ក្រុងអាំស្ទែរដាំ: លោក Frank de Boer ដែលរង់ចាំនូវជ័យជម្នះជាមួយក្រុមជម្រើសជាតិហូឡង់ ក្នុងនាមជាគ្រូបង្វឹក ត្រូវរង់ចាំតទៀត ក្រោយក្រុមរបស់លោកបានត្រឹមស្មើជាមួយអេស្ប៉ាញ អំឡុងការប្រកួតមិត្តភាព នាក្រុងអាំស្ទែរដាំ កាលពីថ្ងៃពុធ។
លោក De Boer ឥឡូវនេះ កន្លងផុតទៅចំនួន ៤ ប្រកួតហើយ ដោយអត់ស្គាល់ពាក្យថា ឈ្នះសោះ ចាប់តាំងត្រូវបានតែងតាំង ក្នុងខែកញ្ញា ជំនួសលោក Ronald Koeman ដែលចាកចេញទៅធ្វើអ្នកចាត់ការក្រុមអ្នកមានបុណ្យ Barcelona នៅអេស្ប៉ាញ។
តែយ៉ាងណា គ្រាប់បាល់របស់ Donny van de Beek ដែលនាំឱ្យក្រុមតាមស្មើភ្លាមៗ ក្រោយសម្រាកវគ្គទី ១ តែប៉ុន្មាននាទី យ៉ាងហោចណាស់ក៏ជួយឱ្យក្រុមពណ៌ទឹកក្រូចគេចផុតពីបរាជ័យ នៅឯកីឡដ្ឋាន Johan Cruyff Arena បន្ទាប់ពីត្រូវអេស្ប៉ាញនាំមុខយ៉ាងលឿន នៅវគ្គទី ១ ដែលស៊ុតដោយកីឡាករ Sergio Canales។
លទ្ធផលស្មើ ប្រហែលជាសញ្ញាវិជ្ជមាននៃក្រុមទាំង ២ ដែលមើលទៅមានសមត្ថភាពគ្រប់គ្រងបាល់ខ្ពស់ តែបានបង្ហាញពីកង្វះខាតការស៊ុត នៅក្រៅតំបន់គ្រោះថ្នាក់ និងភាពមុតស្រួចនៅតំបន់ប្រយុទ្ធផងដែរ។
គ្រូបង្វឹករបស់អេស្ប៉ាញ លោក Luis Enrique បានប្រាប់ក្រោយការប្រកួតបញ្ចប់ទៅថា៖ «ការស៊ុតបញ្ចូលទី គឺជាបញ្ហាស្មុគស្មាញបំផុត ក្នុងកីឡាបាល់ទាត់។ យើងមានកីឡាករល្អៗ និងខ្សែប្រយុទ្ធឆ្នើមៗ។ គ្រាប់បាល់នឹងកើតមាន។ ខ្ញុំអត់មានការបារម្ភអ្វីទេ»។
ការជជែកជុំវិញកាលវិភាគប្រកួតមមាញឹក ក៏ត្រូវបានរិះគន់ផងដែរ ក្រោយខ្សែការពារ Nathan Ake របស់ហូឡង់ ដែលបច្ចុប្បន្នជាសមាជិករបស់ក្រុមមេឃខៀវ Manchester City បានដើរចេញពីលាន ក្រោយការប្រកួតប្រព្រឹត្តទៅបាន ៥នាទី ដែលទំនងជាមានរបួសសរសៃពួរ។ ក្រោយមកខ្សែការពារអេស្ប៉ាញ Jose Luis Gaya របស់ក្រុម Valencia ក៏ត្រូវបង្ខំចិត្តប្ដូរចេញដែរ។
Sergio Ramos បានចូលលេងនៅវគ្គទី ២ ដោយធ្វើឱ្យការបង្ហាញខ្លួនជាមួយក្រុមអេស្ប៉ាញរបស់ខ្សែការពារចាស់វស្សារូបនេះ មានចំនួន ១៧៦ ដង ដែលស្មើនឹងកំណត់ត្រារបស់អ្នកចាំទី Gianluigi Buffon របស់អ៊ីតាលី សម្រាប់វត្តមានជាមួយក្រុមជម្រើសជាតិ ក្នុងនាមជាកីឡាករនៅតំបន់អឺរ៉ុប។
ហូឡង់ និងអេស្ប៉ាញ ប្រហែលជានឹងស្ថិតក្នុងចំណោមក្រុមដែលមានសិទ្ធិឈ្នះពានលំដាប់ទី ២ នៅឯព្រឹត្តិការណ៍ប្រកួតប្រជែងជើងឯកអឺរ៉ុប ដែលពេលនេះត្រូវលើកយកទៅរៀបចំនៅរដូវក្ដៅឆ្នាំក្រោយ ខណៈពួកគេ កំពុងសង្ឃឹមថា កីឡាករក្មេងៗមានទេពកោសល្យមួយចំនួន គ្រប់អាយុទាន់ពេលតែម្ដង។
តែក្រុមនីមួយៗ កំពុងត្រូវការជ័យជម្នះដូចគ្នា ដើម្បីធ្វើការប៉ះប៉ូវ នាពេលនេះ ដោយសារអេស្ប៉ាញ ទើបចាញ់អ៊ុយក្រែន ១-០ កាលពីខែមុន ខណៈហូឡង់ ចាប់ផ្ដើមក្រោមការដឹកនាំរបស់លោក De Boer ជាមួយបរាជ័យ ២លើក និងស្មើ ២ ដង៕ AFP/VN