ភ្នំពេញ៖ ថ្នាក់ដឹកនាំរបស់សហព័ន្ធកីឡាប្រដាល់សកលកម្ពុជា និងគណៈកម្មាធិការជាតិអូឡាំពិកកម្ពុជា (NOCC) មានការរំពឹងថា អត្តពលិកឆ្នើមទាំង ៣ នាក់ ដែលបានចេញទៅហ្វឹកហាត់នៅប្រទេស ជប៉ុន កាលពីថ្ងៃចន្ទម្សិលមិញ អាចនឹងពង្រឹងសមត្ថភាពរបស់ពួកគេឲ្យកាន់តែបានល្អថែមទៀត ដើម្បីប្រជែងយកមេដាយក្នុងការប្រកួតស៊ីហ្គេម នៅប្រទេស ហ្វីលីពីន នាចុងខែវិច្ឆិកា និងដើមខែធ្នូ ឆ្នាំ ២០១៩ ខាងមុខនេះ។
កីឡាករទម្ងន់ ៥៦ គីឡូក្រាម ណាត សៀកនិន ដែលគេស្គាល់ថា ជា ពេជ្រ ម្ទេសខ្មាំង ព្រមទាំងកីឡាការិនី វី ស្រីខួច មានទម្ងន់ ៦០ គីឡូក្រាម កីឡាការិនីទម្ងន់ ៥១ គីឡូក្រាម នូវ ស្រីពៅ និងគ្រូបង្វឹកជម្រើសជាតិប្រដាល់សកលចាស់វស្សា លោក វ៉ែន សុផល បានធ្វើដំណើរទៅកាន់ប្រទេស ជប៉ុន កាលពីថ្ងៃចន្ទម្សិលមិញ ដើម្បីធ្វើការហ្វឹកហាត់នៅទីនោះរយៈពេល ៣ ខែ។
នៅក្នុងជំនួបសំណេះសំណាល កាលពីចុងសប្តាហ៍មុននេះ លោក វេជ្ជបណ្ឌិត ឆឹង យ៉ៅយ៉េន ប្រធានសហព័ន្ធកីឡាប្រដាល់សកលកម្ពុជា បានឲ្យដឹងថា ប្រដាល់សកលកម្ពុជាទទួលបានការសហការឧបត្ថម្ភពីសហព័ន្ធប្រដាល់សកលនៃប្រទេស ជប៉ុន រយៈពេល ៣ ខែ ដើម្បីហាត់បំប៉នបច្ចេកទេសពីគ្រូជំនាញៗ នៅទីនោះ គឺពួកគាត់នឹងហ្វឹកហាត់នៅជប៉ុន រហូតដល់ថ្ងៃចេញទៅប្រកួតស៊ីហ្គេម នៅប្រទេស ហ្វីលីពីន តែម្តង ដោយមិនត្រឡប់មកប្រទេស កម្ពុជា ឡើយ។
លោកបានបន្តថា៖ «តាមកម្មវិធីពួកគាត់នឹងហ្វឹហាត់នៅទីក្រុងអូសាកា តាមរយៈ MoU រវាងសហព័ន្ធកីឡាប្រដាល់សកលកម្ពុជា និងក្លិបប្រដាល់មួយរបស់ជប៉ុននៅអូសាកា ដែលនៅក្រោមសហព័ន្ធប្រដាល់សកលប្រទេស ជប៉ុន។ ក្លិបនោះ គេបានផ្ដល់អាហារូបករណ៍ សម្រាប់ការហ្វឹកហាត់នេះទាំងសោហ៊ុយ ការធ្វើដំណើរ ហូបចុក និងស្នាក់នៅ ក្នុងអំឡុងហ្វឹកហាត់នេះ។ បន្ថែមលើនេះ គេក៏បានសន្យាផ្ដល់ដល់កម្ពុជានូវសម្ភារហ្វឹកហាត់ និងផលប្រយោជន៍ជាច្រើនទៀត ដល់ប្រដាល់សកលកម្ពុជា ដើម្បីស្តារមុខមាត់ឈ្នះមេដាយលើឆាកអន្តរជាតិឡើងវិញ»។
លោកវេជ្ជបណ្ឌិត ឆឹង យ៉ៅយ៉េន បានបញ្ជាក់ថា៖ «កីឡាករ និងកីឡាការិនីទាំង ៣ នាក់ ដែលយើងបានជ្រើសរើសបញ្ជូនឲ្យទៅហ្វឹកហាត់នៅប្រទេស ជប៉ុន លើកនេះ គឺពួកគេសុទ្ធតែជាអត្តពលិកឆ្នើម មានបទពិសោធ និងជាទីសង្ឃឹមក្នុងការដណ្ដើមបានមេដាយពីការប្រកួតស៊ីហ្គេម ឆ្នាំ ២០១៩ នេះ»។
ចំណែកលោកឧត្តមសេនីយ៍ឯក តែម ម៉ឺន អគ្គលេខាធិការរង NOCC និងជាប្រធានសហព័ន្ធកីឡាប្រដាល់គុនខ្មែរ បានប្រាប់ទៅអត្តពលិកទាំង ៣ នាក់ឲ្យខិតខំហ្វឹកហាត់ និងរក្សាទម្ងន់ ឲ្យបានល្អតាមការកំណត់ ព្រោះការចាញ់ដោយស្វ័យប្រវត្តិ ដោយសាររក្សាទម្ងន់មិនបាននេះគឺជាការចាញ់ដោយអាម៉ាស់។
លោកបញ្ជាក់ថា៖ «ការចេញទៅហាត់នេះ ត្រូវរក្សាវិន័យ និងកិត្តិយសជាខ្មែរឲ្យបានជាដាច់ខាត ពិសេសបេក្ខភាពកីឡាការិនី វី ស្រីខួច និង នូវ ស្រីពៅ ព្រោះអ្នកទាំង ២ ជាបេក្ខនារីប្រដាល់ឆ្នើមបំផុត ដែលសង្ឃឹមខ្ពស់ ក្នុងការឈ្នះមេដាយ។ ចំណែក ពេជ្រ ម្ទេសខ្លាំង ទោះជាល្អ ប៉ុន្តែគេនឹងជួបឧបសគ្គធំ ព្រោះប្រដាល់សកលផ្នែកបុរស មានប្រទេសជាច្រើន មានប្រៀបល្អជាងយើង ដូចជាម្ចាស់ផ្ទះ ហ្វីលីពីន និងថៃ ជាដើម»។
សម្រាប់ការចេញទៅហ្វឹកហាត់នៅប្រទេស ជប៉ុន នេះដែរ លោក Cassey Barnet នាយកវិទ្យាស្ថានខេមអេដ បានជួយឧបត្ថម្ភដល់កីឡាករ កីឡាការិនី និងគ្រូបង្វឹក នូវប្រាក់ចំនួន ១ ០០០ ដុល្លារ ចំណែកលោក តែម ម៉ឺន លោក ហូ គឹមសៀន សមាជិកគណៈកម្មការទ្រទ្រង់សហព័ន្ធ និងលោក ហេង សុឃន បានជួយម្នាក់ ២០០ ដុល្លារ ខណៈលោក ឆឹង យ៉ៅយ៉េន ជូន ១ លានរៀល ហើយក៏មានសប្បុរសជនមួយចំនួនទៀត បានចូលរួមជួយឧបត្ថម្ភផងដែរ ព្រោះអ្នកទាំងនេះសុទ្ធតែចង់ឃើញ ក្រុមប្រដាល់សកលកម្ពុជា ដណ្តើមបានមេដាយ នៅស៊ីហ្គេម លើកនេះ៕