.jpg)
កីឡាករ អេលីត ចំរើន បានទាត់ទៅលើថៃ Neong Thavat តែជ័យជម្នះងាយពេករបស់គេ ធ្វើឲ្យមានការជាប់សង្ស័យ។ រូប ពន្លក
ភ្នំពេញ៖ កីឡាករថៃទាំង ២ នាក់ សុទ្ធតែបានសន្លប់ ក្រោមស្នៀតកែង និងជង្គង់របស់អ្នកប្រដាល់កម្ពុជា ក្នុងការប្រកួតជម្រុះសន្សំពិន្ទុ ដណ្តើមខ្សែក្រវាត់ KIC នៅសង្វៀន ONE TV កាលពីយប់ថ្ងៃអាទិត្យ ក្នុងនោះ Khav Krachang ដែលសន្លប់ក្រោមស្នៀតកែងរបស់ ម៉ន សាម៉េត ក្នុងទឹកទី២ ត្រូវបានគេឃើញថា ហាក់បីដូចទំនង ព្រោះកម្លាំងនៃស្នៀតកែងវាយប្តូរនោះធ្ងន់ និងចំគោលដៅល្អ។
ប៉ុន្តែការសន្លប់លឿនពេករបស់កីឡាករថៃ Neong Thavat ក្នុងទឹកទី១ ក្រោមជង្គង់អ្នកប្រដាល់កម្ពុជា អេលីត ចំរើន ត្រូវបានគេមើលឃើញថា ទំនងដូចជាធ្វើពុត និងមានចេតនាមិនចង់បន្តការប្រកួត បន្ទាប់ពីអាជ្ញាកណ្តាលបានរាប់ចំនួន ៨ ហើយ Neong Thavat មិនបន្តការប្រកួតទៀតឡើយ។
ការចាញ់របស់ជើងខ្លាំងថៃ Khav Krachang ដែលទទួលរងនូវស្នៀតកែងរបស់ ម៉ន សាម៉េត គឺបង្ហាញឲ្យឃើញនូវយុទ្ធសាស្ត្រវ៉ៃប្តូរ ដើម្បីទទួលបានលទ្ធផលឈ្នះ ហើយមានប្រសិទ្ធភាព ខណៈដែលក្នុងដើមទឹកទី២ ម៉ន សាម៉េត វាយកែងចូលចំគោលដៅល្អ ធ្វើឲ្យ KhavKrachang វង្វេងវង្វាន់ម្តងៗ ហើយអាជ្ញាកណ្តាលរាប់ចំនួន ៨ មួយលើករួចទៅហើយ។
ការប្រកួតបានឈានមកដល់ចុងទឹកទី២ ការវាយសម្រុករបស់ ម៉ន សាម៉េត បន្ថែមល្បឿន ដោយវាយកែងចូលផ្ទួនៗចំនួន ២ លើកបន្ថែមទៀត បណ្តាលឲ្យ Khav Krachangសន្លប់ស្តូក មិនអាចងើបរួច ហើយអាជ្ញាកណ្តាលបានបញ្ឈប់ការប្រកួត។ ជ័យជម្នះនេះបានធ្វើឲ្យការប្រកួតទាំង ៣ លើករបស់ ម៉ន សាម៉េត ឈ្នះទាំងអស់ មាន ៩ ពិន្ទុ និងកំពុងឈរលេខ ២ ក្នុងពូល A ខាងកីឡាករកម្ពុជា។
ដោយឡែកការចាញ់របស់ Neong Thavat ក្រោមជង្គង់របស់ អេលីត ចំរើន នោះ គឺមិនទំនងសន្លប់ ដែលមិនអាចងើបរួចនោះឡើយ ហើយបញ្ហានេះបានធ្វើឲ្យកីឡាករថៃរូបនេះ ត្រូវជាប់សង្ស័យពីចេតនាមិនចង់ឈ្នះ ឬមិនចង់ឈឺខ្លួន ដោយចង់បានលុយចាយស្រួលៗ។ តាមរូបភាពយឺតៗចាក់សាឡើងវិញ បង្ហាញឲ្យឃើញថា ស្នៀតជង្គង់របស់ អេលីត ចំរើន ដែលបោះចូលមិនដល់ទ្រូងនោះទេ គឺចំត្រូវត្រឹមដៃ ប៉ុន្តែ Neong Thavat បែរជាធ្វើសន្លប់ ធ្វើឲ្យមហាជនរិះគន់យ៉ាងខ្លាំង។
លោក ចាន់ សុទ្ធ ប្រធានវិនិច្ឆ័យ និងអ្នកគ្រប់គ្រងកម្មវិធី បានប្រាប់ថា៖ «គូនេះមិនទំនងហើយមានគូប្រកួតផ្សេងទៀតប្រកួតគ្នា មិនប្រក្រតី ហេតុនេះប្រធានវិនិច្ឆ័យសម្រេចធ្វើរបាយការណ៍ទៅប្រធានសហព័ន្ធកីឡាប្រដាល់គុនខ្មែរ ដើម្បីបើកការប្រជុំវាយតម្លៃ និងត្រួតពិនិត្យការប្រកួតនេះឡើងវិញ ដើម្បីឲ្យមានតម្លាភាពសុក្រឹត និងការប្រកួតអស់ពីសមត្ថភាព ព្រមទាំងដាក់ពិន័យដល់កីឡាករខូចខិល»។
ចំណែកលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ មាន ប្រសាសន៍ថា៖ «សហព័ន្ធ និងក្រុមការងារបច្ចេកទេស ក៏ដូចជាម្ចាស់សង្វៀន នឹងរួមគ្នាពិនិត្យកែតម្រូវទៅលើអ្វីដែលនៅខ្វះចន្លោះ និងមានវិធានការ ឬកំណែទម្រង់ទៅលើអ្វីដែលមិនត្រឹមត្រូវ»។
ជាមួយការឈ្នះបាន ៣ ពិន្ទុបន្ថែមលើកនេះ បានជួយឲ្យកីឡាករ អេលីត ចំរើន បន្តឈរនៅចំណាត់ថ្នាក់លេខ ១ ប្រចាំពូលកម្ពុជា ជាបណ្តោះអាសន្ន ដោយមាន ៩ ពិន្ទុពេញ ស្មើជាមួយ ម៉ន សាម៉េត និងពីក្រោយដោយកីឡាករ មាស សារ៉ាក់ ដែលឈ្នះទាំង ២ ប្រកួតដែរ ប៉ុន្តែ យុគ យក្សផ្លែ គ្មានពិន្ទុមកប្រជែងជាមួយគេទៀតនោះទេ។
ចំណែកកីឡាករថៃទាំង ៤ នាក់ គឺមានតែ Neong Thavat និង Khav krachang នេះឯង ដែលឈ្នះបានម្នាក់ ១ លើក និងមានត្រឹម ៤ ពិន្ទុដូចគ្នា ហើយកម្រិតសមត្ថភាព ពួកគេ ធ្លាក់ចុះដែលលំបាកផ្ទឹមជាមួយកីឡាករខ្មែរ។ ទោះជាយ៉ាងណាសហព័ន្ធ និងម្ចាស់កម្មវិធី នឹងកោះប្រជុំនៅសប្តាហ៍នេះ ដើម្បីពិនិត្យរក រូបមន្តប្រកួតឲ្យល្អឡើងវិញ៕
