ភ្នំពេញៈ ប្រដាល់គុនខ្មែរដណ្តើមខ្សែក្រវាត់ខារ៉ាបាវរដូវកាលទី ៩ នឹងចាប់ផ្តើមនៅសង្វៀនអាស៊ីអាគ្នេយ៍នាថ្ងៃសៅរ៍ សប្តាហ៍នេះ ខណៈរូបមន្តប្រកួតបានផ្លាស់ប្តូរ ហើយប្រាក់រង្វាន់គឺមានការផ្តល់ជូនតាំងពីចំណាត់ថ្នាក់ពីលេខ ១ ដល់លេខ ៤ គឺខុសពីការប្រកួតមុនៗដែលកំណត់ឲ្យតែអ្នកបានលេខ ១ និងលេខ ២។
ជាមួយគ្នានេះសមាសភាពអ្នកប្រដាល់កម្ពុជា ៤ រូប និងកីឡាករថៃ ៤ រូបត្រូវប្រកួតជម្រុះវិលជុំរវាងកីឡាករកម្ពុជា និងថៃ រួចជ្រើសរើសយកអ្នកមានពិន្ទុខ្ពស់ជាងគេចំនួន ២ នាក់ចេញពីពូលកម្ពុជា និងពូលថៃ ឲ្យឡើងទៅប្រកួតក្នុងវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ ប៉ុន្តែនៅក្នុងលក្ខខណ្ឌមួយដែលពូលកម្ពុជា ឬពូលថៃប្រកួតចាញ់ទាំងអស់គឺគណៈកម្មការនឹងកំណត់យកពូលដែលឈ្នះទាំងអស់ឲ្យឡើងទៅវគ្គ ១/២ ផ្តាច់ព្រ័ត្រទាំង ៤ នាក់ដោយទម្លាក់កីឡាករក្នុងពេលចាញ់ទាំង ៤ នាក់ទាំងអស់តែម្តង។
លោក ញាន សុធី នាយកគ្រប់គ្រងកម្មវិធីប្រចាំសង្វៀនអាស៊ីអាគ្នេយ៍បានប្រាប់ថាការប្រកួតនឹងចាប់ផ្តើមពីថ្ងៃសៅរ៍ ទី ១១ ខែឧសភា ដល់ថ្ងៃសៅរ៍ទី ៣ ខែសីហា ឆ្នាំ ២០១៩ ហើយសមាសភាពអ្នកប្រដាល់កម្ពុជាចំនួន ៤ នាក់ក្នុងទម្ងន់ ៦០ គីឡូក្រាម និងកីឡាករថៃ ៤ នាក់ត្រូវប្រកួតប្រជែងគ្នាដើម្បីក្លាយជាម្ចាស់ខ្សែក្រវាត់ ខណៈអ្នកលេខ ១ នឹងទទួលបានខ្សែក្រវាត់ និងពាន ព្រមទាំងថវិកាចំនួន ៤០០០ ដុល្លារ លេខ ២ បានពាន ១ និងថវិកា ២៥០០ ដុល្លារ លេខ ៣ បានពាន ១ និងរង្វាន់អម ១៥០០ ដុល្លារ និងអ្នកបានលេខ ៤ បានពាន ១ និងថវិកា ១០០០ ដុល្លារ។
អ្វីដែលប្លែកជាងលើកមុនៗគឺមានបន្ថែមការប្រកួតវគ្គពាក់កណ្តាលផ្តាច់ព្រ័ត្រ ដោយយកកីឡាករខ្មែរ ២ និងថៃ ២ នាក់ចេញពីការប្រកួតជម្រុះវិលជុំឲ្យឡើងទៅប្រកួតខ្វែងនៅវគ្គពាក់កណ្តាលផ្តាច់ព្រ័ត្ររួចយកអ្នកឈ្នះ និងអ្នកឈ្នះ ឡើងទៅវគ្គផ្តាច់ព្រ័ត្រ គឺទោះបីខ្មែរប៉ះខ្មែរ ឬថៃប៉ះថៃក៏បានដែរ ឯអ្នកចាញ់ទាំង ២ នាក់ត្រូវប្រកួតគ្នាដណ្តើមយកលេខ ៣ និងលេខ ៤។ ផ្ទុយពីការប្រកួតមុនដែលកំណត់យកតែអ្នកលេខ ១ ពូលកម្ពុជា និងលេខ ១ ពូលថៃឲ្យឡើងទៅវគ្គពាក់កណ្តាលផ្តាច់ព្រ័ត្រ ហើយក្នុងនោះអ្នកម្ចាស់ខ្សែក្រវាត់ទទួលបានថវិកា ៥០០០ ដុល្លារ និងអ្នកលេខ ២ បាន ៣០០០ ដុល្លារដោយគ្មានប្រាក់រង្វាន់លេខ ៣ និងលេខ ៤ ទេ។
ចំពោះបេក្ខភាពកីឡាករកម្ពុជាទាំង ៤ នាក់ដែលត្រូវដាក់ឲ្យប្រកួតដណ្តើមខ្សែក្រវាត់ខារ៉ាបាវរដូវកាលទី ៩ នេះមាន វៀត ប៊ុនឌឿន មកពីសមាគមប្រដាល់ក្រសួងការពារជាតិ កីឡាករ សុខ សាវិន មកពីក្លិបឆ្មាសសែនសុខ កីឡាករ ចាន់ សំអាត ក្លិបអប់រំកាយស្រុកអន្លង់វែងខេត្តឧត្តរមានជ័យ និងកីឡាករ សូត្រ ប៊ុនធី ក្លិបបក្សីស្លាបដែក។ ចំណែកពូលខាងកីឡាករថៃវិញមានកីឡាករ ខាន់ ទេព (Khan Tep) កីឡាករ ភុត ផាតណយ (Phut Phat Noy) កីឡាករ ឆៃ យ៉រ៍ (Chhai Yor) និង Super Pek។
តាមលក្ខខណ្ឌប្រកួតត្រូវបានមន្ត្រីបច្ចេកទេសលោក រាជ សុផែន និយាយថា៖ «នៅក្នុងការប្រកួតវគ្គជម្រុះគឺកីឡាករម្នាក់ៗវ៉ៃចំនួន ៤ ប្រកួតហើយវគ្គពាក់កណ្តាលផ្តាច់ព្រ័ត្រ កីឡាករកម្ពុជា និងកម្ពុជា ឬកីឡាករថៃ និងថៃ មិនប៉ះប្រកួតគ្នាទេគឺលើកលែងតែឈានចូលដល់វគ្គផ្តាច់ព្រ័ត្រដែលយើងមិនអាចកំណត់បាន ព្រោះវាអាស្រ័យទៅលើលទ្ធផលនៃការប្រកួតជាក់ស្តែងនៅវគ្គពាក់កណ្តាលផ្តាច់ព្រ័ត្រ»៕