ព្រីស្ទីណា: អ្នកខ្លះនិយាយថា វាគ្រាន់តែជាការប្រកួតបាល់ទាត់ប៉ុណ្ណោះ តែសម្រាប់ប្រទេសកូសូវ៉ូ ការប្រកួតនេះមានអត្ថន័យលើសពីនោះឆ្ងាយណាស់។
ការប្រកួតនៅថ្ងៃព្រហស្បតិ៍ក្នុងក្រុងស្កុបជេ នៃប្រទេសម៉ាសេដ្វាន មិនត្រឹមតែអាចធ្វើឱ្យកូសូវ៉ូឈាន ១ ជំហានកៀកនឹងព្រឹត្តិការណ៍ Euro 2020 ប៉ុណ្ណោះទេ ថែមទាំងជាឱកាសមួយផងដែរសម្រាប់ប្រជាជនកូសូវ៉ូក្នុងកាលេចមុខ និងត្រូវបានស្គាល់ក្នុងនាមជាប្រទេសឯករាជ្យមួយ។
កូសូវ៉ូ ដែលបានឯករាជ្យពីស៊ែប៊ីក្នុងឆ្នាំ ២០០៨ ត្រូវជួបប្រទេសជិតខាងម៉ាសេដ្វានខាងជើង សម្រាប់ការប្រកួតកាត់ក្ដី (play-off) វគ្គ ១/២ នៃព្រឹត្តិការណ៍ Euro 2020 ហើយការមានជ័យជម្នះនៅក្រុងស្កុបជេនឹងរុញពួកគេឱ្យទៅក្បែរនឹងទីកំពូលរបស់កីឡានេះជាលើកដំបូង។
«ខ្ញុំចង់ឱ្យទង់ជាតិរបស់យើងត្រូវបានលើកឡើងនៅក្នុងចំណោមទង់ជាតិទាំង ២៤ របស់ប្រជាជាតិដ៏ល្អបំផុតនៅតំបន់អឺរ៉ុប»។ នេះជាសម្ដីរបស់និស្សិតចិត្តវិទ្យាវ័យ ២៣ ឆ្នាំ ឈ្មោះ Besart Morina។
ការប្រកួតនេះត្រូវបណ្ដាញសារព័ត៌មានដាក់ចំណងជើងថា «ការប្រកួតដ៏សំខាន់បំផុតក្នុងប្រវត្តិសាស្ត្ររបស់កូសូវ៉ូ» ហើយសូម្បីគ្រូបង្វឹករបស់ក្រុមលោក Bernard Challandes វ័យ ៦៩ ឆ្នាំក៏យល់ថា ការប្រកួតនេះមិនត្រឹមតែជាការប្រកួតបាល់ប៉ុណ្ណោះទេ។
បុរសសញ្ជាតិស្វីសលោក Challandes បានថ្លែងក្នុងសន្និសីទកាសែតថា៖ «យើងកំពុងស្ថិតក្នុងប្រទេសថ្មីមួយ ហើយក្រុមបាល់ទាត់គឺមានសារៈសំខាន់ណាស់សម្រាប់ប្រជាជននៃប្រទេសនេះ»។
ក្រុមជម្រើសជាតិកូសូវ៉ូបានប្រកួតមិនចាញ់រហូតដល់ទៅ ១៥ ដងបន្តបន្ទាប់គ្នា ក្នុងនោះរួមទាំងជំនួបមិត្តភាពអន្តជាតិផងមុននឹងបរាជ័យ ដោយសារក្រុមអង់គ្លេស ៥-៣ ក្នុងខែកញ្ញា ឆ្នាំ ២០១៩។ តែពួកគេបានបញ្ចប់នៅលេខ ៣ ក្នុងពូល ពីក្រោយក្រុមប៊ុលហ្គារី និងក្រុមម៉ុងតេណេ ហ្គ្រោ ទើបមានកៅអីសម្រាប់វគ្គនេះ។
តែយ៉ាងណាទោះក្រុមកូសូវ៉ូឈ្នះនៅថ្ងៃព្រហស្បតិ៍នេះ ក៏នៅមានឧបសគ្គ ១ ទៀតមុនអាចឡើងវគ្គចែកពូល នៅ Euro 2020 ដែលលើកទៅធ្វើឆ្នាំក្រោយ នោះគឺត្រូវឆ្លងកាត់វគ្គកាត់ក្ដីនេះនៅវគ្គផ្ដាច់ព្រ័ត្រសិន ដោយត្រូវតទល់ជាមួយគូរវាងក្រុមហ្សកហ្ស៊ី និងក្រុមបេឡារុស៕ VN