ភ្នំពេញ: ការប្រកួតដណ្តើមពានអន្តរជាតិកំពូលអ្នកប្រដាល់ដៃដែក ISI Palm រដូវកាលទី ៤ ទម្ងន់ ៦០ គីឡូក្រាមបានចាប់ដំណើរការប្រកួតសន្សំពិន្ទុជុំទី ១ នៅលើសង្វៀន CNC កាលពីថ្ងៃអាទិត្យ ប៉ុន្តែការប្រកួតបើកឆាកនេះ កីឡាករកម្ពុជា លី ភា និង សុខ សាវិន សុទ្ធតែចាញ់ពិន្ទុអ្នកប្រដាល់ថៃទាំងគ្រាំគ្រាដូចគ្នា។
នៅក្នុងការប្រកួត ២ គូកាលពីម្សិលមិញនោះត្រូវបានគេរំពឹងទៅលើ សុខ សាវិន ថាអាចនឹងរកបាន ៣ ពិន្ទុ ដើម្បីស្តារភាពជូរចត់ចំពោះការចាញ់អ្នកប្រដាល់ថៃ Vithakyayuth នាការប្រកួតខ្សែក្រវាត់នៅសង្វៀន SEATV កន្លងមក ប៉ុន្តែ សាវិននៅតែមិនអាចធ្វើអ្វីទៅលើ Vithakyayuth បានដដែល។
ការទាត់ឲ្យ Vithakyayuth ដួលទាំងជំហរនៅក្នុងទឹកទី ១ និងការម៉ាត់ចេញបានយ៉ាងល្អនៅទឹកទី ២ បានធ្វើឲ្យអ្នកគាំទ្រមានការអបអរខ្លាំងដល់ សុខ សាវិន ប៉ុន្តែចាប់ពីទឹកទី ៣ ទៅ សាវិន បានទទួលរងការទាត់ធ្ងន់ៗពីសំណាក់ Vithakyayuth ធ្វើឲ្យគេចង់គាំងម្តងៗផងដែរ និងបានចាញ់ពិន្ទុជាឯកច្ឆន្ទ ៥-០ តែម្តង។
ចំណែក លី ភា បានទទួលរងការម៉ាត់ ទាត់ បុកជង្គង់ និងបុកកែងពីសំណាក់ជើងខ្លាំងរបស់ថៃ Tounpe យ៉ាងចាស់ដៃនៅក្នុងការវាយប្តូរគ្នាទៅវិញទៅមកចំនួន ៥ ទឹកពេញគឺមុនពេលរូបគេត្រូវប្រកាសឲ្យចាញ់ពិន្ទុ Tounpe ជាឯកច្ឆន្ទ ហើយនេះក៏ជាការចាញ់លើកទី ២ របស់ លី ភា ក្រោមស្នាដៃ Tounpe ផងដែរ។
យ៉ាងណាក៏ដោយ Tounpe បានសរសើរទៅដល់កីឡាករ លី ភា ថា មានភាពរឹងមាំជាងប្រកួតលើកមុន។ Tounpe បានប្រាប់ភ្នំពេញប៉ុស្តិ៍ក្រោយការប្រកួតថា៖ «ការយកឈ្នះ លី ភា លើកនេះវារាងពិបាកជាងការប្រកួតលើកមុនដែលខ្ញុំបានយកឈ្នះរាងស្រួល ព្រោះលើកនេះ លី ភា វ៉ៃបានល្អ និងមានភាពរឹងមាំជាងមុន»។
នៅពេលសួរពីទំនុកចិត្តក្នុងការប្រជែងយកពាននេះ កីឡាករវ័យ ២៣ ឆ្នាំ Tounpe បាននិយាយថា៖ «នៅក្នុងចំណោមកីឡាករកម្ពុជាទាំង ៤ នាក់ខ្ញុំមានការចាប់អារម្មណ៍ខ្លាំងទៅលើ សួន ចាន់នី ព្រោះគេខ្ពស់ដែលអាចនឹងមានការពិបាកយកឈ្នះ ហើយ សុខ សាវិន ក៏ខ្ញុំមិនធ្លាប់ជួបគេដែរ ចំណែក ឃីម បូរ៉ា ខ្ញុំធ្លាប់ឈ្នះ ៤ ដងហើយ ហើយ លី ភា ខ្ញុំបានយកឈ្នះជាលើកទី ២ លើកនេះ អ៊ីចឹងខ្ញុំមានសង្ឃឹម ៧០ ភាគរយដែរក្នុងការប្រជែងយកពានមួយនេះ»។
គួរបញ្ជាក់ថាកីឡាករកម្ពុជា ៤ នាក់មាន សុខ សាវិន, លី ភា, ឃីម បូរ៉ា និង សួន ចាន់នី (សូត្រ ប៊ុនធី) ត្រូវបានដាក់ឲ្យប្រកួតជម្រុះវិលជុំជាមួយកីឡាករថៃ Tounpe, Vithakyayuth, Prab Sor និង Phet Nginthorng ដើម្បីរកអ្នកមានពិន្ទុខ្ពស់ជាងគេ ៤ នាក់ឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ និងឈានទៅវគ្គផ្តាច់ព្រ័ត្រដណ្តើមយកពាន ISI Palm រដូវកាលទី ៤ នេះ។
នៅក្នុងសន្និសីទកាសែតដែលធ្វើឡើងមុនការប្រកួតកាលពីម៉ោង ១១:៣០ ថ្ងៃអាទិត្យនោះដែរលោក ឆឹង យ៉ាវយ៉េន អនុប្រធានសហព័ន្ធកីឡាប្រដាល់គុនខ្មែរ លោក ហួរ រតនៈ ប្រធានទីផ្សារទូរទស្សន៍ CNC និងលោក សាមីន្ត វឌ្ឍនឧត្តម ប្រធានទីផ្សារក្រុមហ៊ុន ISI Steel សុទ្ធតែបានចាត់ទុកការបន្តបើកឲ្យមានការប្រកួតដណ្តើមពានអន្តរជាតិ ISI Palm រដូវកាលទី ៤ នេះជាការចូលរួមចំណែកយ៉ាងសំខាន់ក្នុងការលើកស្ទួយ និងអភិវឌ្ឍវិស័យកីឡាគុនខ្មែរឲ្យកាន់តែមានឈ្មោះបោះសំឡេងនៅលើឆាកអន្តរជាតិ៕