ភ្នំពេញ៖ អ្នកប្រដាល់ធ្លាប់ឈ្នះខ្សែក្រវាត់ ៨ ស្ថាប័ន ឡុង សុភី បានបុកជង្គង់ផ្តួនៗចំនួន ៨ លើក បណ្តាលឱ្យ ផាន់ គ្រាន់ សន្លប់ក្នុងទឹកទី១ នៅវគ្គផ្តាច់ព្រ័ត្រ ដើម្បីក្លាយជាម្ចាស់ប្រាក់លានចំនួន ៣,៤ លានរៀលនៅលើសង្វៀនថោនកាលពីថ្ងៃអាទិត្យ ប៉ុន្តែការសម្រេចឱ្យ សុភី ឈ្នះ មាជ សុខរ៉ា ជាឯកច្ឆន្ទ ៥-០ នៅវគ្គជម្រុះ ៣ ទឹក បានបន្សល់ទុកនូវភាពចម្រូងចម្រាស និងរិះគន់ខ្លាំងពីអ្នកទស្សនា ហើយអ្នកគ្រប់គ្រងការប្រកួត និងម្ចាស់ឧបត្ថម្ភកម្មវិធី សុទ្ធតែស្នើឱ្យសហព័ន្ធកីឡាប្រដាល់គុនខ្មែរពិនិត្យឡើងវិញ និងពន្យល់ពីការដាក់ពិន្ទុរបស់ចៅក្រមទាំង ៥ នាក់នេះ។
លោក ជួប វុត្ថា អ្នកផ្គូផ្គងកីឡាករនៅសង្វៀនថោនបាននិយាយថា៖ «ខ្ញុំមិនមែនជាអ្នកបច្ចេកទេសទេ ប៉ុន្តែខ្ញុំមើលដោយភ្នែកផ្ទាល់ ឃើញដូចមហាជនដែរ គឺឃើញ មាជ សុខរ៉ា ឈ្នះ ឡុង សុភី តែលទ្ធផលផ្ទុយពីនេះទៅវិញ។
ចំណែកខាងស្ពនស័រគាត់មិនអស់ចិត្ត ដោយសុំឱ្យស្ថានីយពន្យល់ ហើយខ្ញុំបានពិភាក្សានឹងថ្នាក់ដឹកនាំ ដោយបានថតចម្លងការប្រកួតនេះ ជូនទៅថ្នាក់ដឹកសហព័ន្ធ ដើម្បីមានបច្ចេកទេសឆ្លើយតបជូនវិញ តើមានអ្វីនៅពីក្រោយរឿងនេះ?
ចំណែក មាជ សុខរ៉ា និយាយថា៖ «ខ្ញុំមិនតវ៉ាទេ នាំគណៈកម្មការ ឬចៅក្រម ស្អប់ខ្ញុំ ព្រោះលទ្ធផលគេឱ្យខ្ញុំចាញ់ទៅហើយ ប៉ុន្តែអ្នកចេះមើលប្រដាល់ គេដឹង គេយល់ថា ខ្ញុំឈ្នះ ហើយសូម្បីតែ ឡុង សុភី ខ្លួនឯងដែលបែកក្រដាសក្រចៀក ដោយកណ្តាប់ដៃរបស់ខ្ញុំ ក៏គ្មានសង្ឃឹម និងជំនឿឈ្នះខ្ញុំដែរ។ រឿងនេះ ខ្ញុំយល់ថា មានគ្រូធំ (មាស សុខគ្រី) នៅពីក្រោយចៅក្រម ដែលមានចេតនាចង់ឱ្យខ្ញុំចាញ់ ជាការឈ្នានីស ព្រោះពីមុនខ្ញុំធ្លាប់នៅជាមួយគាត់ តែបន្ទាប់មកខ្ញុំសុំផ្លាស់ចេញមកនៅក្លិបផ្សេង»។
លោក ស្វាយ សុខុន គ្រូបង្វឹក មាជ សុខរ៉ា និយាយថា៖ «ខ្ញុំមានទម្លាប់មិនចូលចិត្តតវ៉ា នៅពេលកូនសិស្សប្រកួតចាញ់គេនោះទេ ព្រោះយល់ថា មន្ត្រីសហព័ន្ធ ជាម៉ែ ជាឪរបស់កីឡាករ និងក្លិប ប៉ុន្តែពេលនេះដូចជាជ្រុលពេក ហើយខ្ញុំសុំឱ្យមានការពន្យល់ផង ព្រោះពិន្ទុដែលផ្តល់ឱ្យ មាជ សុខរ៉ា ចាញ់ ឡុង សុភី ៥-០ វាទំនងដូចណាត់គ្នាមុនអ៊ីចឹង ហើយការធ្វើបែបនេះ នាំឱ្យកីឡាករបាក់ទឹកចិត្ត ហេតុនេះខ្ញុំបានស្នើសុំឱ្យសហព័ន្ធ មេត្តាចាក់វីដេអូឡើងវិញ ដើម្បីត្រួតពិនិត្យ និងវាយតម្លៃពីកម្រិតយល់ដឹងរបស់ចៅក្រមទាំង ៥ នោះផង និងជួយពន្យល់ឱ្យមហាជនបានយល់ផង»។
លោក និន ភិរម្យ អនុប្រធានសហព័ន្ធកីឡាប្រដាល់គុនខ្មែរបានប្រាប់ថា៖ «ខ្ញុំទទួលបានការស្នើសុំពីខាងសង្វៀនថោនរួចហើយ ពីលទ្ធផលដែល ឡុង សុភី ឈ្នះ មាជ សុខរ៉ា ដោយមិនប្រក្រតី។ ខ្ញុំបានមើលសាចុះ សាឡើងនៃការប្រកួតនោះ ហើយតាមទស្សនៈយល់ឃើញរបស់ខ្ញុំ គឺ ម៉ាជ សុខរ៉ា មានប្រៀបក្នុងទឹកទី១ និងទឹកទី៣ ឯទឹកទី២ ឡុង សុភី មានប្រៀបវិញ»។
លោកបញ្ជាក់ថា៖ «ខ្ញុំមើលដោយភ្នែកខ្ញុំផ្ទាល់ និងដោយតម្លាភាព គ្មានលម្អៀង ឃើញថា មាជ សុខរ៉ា ឈ្នះ ហើយខ្ញុំបានស្នើសុំទៅគណៈកម្មការវិនិច្ឆ័យ ដើម្បីពិនិត្យមើលពិន្ទុចៅក្រមទាំង ៥ គឺចេញលទ្ធផលដូចៗគ្នាទាំងអស់ គឺសរុបពិន្ទុ ឡុង សុភី ៥៩ មាជ សុខរ៉ា ៥៨ ក្នុងនោះទឹកទី១ ចៅក្រមឱ្យ មាជ សុខរ៉ា ឈ្នះ ចំណែកទឹកទី២ និងទឹកទី៣ ឡុង សុភី ឈ្នះ គឺចៅក្រមឱ្យដូចគ្នាទាំងអស់ ដូចណាត់គ្នា ប៉ុន្តែយើងមិនដឹងថា ចៅក្រមទាំង ៥ នោះ យល់ដឹងកម្រិតណា? អ៊ីចឹងចាំមើលគាត់នឹងឆ្លើយតបចំពោះការដាក់ពិន្ទុនេះដូចម្តេច?»។
ចំពោះចៅក្រមទាំង ៥ នាក់ ដែលផ្តល់ពិន្ទុក្នុងគូនេះ មាន លោក ហ៊ិន សៃហេង លោក រឿង សារុន លោក ពៅ ប៊ុនណា និងលោក សៅ ប៊ុននឿន។ រីឯតំណាងអ្នកឧបត្ថម្ភកម្មវិធីបានប្រាប់ដោយមិនបញ្ចេញឈ្មោះថា៖ «ការសម្រេចឱ្យ ឡុង សុភី ឈ្នះ មាជ សុខរ៉ា ៥-០ ធ្វើឱ្យប៉ះពាល់អារម្មណ៍អ្នកទស្សនាខ្លាំងណាស់ ហេតុនេះយើងស្នើសុំឱ្យមន្ត្រីបច្ចេកទេសសហព័ន្ធជួយពន្យល់ផង តើហេតុអ្វី?»៕