.jpg)
ក្រុមអត្តពលិកការ៉ាតេដូកម្ពុជាទាំង ៨ នាក់ពេលថតជាមួយលោក វ៉ាត ចំរើន និងលោក ឡាច ចន្ទតារា។ សហការី
ភ្នំពេញៈ ខេមរសហព័ន្ធកីឡាការ៉ាតេដូ កាលពីយប់ថ្ងៃចន្ទម្សិលមិញបានបញ្ជូនអត្តពលិកចំនួន ៨ នាក់ទៅហ្វឹកហាត់នៅប្រទេសអ៊ីតាលី ដើម្បីពង្រឹងសមត្ថភាពឲ្យបានល្អប្រសើរសម្រាប់ប្រជែងរកមេដាយក្នុងការប្រកួតស៊ីហ្គេមលើកទី ៣០ ឆ្នាំ ២០១៩ នៅហ្វីលីពីនខាងមុខ។ នេះបើតាមការឲ្យដឹងពីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា។
លោក វ៉ាត់ ចំរើន ដែលជាអគ្គលេខាធិការខេមរសហព័ន្ធកីឡាការ៉ាតេដូផងនោះបានប្រាប់ភ្នំពេញ ប៉ុស្តិ៍ ថាការបញ្ជូនអត្តពលិកការ៉ាតេដូទៅហ្វឹកហាត់នៅក្រៅប្រទេសនេះជាចក្ខុវិស័យរបស់ថ្នាក់ដឹកនាំសហព័ន្ធដែលមានលោក អូន ព័ន្ធមុនីរ័ត្ន ជាប្រធានបានដាក់ចេញនូវផែនការយុទ្ធសាស្ត្រ ដើម្បីឈ្នះមេដាយក្នុងការប្រកួតស៊ីហ្គេមឆ្នាំ ២០១៩ នៅហ្វីលីពីនព្រោះការហ្វឹកហាត់ក្នុងប្រទេសមិនងាយនឹងទទួលបានលទ្ធផលល្អនោះឡើយ។
លោកបន្តថា៖ «ជាធម្មតាកីឡាករ កីឡាការិនី ដែលទទួលបានការហ្វឹកហាត់នៅក្រៅប្រទេសមានកម្រិតបច្ចេកទេស ឬមានសមិទ្ធផលល្អជាងដោយមានទេពកោសល្យល្អខ្លាំងនៅក្នុងពេលប្រកួត ហេតុនេះកីឡាប្រភេទការ៉ាតេដូត្រូវតែសម្រួចឲ្យឈ្នះមេដាយថ្នាក់តំបន់ ពិសេសស៊ីហ្គេមនៅហ្វីលីពីនឆ្នាំ ២០១៩។ ប្រសិនបើគ្មានទស្សនវិស័យ ឬស្វែងរកការហ្វឹកហាត់នៅក្រៅប្រទេសបានទេគឺការប្រកួតលំដាប់អន្តរជាតិ ក្រុមការ៉ាតេដូកម្ពុជានៅតែមិនទទួលបានលទ្ធផលល្អដដែល»។
តាមលោក វ៉ាត់ ចំរើន ដដែលបានដឹងថាអត្តពកលិកទាំង ៨ នាក់នេះទទួលបានការឧបត្ថម្ភគាំទ្រពីលោក អូន ព័ន្ធមុនីរ័ត្ន ដោយទទួលបានការសហការពីគ្រូជំនាញឈ្មោះ Romano នៅប្រទេសអ៊ីតាលីដែលហ្វឹកហ្វឺនពិសេសមានរយៈពេលចំនួន ៣០ ថ្ងៃគឺចាប់ពីថ្ងៃអង្គារនេះរហូតដល់ថ្ងៃទី ៨ ខែកុម្ភៈ ឆ្នាំ ២០១៩ ទើបត្រឡប់មកមាតុប្រទេសវិញ។
ចំណែកអត្តពលិកជម្រើសជាតិទាំង ៨ នាក់នោះមានកីឡាករ ជ្រុន វិរបុត្រ ប្រភេទប្រយុទ្ធទម្ងន់ ៥៧ គីឡូក្រាម លី គួចហាវ ទម្ងន់ ៥៧ គីឡូក្រាម ហន ឆានី ទម្ងន់ ៥៧ គីឡូក្រាម គឹម សុវណ្ណារ៉ា ទម្ងន់ ៦០ គីឡូក្រាម ឆេង ច័ន្ទតារារតនៈ ទម្ងន់ ៦៨ គីឡូក្រាម កាក់ សីលាបញ្ញា មានទម្ងន់ ៦៨ គីឡូក្រាម សឿង វិរៈ ទម្ងន់ ៨៤ គីឡូក្រាម និងកីឡាការិនី ឆន ស្រីកា ទម្ងន់ ៥០ គីឡូក្រាម។
លោក ឡាច ចន្ទតារា គ្រូជម្រើសជាតិ និងជាអគ្គលេខាធិការរងខេមរសហព័ន្ធកីឡាការ៉ាតេដូបានឲ្យដឹងថា៖ «ក្នុងផែនការយុទ្ធសាស្ត្ររបស់សហព័ន្ធគឺបន្ទាប់ពីហ្វឹកហាត់នៅប្រទេសអ៊ីតាលី អត្តពលិកទាំងអស់ត្រៀមខ្លួនចូលប្រកួតក្នុងព្រឹត្តិការណ៍នានា ដូចជាប្រកួតស៊ីហ្គេម ឆ្នាំ ២០១៩ នៅហ្វីលីពីន ដោយកំណត់ដណ្តើមយកមេដាយក្នុងកម្រិតណាមួយឲ្យបានជូនជាតិ»។
លោកបន្ថែមថា៖ «ជាមួយគ្នានេះយើងបានត្រៀមខ្លួន និងពង្រឹងសមត្ថភាពអត្តពលិកថ្នាល ឬវ័យក្មេង ដើម្បីដណ្តើមយកមេដាយក្នុងព្រឹត្តិការណ៍ស៊ីហ្គេមលើកទី ៣២ នៅឆ្នាំ ២០២៣ ដែលកម្ពុជាធ្វើជាម្ចាស់ផ្ទះ ព្រោះធ្វើម្ចាស់ផ្ទះប្រកួតត្រូវការឈ្នះមេដាយគឺមិនអាចអត់បាននោះទេ»៕
