ្រោះបន្ទាន់ ១ គ្រឿងប្រចាំការ ដែលអាចដាក់សម្ភារពេទ្យដូចជាដបខ្យល់អុកស៊ីហ្ស៊ែន ដើម្បីសង្គ្រោះកីឡាកររបួសធ្ងន់ធ្ងរម្តងម្កាល ដែលជាករណីចាំបាច់បំផុត។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានថ្លែងថា៖ «ការប្រកួតប្រដាល់ ទាំងឡាយតាមស្ថានីយទូរទស្សន៍ឯកជន រាល់ចុងសប្តាហ៍ ជាការសហការរវាងសហព័ន្ធប្រដាល់ជាមួយការឧបត្ថម្ភពីវិស័យឯកជន អ៊ីចឹងដៃគូទាំងនោះ គួរតែរួមគ្នារកដំណោះស្រាយឲ្យបានល្អ ចំពោះកីឡាករដែលរងរបួស ហើយភារកិច្ចទាំងនេះ មិនមែនខាង NOCC ឬ ក្រសួងអប់រំ យុវជន និងកីឡា នោះទេ»។
លោកបន្ថែមថា NOCC និងក្រសួងអប់រំ កំពុងដំណើរការសកម្ម-ភាពធ្វើប័ណ្ណរបបសន្តិសុខសង្គម (សមាជិកបសស) បានតែចំពោះអត្តពលិកក្រុមជម្រើសជាតិ និងកីឡាករកីឡាការិនីជំនាញរបស់សហព័ន្ធប៉ុណ្ណោះ។ ក្រៅពីនេះបញ្ហានានា ដែលមានការប្រកួតតាមលក្ខណៈផ្សាយពាណិជ្ជកម្មរបស់វិស័យឯកជន គឺដោះស្រាយក្នុងក្របខ័ណ្ឌស្ម័គ្រចិត្តឯកភាពគ្នារបស់វិស័យឯកជននោះ។
ចំណែកកីឡាករ រឿង សោភ័ណ្ឌ ដែលឆ្លងកាត់ការប្រកួតប្រដាល់នេះជាង ១០ ឆ្នាំនិយាយថា៖ «ខ្ញុំក៏ដូចកីឡាករទាំងអស់ គឺពេញចិត្តខ្លាំងណាស់ ដែលសហព័ន្ធ បង្កើតឲ្យមានគ្រូពេទ្យប្រចាំការនៅជាមួយកីឡាករ និងរង់ចាំចំណាយភ្លាមៗពេលចូលពេទ្យ ព្រោះកន្លងមកគ្មានអ្នកជំងឺណាជំពាក់ពេទ្យបានទេ គឺត្រូវបង់លុយមុន ទើបព្យាបាលជាក្រោយ។ ខ្ញុំធ្លាប់បាក់ឆ្អឹងខ្ចីក្តោងច្រមុះ ហើយពេលទៅមន្ទីរពេទ្យ គេត្រូវការបង់លុយមុន ទើបព្យាបាលយើង តែឥឡូវនេះមានដំណោះស្រាយបែបនេះ គឺកីឡាករទាំងអស់ពិតជាអស់កង្វល់ហើយ»។
ទាក់ទងទៅនឹងបញ្ហារបួសរបស់កីឡាករ ពេលប្រកួតនេះ លោក តែម ម៉ឺន ប្រធានសហព័ន្ធកីឡាគុនខ្មែរ បានប្រាប់ថា ការចំណាយរបស់កីឡាកររងរបួស ជាបន្ទុកទទួលខុសត្រូវចំនួន ៣ ភាគី គឺខាងសហព័ន្ធកីឡាគុនខ្មែរមួយ ខាងស្ថានីយជាមួយអ្នកស្ពនស័រមួយ និងខាងសមាគមឬក្លិប គឺត្រូវរួមគ្នា ព្រោះគ្មានថវិការាជរដ្ឋាភិបាលនោះទេ៕