ភ្នំពេញៈ បញ្ហាដ៏រសើបជុំវិញការបាត់ប្រាក់រង្វាន់ចំនួន ១០០ លានរៀលពីសំណាក់ម្ចាស់មេដាយមាសជើងឯកពិភពលោក សំបូរ សុភណ្ឌ ដែលបង្កឲ្យមានការភ្ញាក់ផ្អើលយ៉ាងខ្លាំងនោះត្រូវបានមន្ត្រីជំនាញគ្រប់គ្រងកីឡាលោក អ៊ុក សិទ្ធិជាតិ ជាអគ្គនាយកនៃអគ្គនាយកដ្ឋានកីឡាបានពន្យល់ថាមកពីម្ចាស់ប្រាក់រង្វាន់មានការយល់ច្រឡំ ប៉ុន្តែកាលពីព្រឹកថ្ងៃព្រហស្បតិ៍ម្សិលមិញ សំបូរ សុភណ្ឌ បានមកសុំទោស និងទទួលយកការពិតវិញហើយ។
លោក អ៊ុក សិទ្ធិជាតិ បានប្រាប់ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា៖ «សាម៉ឺខ្លួនក៏ដូចជាសហព័ន្ធមិនដឹងពីទំហំប្រាក់រង្វាន់នេះច្បាស់គឺមានការយល់ច្រឡំ ប៉ុន្តែកាលពីព្រឹកមិញគឺបានជួបគ្នាពន្យល់បញ្ហានេះរួចហើយ ដើម្បីជម្រាបជាសាធារណៈឲ្យមហាជនដឹងឡើងវិញ ព្រោះតាមប្រកាសអន្តរក្រសួងលេខ ៧១៦ តាំងពីឆ្នាំ ២០១៥ គឺប្រាក់រង្វាន់អ្នកឈ្នះជើងឯកពិភពលោកគឺមេដាយមាស ២០ លានរៀល ប្រាក់ ១៦ លានរៀល និងសំរឹទ្ធ ១៣ លានរៀល»។
លោកបានបន្ថែមថា៖ « ចំណែកអ្នកឈ្នះមេដាយពិភពលោកជាលក្ខណៈ Game ដូចជាអូឡាំពិកហ្គេមទើបមេដាយមាសបាន ១២០ លានរៀលប្រាក់ ៨០ លានរៀល និងសំរឹទ្ធ ៦៤ លានរៀល។ ហេតុនេះទឹកប្រាក់ចំនួន ២០ លានរៀលនេះជាការអនុវត្តទៅតាមប្រកាសអន្តរក្រសួងគ្មានបាត់នោះឡើយ»។
ថ្មីៗនេះកីឡាករ សំបូរ សុភណ្ឌ ដែលឈ្នះបានមេដាយមាសនៅក្នុងការប្រកួតកីឡាកាយវប្បកម្មជ្រើសរើសជើងឯកពិភពលោកលើកទី ១០ ឆ្នាំ ២០១៨ (10th WBPF World Bodybuilding and Physique Sports Championships and Congress) នៅថៃកាលពីខែធ្នូ ឆ្នាំ ២០១៨ បានសុំអង្វរឲ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ និងដោះស្រាយទៅនឹងក្រសួងអប់រំ យុវជន និងកីឡាដែលបានកាត់ប្រាក់រង្វាន់របស់ខ្លួនពី ១២០ លានរៀល សល់ត្រឹម ២០ លានរៀល។
សំបូរ សុភណ្ឌ សរសេរបង្ហោះនៅលើហ្វេសប៊ុករបស់ខ្លួនយ៉ាងដូច្នេះថា៖ «ថ្ងៃនេះខ្ញុំបាទមានបញ្ហាដែលទាក់ទងជាមួយនឹងប្រាក់រង្វាន់លើកទឹកចិត្ត ដោយក្រសួងអប់រំបានទម្លាក់ប្រាក់រង្វាន់លើកទឹកចិត្តពី ១២០ លានរៀល នៅសល់តែ ២០ លានរៀលដោយមិនបានបញ្ជាក់ពីមូលហេតុ និងមិនបានប្រាប់អ្នកកីឡាមុនថ្ងៃប្រកួតនោះទេ។ លុះដល់ពេលខ្ញុំបាទប្រកួតរួចទទួលបានមេដាយហើយទើបក្រសួងបានប្រកាសថាទម្លាក់ប្រាក់រង្វាន់លើកទឹកចិត្តទៅវិញ។ ខ្ញុំសូមឲ្យសម្តេចជួយដោះស្រាយបញ្ហានេះឲ្យខ្ញុំបាទផង ពីព្រោះខ្ញុំមិនដឹងថាត្រូវដោះស្រាយបញ្ហានេះដោយវិធីណាទេ»។
លោក អ៊ុក សិទ្ធិជាតិ បានបញ្ជាក់ថា៖ «កន្លងកន្លងមកអ្នកឈ្នះបានមេដាយជើងឯកពិភពលោកលើប្រភេទកីឡាប៉េតង់ វ៉ូវីណាម និងកាយវប្បកម្មនេះដែរ ធ្លាប់ទទួលបានការលើកទឹកចិត្តពីរាជរដ្ឋាភិបាលនូវទំហំប្រាក់រង្វាន់គឺមេដាយមាសបាន ១២០ លានរៀលប្រាក់ ៨០ លានរៀល និងសំរឹទ្ធ ៦៤ លានរៀល ប៉ុន្តែកាលនោះធ្វើតាមករណីពិសេសដោយសម្តេចតេជោនាយករដ្ឋមន្ត្រី មិនមែនធ្វើតាមប្រកាសអន្តរក្រសួង ឬអនុក្រឹត្យនោះទេគឺជាការលើកទឹកចិត្តបន្ថែមរបស់រាជរដ្ឋាភិបាល»។
ចំណែកលោក តឹក ប៊ុនវី អគ្គលេខាធិការសហព័ន្ធកីឡាកាយវប្បកម្មបានប្រាប់ថា៖ «កីឡាករ សំបូរ សុភណ្ឌ មានការយល់ច្រឡំចំពោះប្រាក់រង្វាន់នេះ ប៉ុន្តែកាលពីព្រឹកថ្ងៃព្រហស្បតិ៍បានទៅសុំទោសដល់ថ្នាក់ដឹកនាំនៅអគ្គនាយដ្ឋានកីឡារួចហើយ ហើយថ្នាក់ដឹកនាំក៏មិនប្រកាន់ដែរដោយជួយពន្យល់ ណែនាំ និងជួយសុំប្រាក់រង្វាន់ជាលក្ខណពិសេសបន្ថែមទៀតដើម្បីឲ្យម្ចាស់មេដាយមាសសប្បាយចិត្ត»៕