.jpg)
ទូច ដេវីត និង ធា វាសនា ពេលឡើងទទួលប្រាក់រង្វាន់ នៅក្រោយការប្រកួតវគ្គផ្តាច់ព្រ័ត្រ។ រូបថត សហការី
ភ្នំពេញ៖ បេក្ខភាពដែលត្រូវបានគេមើលរំលងសមត្ថភាពថា មិនអាចនឹងឆ្លងផុតការប្រកួតវគ្គជម្រុះត្រឹម ៣ ទឹក ធា វាសនា បែរជាអាចយកឈ្នះលើជើងខ្លាំង ឡូញ វណ្ណឌី និងបន្តឈ្នះ ទូច ដេវីត ដើម្បីឈ្នះបានប្រាក់រង្វាន់ចំនួន ៣,៤ លានរៀល ពីការប្រកួតដណ្តើមប្រាក់លាន ទម្ងន់ ៦០ គ.ក្រ នៅលើសង្វៀនថោន។
ជ័យជម្នះរបស់ ធា វាសនា សម្រាប់ការប្រកួតកាលពីថ្ងៃអាទិត្យកន្លងមកនេះ ពិតជាធ្វើឱ្យមានការចាប់អារម្មណ៍ខ្លាំង ព្រោះនៅមុនពេលប្រកួតទាំងអ្នកទស្សនា និងគណៈកម្មការផ្គូផ្គងសុទ្ធតែមើលរំលងពីសមត្ថភាពរបស់ ធា វាសនា ដោយចាប់អារម្មណ៍ និងផ្តល់ភាពជឿជាក់តែទៅលើបេក្ខភាព ទូច ដេវីត, ព្រឿង សុជាតិ និង ឡូញ វណ្ណឌី ថាអាចនឹងមានម្នាក់ក្នុងចំណោមពួកគេទទួលបានប្រាក់លានលើកនេះ។
នៅក្រោយពេលឈ្នះបានប្រាក់រង្វាន់ចំនួន ៣,៤ លានរៀលនេះ ធា វាសនា បានប្រាប់ថា៖ ពីដំបូងខ្ញុំញញើត ព្រោះគេជាជើងចាស់ជាងខ្ញុំ ហើយខ្ញុំរំពឹង និងតាំងចិត្តមុតមាំថា ប្រឹងអស់ពីសមត្ថភាពដើម្បីឈ្នះ ប៉ុន្តែខ្ញុំមិនហ៊ាននិយាយមុនប្រកួតទេ កុំឱ្យពេលចាញ់ គេថាខ្ញុំអួត»។
សិស្សគណក្លិបរាជសីហ៍ខេត្តរតនគិរី ធា វាសនា ដែលបានឈ្នះរង្វាន់ធំ ជាលើកដំបូង ក្នុងអាជីពនោះ បានប្រាប់បន្ថែមថា៖ «នេះជាប្រាក់រង្វាន់ធំ សម្រាប់អាជីពប្រដាល់របស់ខ្ញុំ ហើយបើមានប្រកួតក្នុងព្រឹត្តិការណ៍ធំៗ ដណ្តើមខ្សែក្រវាត់ក្នុងប្រភេទទម្ងន់ ៦០ គ.ក្រ ខ្ញុំនឹងសុំចូលរួមប្រកួត ដើម្បីដណ្តើមឱ្យបាន»។
តាមរយៈការប្រកួតកាលពីថ្ងៃអាទិត្យនោះ ធា វាសនា បានយកឈ្នះ ឡូញ វណ្ណឌី ដោយពិន្ទុ ៤-១ នៅវគ្គជម្រុះ ៣ ទឹក ស្របពេល ទូច ដេវីត បានយកឈ្នះលើជើងខ្លាំង ព្រឿង សុជាតិ ដោយពិន្ទុ ៤-១ ដូចគ្នា ហើយការប្រកួតវគ្គផ្តាច់ព្រ័ត្រ ដែលមាន ៣ ទឹកដែរនោះ ធា វាសនា ត្រូវបានចៅក្រមទាំង ៥ នាក់ សម្រេចផ្តល់ពិន្ទុឱ្យឈ្នះ ទូច ដេវីត ជាឯកច្ឆន្ទ ៥-០ ដើម្បីក្លាយជាម្ចាស់ជើងឯក។
យ៉ាងណាក៏ដោយ ជ័យជម្នះរបស់ ធា វាសនា វាកើតឡើងដោយសារតែ ទូច ដេវីត បានបង្កើតកំហុសនៅពេលប្រកួតដោយរូបគេបានវាយថែមខុសលក្ខខណ្ឌ និងត្រូវបានអាជ្ញាកណ្តាលចាប់ពិន័យ និងដកពិន្ទុរហូតដល់ ២ លើក នៅក្នុងទឹកទី៣ ចុងក្រោយ ប៉ុន្តែបើសិនគ្មានករណីនេះកើតឡើងទេនោះ អ្នកឈ្នះអាចជា ទូច ដេវីត ទៅវិញទេ។
ទូច ដេវីត បាននិយាយក្រោយការប្រកួតថា៖ «ការជួប ធា វាសនា ខ្ញុំវ៉ៃទាំងកំហឹង ធ្វើឱ្យការវ៉ៃរបស់យើងអត់ល្អមើល ហើយពិន្ទុយើងឈ្នះ តែគេកាត់ពិន្ទុយើង។ នៅពេលប៉ះកីឡាករផ្សេង ខ្ញុំវ៉ៃធម្មតា ប៉ុន្តែពេលជួប ធា វាសនា គឺមានចិត្តខឹងគាត់តិចតួច ព្រោះគាត់និយាយដាក់យើងរាងលើសថា យើងអត់ដែលឈ្នះគាត់ គឺឈឺចិត្តត្រង់ហ្នឹង»។
យ៉ាងណាក៏ដោយ ក្រោយការបង្កើតកំហុសកើតចេញពីការប្រើកំហឹងនាំឱ្យចាញ់ ធា វាសនា នេះ ទូច ដេវីត មានការភ្ញាក់ខ្លួន និងបានសុំទោសដល់គ្រូបង្វឹក ហើយសន្យាថា ឈប់ធ្វើរឿងបែបនេះទៀត។ ទូច ដេវីត បានបញ្ជាក់ថា៖ «សម្រាប់ការប្រកួតនៅលើកក្រោយៗទៀត ខ្ញុំធានាថា នឹងទប់អារម្មណ៍ខ្លួនឯងឱ្យបានមិនវ៉ៃទាំងខឹង ទាំងពុះកញ្ជ្រោលបែបនេះទៀតទេ ហើយខ្ញុំសូមទោសដល់អ្នកគាំទ្រ ជាពិសេសលោកគ្រូរបស់ខ្ញុំ ដែលគាត់ជឿទុកចិត្តថា ខ្ញុំនឹងបានប្រាក់លាននៅសប្តាហ៍នេះ ប៉ុន្តែខ្ញុំធ្វើមិនបានល្អ នៅជុំចុងក្រោយនេះ»៕
