.jpg)
ការប្រកួតកង់ភ្នំ ជុំទី ៤ នៅភ្នំប្រសិទិ៍្ធ កន្លងមក ហើយនៅថ្ងៃអាទិត្យ ពួកគេត្រូវប្រកួតជុំផ្តាច់ព្រ័ត្រនៅគិរីរម្យ។ ណន
ភ្នំពេញៈ ផ្លូវបត់បែនឡើងភ្នំ ចុះភ្នំ គ្របដណ្តប់ទៅដោយបរិយាកាស និងធម្មជាតិដ៏ស្រស់ត្រកាល និងបន្ថែមដោយសម្រស់ទឹកធ្លាក់ជាច្រើនកន្លែង នៅគិរីរម្យ នឹងក្លាយជាទីលានប្រកួតដ៏ល្អបំផុតដែលក្រុមកង់ភ្នំត្រូវធ្វើការប្រកួតជុំផ្តាច់ព្រ័ត្រ នៅថ្ងៃអាទិត្យដើម្បីបូកសរុបពិន្ទុ រកម្ចាស់ជើងឯក ក្នុងការប្រកួតកង់ភ្នំ Cambodia MTB Series 2018។
បើទោះបីជាគិរីរម្យ នៅឆ្ងាយពីភ្នំពេញបន្តិច ប៉ុន្តែមានក្រុមអត្តពលិកជំនាញ និងមិនជំនាញជាង ១២០ នាក់ហើយ បានចុះឈ្មោះចូលរួមការប្រកួតនេះ ហើយអ្នកទាំងនោះ បាននិងកំពុងរង់ចាំការប្រកួតនេះទាំងអន្ទះសា ព្រោះក្រៅពីការប្រកួតប្រជែង ក៏មានការបោះតង់ស្នាក់នៅលក្ខណៈទ្រង់ទ្រាយធំ ចំនួន ១ ថ្ងៃ ១ យប់ នៅលើភ្នំគិរីរម្យ ផងដែរ ដើម្បីត្រៀមការប្រកួត ដែលនឹងត្រូវធ្វើឡើងនៅព្រឹក ថ្ងៃអាទិត្យ។
លោកឧកញ៉ា វង្ស ខាន់ពៅ អគ្គលេខាធិការសហព័ន្ធខ្មែរកីឡាទោចក្រយាន បានថ្លែងប្រាប់ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា៖ «ការប្រកួតជុំទី ៥ ផ្តាច់ព្រ័ត្រនេះ គឺមានលក្ខណពិសេសជាងការប្រកួត ៤ ជុំកន្លងមក ព្រោះយើងមានការបោះតង់ស្នាក់នៅ លើភ្នំគិរីរម្យ នាថ្ងៃសៅរ៍ និងប្រកួតនៅព្រឹកថ្ងៃអាទិត្យ។ គិតត្រឹមថ្ងៃនេះមានអ្នកត្រូវបោះតង់ជាង ៨០ នាក់ ក្នុងចំណោមអ្នកចុះឈ្មោះជាង ១២០ នាក់ ហើយម្នាក់ៗបានបង្ហោះតាមហ្វេសប៊ុក បង្ហាញពីការចាប់អារម្មណ៍ខ្លាំង និងសប្បាយរីករាយ ទៅលើការប្រកួតជុំផ្តាច់ព្រ័ត្រ នៅគិរីរម្យនេះ»។
ក្រុមអត្តពលិក ដែលធ្វើបានល្អ សម្រាប់ការប្រកួត ៤ ជុំ កន្លងមក នៅលើវិញ្ញាសាជំនាញ A1 (ក្រុមជំនាញខ្លាំងបំផុត) A2 (ក្រុមជំនាញខ្លាំង មានពីអាយុ ៣០ ឆ្នាំឡើង) ព្រមទាំង B1 (ក្រុមជំនាញមធ្យមពីអាយុ ១៥ ដល់ ២៩ ឆ្នាំ) និង B2 (ក្រុមជំនាញមធ្យមមានអាយុ ៣០ ឆ្នាំឡើង) នឹងត្រូវធ្វើការប្រកួតប្រជែងគ្នា កាន់តែខ្លាំង ដើម្បីមានពិន្ទុខ្ពស់ជាងគេក្នុងការប្រកួតទាំង ៥ ជុំ នឹងក្លាយជាម្ចាស់ជើងឯកទៅតាមប្រភេទវិញ្ញាសាទាំង ៤ នេះ ហើយក្រៅពីនោះ ក៏មានការប្រកួតនៅលើវិញ្ញាសាមិនជំនាញជាច្រើនទៀត រកអ្នកឈ្នះប្រចាំជុំទី ៥ នេះផងដែរ។
លោក វង្ស ខាន់ពៅ បានបន្ថែមថា៖ «ដោយសារតែការប្រកួត ៤ ជុំកន្លងមក មានពិន្ទុប្រកៀកប្រកិតគ្នា អ៊ីចឹងការប្រកួតជុំទី ៥ ផ្តាច់ព្រ័ត្រនេះ គឺពួកគាត់ នឹងមានការប្រឹងប្រែងប្រកួតគ្នាកាន់តែខ្លាំងដើម្បីក្លាយជាម្ចាស់ជើងឯក ប្រចាំឆ្នាំ ២០១៨ ផង និងឈ្នះជើងឯក ប្រចាំការប្រកួតជុំទី ៥ នេះផង ហើយប្រាក់រង្វាន់ក៏នឹងទទួលបានកាន់តែច្រើន ទៅតាមនោះដែរ»។
ជាមួយគ្នានេះ លោក វង្ស ខាន់ពៅ បានចាត់ទុកគិរីវម្យ គឺជាទីលានប្រកួតដ៏ល្អបំផុត ដែលមានលក្ខណៈស្តង់ដារ មិនចាញ់ទីលានប្រកួតកង់ភ្នំនៅតាមប្រទេសផ្សេងៗនោះទេ ព្រោះក្រុមការងារបច្ចេកទេសរបស់សហព័ន្ធ បានរៀបចំឲ្យមានការប្រកួតឡើងភ្នំ ចុះភ្នំ ឆ្លងកាត់ទឹកជ្រោះ និងកាត់ឧបសគ្គដូចការប្រកួតនៅស៊ីហ្គេមដែរ។
លោកឧកញ៉ា ដែលមានបងប្អួន កូន ក្មួយ សុទ្ធតែជាចូលចិត្តការជិះកង់ និងមានប្រពន្ធជាម្ចាស់មេដាយជើងឯកអាស៊ី រូបនេះ បានបញ្ជាក់ថា៖ «គិរីរម្យ ជាទីលានប្រកួតកង់ភ្នំ ដែលល្អជាងគេនៅស្រុកខ្មែរ ព្រោះអត្តពលិកត្រូវជិះកង់ឡើងភ្នំ ចុះភ្នំ ឆ្លងកាត់ទឹកជ្រោះ និងឆ្លងឧបសគ្គជាច្រើនទៀត គឺមានលក្ខណៈបច្ចេកទេស ដូចគ្នាទៅនឹងការប្រកួតស៊ីហ្គេមដែរ អ៊ីចឹងហើយទើបយកទីតាំងនេះធ្វើជាកន្លែងប្រកួតផ្តាច់ព្រ័ត្រការប្រណាំងកង់ភ្នំរបស់យើង ដើម្បីយើងអាចជ្រើសរើសបាននូវអត្តពលិកមានសមត្ថភាពពិតប្រាកដ សម្រាប់ដាក់ឲ្យហ្វឹកហាត់ នៅក្នុងក្រុមជម្រើសជាតិ»៕
