.jpg)
ទិត្យ សុវណ្ណគិរី បានម៉ាត់ទៅលើកីឡាករ ពិល រ័ត្ន មុនវាយកែងឲ្យសន្លប់។ រូបថត ពន្លក
ភ្នំពេញ៖ ការប្រកួតជម្រុះដណ្តើមពានរង្វាន់ TV5 Boxing Knock Out Serie បានរកឃើញអ្នកឈ្នះទាំង ១៦ នាក់ សម្រាប់ឡើងទៅប្រកួតនៅជុំទី ២ ជាផ្លូវការហើយ បន្ទាប់ពីការប្រកួតជម្រុះជុំទី ១ ឬវគ្គ ៣២ នាក់ដំបូង បានបញ្ចប់កាលពីថ្ងៃសៅរ៍។
តាមរយៈការប្រកួតជម្រុះជុំទី ១ ដែលមិនសូវគិតពីសមត្ថភាពជាចម្បង គឺឲ្យតែមានទម្ងន់ ៦០ គីឡូក្រាមដូចគ្នានេះ កីឡាករជើងចាស់ ទិត្យ សុវណ្ណគិរី និង ទូច ដាវីត បានក្លាយជាបេក្ខភាពចុងក្រោយ ដែលបានឆ្លងផុតវគ្គនេះ បន្ទាប់ពីអ្នកទាំង ២ បានទម្លាក់ ពិល រ័ត្ន និង កុយ ចាន់តូ កាលពីថ្ងៃសៅរ៍។
នៅក្នុងការប្រកួតនោះ ទិត្យ សុវណ្ណគិរី របស់សមាគមប្រដាល់ក្រសួងកសិកម្ម បានប្រើកែងផ្ដួលអ្នកប្រដាល់ជើងថ្មី ពិល រ័ត្ន មកពីក្លិបពន្លឺសាមគ្គីខេត្តបាត់ដំបង ឲ្យសន្លប់នៅទឹកទី ២ ចំណែកអ្នកប្រដាល់ ទូច ដាវីត មកពីក្លិបអរុណរះកីឡា ក៏បានផ្តួលកីឡាករ កុយ ចាន់តូ របស់ក្លិបគីសែមានរិទ្ធអាវុធគីមី ឲ្យសន្លប់ត្រឹមទឹកទី ១ ផងដែរ។
ដោយឡែកកីឡាករចំនួន ១៤ នាក់ទៀត ដែលបានឈ្នះកៅអី ឡើងទៅប្រកួតនៅវគ្គ ១៦ នាក់ចុងក្រោយនេះដែរ រួមមាន រ៉ែម រាជ មកពីក្លិបអង្គរមានជ័យខេត្តសៀមរាប កីឡាករ លន់ សៀកឡេង របស់ក្លិបថ្នល់ទទឹងគុនខ្មែរខេត្តកណ្តាល កីឡាករ សូត្រ ខេវិន ក្លិបបក្សីស្លាបដែកនៃសមាគមប្រដាល់ក្រសួងមហាផ្ទៃ ចិត្រ សុភី មកពីក្លិបរស្មីភូមិគាបខេត្តបន្ទាយមានជ័យ ភួង ពិសិដ្ឋ ក្លិបរាជសីហ៍ខេត្តរតនគិរី។
កីឡាករ ព្រឿង សុជាតិ មកពីក្លិបកងពលធំអន្តរាគមន៍លេខ ២ កីឡាករ លាភ រដ្ឋា មកពីក្លិបដីឡូត៍មានរិទ្ធខេត្តបន្ទាយមានជ័យ អ្នកប្រដាល់ ណាម ម៉ូរ៉ាក់ ក្លិបពន្លឺសាមគ្គីខេត្តបាត់ដំបង ស៊ន រ៉ាគីម ក្លិបរាហ៊ូកីឡាខេត្តបាត់ដំបង ស៊ឹម ប៊ុនឆៃ ក្លិបព្រៃទទឹងកីឡាខេត្តបាត់ដំបង កីឡាករ កូយ ឡាយ ក្លិបកងពលតូចទ័ពឆត្រយោង ៩១១ រឿន ឈី ក្លិបគុហារព្រហ្មជ័យខេត្តសៀមរាប កីឡាករ ខាំ សូរិយា មកពីក្លិបរ៉ាហាប់ស្វាយប៉ាក និងកីឡាករ ឡុង ជិន ក្លិបខ្លារខិនមានរិទ្ធរបស់សមាគមប្រដាល់ក្រសួងមហាផ្ទៃ។
សម្រាប់កីឡាករឈ្នះទាំង ១៦ រូប ដែលនឹងត្រូវប្រកួតជម្រុះវគ្គទី ២ ជាបន្តទៀតនោះ ត្រូវបានគណៈកម្មការផ្គូផ្គង ធ្វើការវាយតម្លៃទៅតាមរូបមន្តប្រកួតថា កីឡាករខ្លាំងមួយចំនួន នឹងអាចបន្តឈ្នះយ៉ាងស្រួល ព្រោះពួកគេអាចជួបជាមួយដៃគូ ដែលមានសមត្ថភាពខ្សោយជាងដាច់ ប៉ុន្តែកីឡាករខ្លះទៀត អាចឈ្នះដោយសមត្ថភាពពិតផងដែរ គឺខ្លាំងប៉ះខ្លាំង ដែលមានសមត្ថភាពប្រហាក់ប្រហែលគ្នា។
លោក រាជ សុផែន ស្នងការប្រកួតនេះ បានប្រាប់ថា៖ «បើតាមការវាយតម្លៃរបស់ខ្ញុំសមត្ថភាពកីឡាករទាំង ១៦ នាក់ ក្នុងជុំទី ២ នោះ គឺមានកីឡាករល្អៗប្រហែលពាក់កណ្តាល ដែលអាចឈ្នះដៃគូឆ្លងទៅវគ្គជម្រុះជុំទី ៣ ឬជម្រើស ៨ នាក់ចុងក្រោយ ហើយកីឡាករដែលគួរមានទំនុកចិត្តនោះមាន កីឡាករ ទិត្យ សុវណ្ណគិរី, ឡុង ជិន, សូត្រ ខេវិន, ណាម ម៉ូរ់ាក់, ចិត្ត សុភី, កូយ ឡាយ និងកីឡាករ លាភ រដ្ឋា ជាដើម»៕
