ភ្នំពេញៈ កីឡាករឆ្នើមៗ មានឈ្មោះបោះសំឡេងចំនួន ៥ នាក់ រួមមាន រឿង សោភ័ណ្ឌ, ឡុង សុភី, មាស ច័ន្ទមាន, ឆៃ សារ៉ា និង ផាន់ គ្រាន់ បានស្ថិតនៅក្នុងបញ្ជីឈ្មោះកីឡាករដែលបានរងរបួសស្រាល និងធ្ងន់ សរុបចំនួន ៣៦ នាក់ ប្រចាំខែតុលានេះ ហើយបញ្ហារបួសនេះ បានក្លាយជាហានិភ័យកាន់តែខ្ពស់ គួរឲ្យព្រួយបារម្ភ ខណៈកីឡាករល្អៗភាគច្រើន គិតតែលុយតម្លៃខ្លួន ដោយបានឡើងវ៉ៃ ស្ទើរតែរៀងរាល់សប្តាហ៍ ជាមួយនឹងការហ្វឹកហាត់មិនបានពេញលេញនោះ។
យោងតាមរបាយការរបស់លោកគ្រូពេទ្យប្រចាំសង្វៀនប្រកួត នៅតាមស្ថានីយទូរទស្សន៍ទាំង ៤ មានបាយ័ន CNC អាស៊ីអាគ្នេយ៍ និងប៉ុស្តិ៍លេខ ៥ ក្នុងរយៈពេល ១ ខែចុងក្រោយនេះ មានកីឡាកររងរបួស ដោយការប្រកួតមានថ្លោះគ្រេច បែកឈាម បាក់ក្តោងច្រមុះដែលជារបួសស្រាលៗ ព្យាបាលបាននៅនឹងសង្វៀននោះ មានចំនួន ៣១ នាក់ ចំណែកកីឡាករដែលរងរបួសធ្ងន់ និងមានបញ្ហាសុខភាពធ្ងន់ធ្ងរ ចូលសម្រាកនៅមន្ទីរពេទ្យ មានចំនួន ៥ នាក់។
លោកគ្រូពេទ្យ ជឹម ផល្លា ដែលមានជំនាញបទពិសោធការងារជាមួយកីឡាច្រើនឆ្នាំហើយត្រូវបានសហព័ន្ធកីឡាប្រដាល់គុនខ្មែរ ឲ្យទទួលខុសត្រូវ លើកីឡាកររបួស ប្រាប់ភ្នំពេញប៉ុស្តិ៍ថា សម្រាប់ការប្រកួតរៀងរាល់ចុងសប្តាហ៍ នៅតាមសង្វៀនប្រដាល់ទាំង ៤ នេះ គឺក្នុង ១ ខែ មានកីឡាករឡើងប្រកួតប្រហែល ២៦៤ នាក់ ហើយក្នុងខែតុលានេះ កីឡាកររបួសស្រាល និងធ្ងន់មានចំនួន ៣៦ នាក់»។
លោកបានបន្ថែមថា៖ «នៅក្នុងចំណោម ៣៦ នាក់នោះ មានអ្នករបួសស្រាលចំនួន ៣១ នាក់ គឺមាននៅសង្វៀនបាយ័នចំនួន ៨នាក់ នៅសង្វៀនអាស៊ីអាគ្នេយ៍ ១២ នាក់ នៅសង្វៀន CNC ៨ នាក់ និងសង្វៀនប៉ុស្តិ៍លេខ ៥ ចំនួន ៣ នាក់។
ចំណែកកីឡាកររបួសធ្ងន់ចូលសម្រាកមន្ទីរពេទ្យមានកីឡាករ ឡុង សុភី ដោយរបួសឆ្អឹងជើង, រឿង សោភ័ណ្ឌ របួសគ្រាំគ្រាក្រោយចាញ់កីឡាករមីយ៉ាន់ម៉ា, ផាន់ គ្រាន់ របួសដៃ ព្រមទាំង ឆៃ សារ៉ា និង មាស ច័ន្ទមាន ដែលរងគ្រោះដោយគ្រោះថ្នាក់ចរាចរណ៍»។
ជុំវិញបញ្ហារបួសកីឡាករ ដែលតែងតែកើតមានឡើងជាប្រចាំនេះ ត្រូវបានលោកវេជ្ជបណ្ឌិត ឌៀប វណ្ណា គ្រូពេទ្យប្រចាំនៅសង្វៀនអាស៊ីអាគ្នេយ៍ ផ្តល់ជាដំបូន្មានថា ដើម្បីកាត់បន្ថយការរបួសនៅពេលប្រកួត ទី ១ កីឡាករត្រូវតែគោរពវិន័យការហ្វឹកហាត់ឲ្យបានល្អត្រឹមត្រូវ គឺធ្វើឲ្យរាងកាយស៊ាំទៅនឹងការប៉ះទង្គិចធ្ងន់ៗ ទី ២ ថែរក្សាសុខភាពឲ្យបានរឹងមាំចៀសវាងការហូបគ្រឿងស្រវឹង ឬការសម្រាកមិនគ្រប់គ្រាន់ ដែលនាំឲ្យរាងកាយធ្លាក់ចុះកម្លាំង។
លោកបានបន្តថា ចំណែកទី ៣ គណៈកម្មការបច្ចេកទេសផ្គូផ្គងកីឡាករឲ្យវ៉ៃគ្នា ត្រូវគោរពតាមបទបញ្ជាឲ្យបានត្រឹមត្រូវ ដូចជាត្រូវឲ្យកីឡាករមានកម្ពស់ប្រហែលគ្នា,បទពិសោធប្រហាក់ប្រហែលគ្នា,សមត្ថភាពក្បាច់គុនល្អប្រហែលគ្នា និងដាច់ខាតត្រូវមានទម្ងន់ប៉ុនគ្នា។
លោកវេជ្ជបណ្ឌិត ឌៀប វណ្ណា បានបញ្ជាក់ថា៖ «បើគោរពតាមគោលការណ៍ខាងលើនេះ ការរងរបួសពីការប្រកួត គឺកាត់បន្ថយបានច្រើនណាស់។ បន្ថែមពីលើនេះត្រូវអប់រំកីឡាករឲ្យមានក្រមសីលធម៌ប្រកួត គឺមិនបំពាន និងមិនល្មើសបទបញ្ជាប្រកួត ដូចជាដៃគូម្ខាងទន់ខ្សោយអស់លទ្ធភាពតដៃ គួរតែកុំវ៉ៃបន្ថែមទៀត គឺគប្បីលោកអាជ្ញាកណ្តាលត្រូវបញ្ឈប់តែម្តងទៅ ដើម្បីសុវត្ថិភាព សុខភាពកីឡាករ និងកាត់បន្ថយពីបញ្ហារបួសនេះ»៕