.jpg)
លោក ហ៊ុន ជា ពេលឡើងប្រគល់ពាន និងមេដាយដល់ម្ចាស់ជយលាភីពូល A។ សហការ
ភ្នំពេញ៖ ព្រឹត្តិការណ៍ប្រណាំងម៉ូតូលក្ខណៈមិត្តភាពវាលឥន្រ្តី លើកទី ៣ ឆ្នាំ ២០២០ ដែលបានប្រព្រឹត្តទៅពេញ ១ ថ្ងៃ នៅវាលឥន្ទ្រី សង្កាត់ចោមចៅ ២ ខណ្ឌពោធិ៍សែនជ័យ កាលពីថ្ងៃអាទិត្យ គឺមានទ្រង់ទ្រាយកាន់តែធំ និងមានមហាជនចូលរួមទស្សនាយ៉ាងច្រើន។
កីឡាករចំនួន ១១០ នាក់ បានចូលរួមប្រណាំង ហើយពួកគេត្រូវបានចែកការប្រកួតជា ៥ ប្រភេទ ឬកម្រិត តាមសមត្ថភាពរៀងៗខ្លួន ហើយតាមការប្រកាសពីគណៈកម្មការរៀបចំបានឲ្យដឹងថា ព្រឹត្តការណ៍នេះរៀបចំឡើងដោយការជួយជ្រោមជ្រែងពីក្រុមប្រណាំងម៉ូតូស្ម័គ្រចិត្តមកពីច្រើនខេត្ត និងរាជធានីភ្នំពេញ អាជ្ញាធរមូលដ្ឋាន និង លោក ហ៊ុន ជា ព្រមទាំងមានការឧបត្ថម្ភថវិកាពីប្រេងរំអិលចំនួន ៣ និងសប្បុរសជនដែលស្រឡាញ់ការប្រណាំងម៉ូតូនេះ។
លោក ពេជ្រ សុខា ប្រធានគ្រប់គ្រងការប្រកួតបានប្រាប់ភ្នំពេញប៉ុស្តិ៍ថា៖ «ការប្រណាំងម៉ូតូនេះ ជាព្រឹត្តិការណ៍ដ៏ធំមានមហាជនចូលទស្សនាច្រើនជាង ២ ឆ្នាំកន្លងមក ដោយមានបែងចែកជា ៥ កម្រិត ក្នុងនោះពូល A ជាការប្រកួតតាមលក្ខណៈបច្ចេកទេសកម្រិតអាជីព ដែលមានកីឡាករ ១៩ នាក់ចូលប្រកួតគ្នា ដើម្បីយកជយលាភីពីលេខ ១ ដល់លេខ ៥។
លោកបន្តថា៖ «ពីដំបូងការប្រកួតនេះ មានកីឡាករមកចុះឈ្មោះចំនួន ១២០ នាក់ ប៉ុន្តែថ្ងៃប្រកួតជាក់ស្តែងសល់ត្រឹម ១១០ នាក់ ក្នុងនោះមានជនជាតិបរទេសដូចជាបារាំង និងអីស្រាអែលចំនួន ៩ នាក់ផងដែរ ខណៈកម្រិតបច្ចេកទេសរបស់ពួកគាត់ មិនអាចមានប្រៀបលើកីឡាករខ្មែរបាននៅឡើយ។ យ៉ាងណាក៏ដោយ មហាជននិយមចូលចិត្តខ្លាំងទៅលើការប្រណាំងរបស់ពូល A ជាពិសេសវត្តមានកីឡាករឆ្នើមបើកបរក្នុងទេពកោសល្យខ្ពស់ ដូចជាកីឡាករម្ចាស់ជើងឯក ជា លីឃាង នេះតែម្តង»។
ជុំវិញការប្រកួតរបស់ក្រុមពូល A លោក បង់ ស៊ូម អ្នករៀបចំបច្ចេកទេសបានឲ្យដឹងថា យើងមានចែកជាពូលទៅតាមកម្រិតដូចជា ក្មេងតូចៗ វ័យចាស់ និងអ្នកប្រកួតកម្សាន្តសប្បាយ ប៉ុន្តែក្នុងនោះពូល A គឺលេងក្នុងកម្រិតបច្ចេកទេស ដែលមានការណែនាំតាមស្តង់ដា ពីសហព័ន្ធយានយន្តផងដែរ។
លោកបន្តថា នៅក្នុងពូល A កីឡាករទាំង ១៩ នាក់ ត្រូវប្រកួតប្រណាំងចំនួន ១៦ ជុំ នៅលើទីលានមានឧបសគ្គ ហើយតាមរយៈការប្រណាំងពេញ ១ ថ្ងៃ អាទិត្យនេះ កីឡាករពាក់ស្លាកលេខ ១៧ ជា លីឃាង បានជិះមកដល់ទីផ្តាច់ព្រ័ត្រមុនគេ ដើម្បីក្លាយជាម្ចាស់ជើងឯកក្នុងពូល A ចំណែកលេខ ២ បានទៅកីឡាករឈ្មោះ តក់ ពាក់ស្លាកលេខ ៧ លេខ ៣ បានទៅកីឡាករ Boy ពាក់ស្លាកលេខ ៤ លេខ ៤ បានទៅកីឡាករ ញាញ់ វីរៈ ពាក់ស្លាកលេខ ៣ និងលេខ ៥ បានទៅកីឡាករ Lux ពាក់ស្លាកលេខ ៨។
លោក ជា និមល មន្ត្រីសម្របសម្រួលកម្មវិធីបាននិយាយថា៖ «កម្មវិធីឆ្នាំនេះ យើងធ្វើធំជាង ២ ឆ្នាំកន្លងមក ដោយមានការឧបត្ថម្ភពីសប្បុរសជនមាន លោក ហ៊ុន ជា, អាជ្ញាធរ និងក្រុមហ៊ុនប្រេងរំអិលចំនួន ៣ មាន LIQUI MOLY, MAXXIS, និងប្រេងរំអិល MOTUL ព្រមទាំង TOP 1 ជាដើម»។
កីឡាករ ជា លីឃាង ដែលជាម្ចាស់ជើងឯកបាននិយាយថា៖ «ខ្ញុំសម្រាប់ព្រឹត្តិការណ៍ប្រណាំងម៉ូតូលក្ខណៈមិត្តភាពវាលឥន្ទ្រីចំនួន ២ លើកកន្លងមកនេះ ខ្ញុំឈ្នះជើងឯកទាំង ២ លើក ហើយឆ្នាំទី ៣ នេះ ខ្ញុំឈ្នះម្តងទៀត»។
ជាមួយគ្នានោះ នៅក្នុងពិធីបិទការប្រកួត មុនចែកពាននោះ កីឡាករ ជា លីឃាង ត្រូវបានជិះបង្ហាញនូវបច្ចេកទេសបើក និងបង្ហោះម៉ូតូយ៉ាងអស្ចារ្យ ដើម្បីបញ្ចេញសមត្ថភាពជូនអ្នកទស្សនា ហើយលោកបានអះអាងថា៖ «ខ្ញុំឈ្នះចំណាត់ថ្នាក់លេខ ១ ក្នុងព្រឹត្តិការណ៍នានា សរុប ៥ ឆ្នាំជាប់គ្នាមកហើយ»។
លោក ពេជ្រ សុខា ក្នុងនាមជាអ្នករៀបចំកម្មវិធីបានអះអាងថា នៅឆ្នាំក្រោយកម្មវិធីប្រណាំងម៉ូតូលក្ខណៈមិត្តភាពវាលឥន្ទ្រីលើកទី៤ នឹងធ្វើក្នុងលក្ខណៈធំជាអន្តរជាតិ ខណៈឆ្នាំនេះ មានមហាជនចូលមកទស្សនាច្រើនកុះករ ដើម្បីអបអរសាទរនូវសមត្ថភាពកីឡាករជាតិរបស់យើង គឺមានបច្ចេកទេសល្អដូចកីឡាករបរទេសផងដែរ៕
