.jpg)
បេក្ខភាពទម្ងន់ធ្ងន់ ដែលត្រូវប្រកួតដណ្តើមប្រាក់លានលើកនេះ។ សហការី
ភ្នំពេញ៖ អ្នកប្រដាល់ជើងចាស់ និងជើងថ្មី ដែលសុទ្ធតែមានសមត្ថភាពខ្លាំងក្នុងការប្រកួតទម្ងន់ ៧១ គីឡូក្រាម មាន ឡុង សុភី ( នី សុភី) ធឿន ធារ៉ា និង វង្ស វិឆ័យ ហាក់មានការខ្លាចញញើតនឹងកណ្តាប់ដៃដ៏ធ្ងន់របស់ ថៃ រិទ្ធី (ឈួន រិទ្ធី ) ខណៈអ្នកទាំង ៤ ត្រូវបានជ្រើសរើសដាក់ឲ្យប្រកួតម៉ារ៉ាតុងដណ្តើមប្រាក់លាននៃកម្មវិធី Mas Fight Cambodia នៅលើសង្វៀនថោននាថ្ងៃអាទិត្យនេះ។
ការដាក់អ្នកទាំង ៤ ឲ្យប្រកួតម៉ារ៉ាតុងដណ្តើមប្រាក់លាននេះ ត្រូវបានលោកជួប វុត្ថា ពិធីករប្រចាំសង្វៀនថោន និងជាអ្នកគ្រប់គ្រងប្រវត្តិប្រកួតកីឡាករ ចាត់ទុកថា ជាការប្រកួតដែលមិនធ្លាប់មានកន្លងមក។ លោកនិយាយថា៖ «សង្វៀនថោន រៀបចំការប្រកួតបាន ៣៥ សប្តាហ៍ហើយ ក្នុងនោះបានរៀបចំកម្មវិធីពិសេសម៉ារ៉ាតុងដណ្តើមប្រាក់លាន ដោយប្រកួតជម្រុះតាមរយៈគុនខ្មែរចំនួន ៣ ទឹក និងយកអ្នកឈ្នះទៅជួបអ្នកឈ្នះ ដើម្បីប្រកួតយកទឹកប្រាក់ ៣,៤ លានរៀល តាមច្បាប់ Mas Fight នេះ គឺជាសប្តាហ៍ទី ១៥ ហើយក៏លើកទី១ ដែលយើងជ្រើសយកកីឡាករលំដាប់ជួរមុខទម្ងន់ធ្ងន់ ៧១ គីឡូក្រាមមកប្រកួត»។
នៅក្នុងចំណោមអ្នកប្រដាល់ទាំង ៤ នេះ ឡុង សុភី មានបទពិសោធប្រកួតច្រើនជាងគេ (១៤០ ដង) ខណៈ ធឿន ធារ៉ា និង វង្ស វិឆ័យ មានបទពិសោធប្រកួតត្រឹមជាង ៨០ ដងដូចគ្នា ចំណែក ថៃ រិទ្ធី ទើបប្រកួតបានត្រឹម ៤៧ ដង ឈ្នះ ៣៥ ចាញ់ ១១ ស្មើ ១ ដង ហើយធ្លាប់ផ្តួលដៃគូឲ្យសន្លប់បាន ១៥ ដង ប៉ុន្តែទាំង ឡុង សុភី, ធឿន ធារ៉ា និងភាគី វង្ស វិឆ័យ សុទ្ធតែខ្លាចភ្លាត់ស្នៀត ក្រោមកណ្តាប់ដៃដ៏ធ្ងន់របស់ ថៃ រិទ្ធី។
អតីតកីឡាករជើងខ្លាំង ឡៅ ស៊ីណាត ជាគ្រូជំនួយ វង្ស វិឆ័យ បានប្រាប់ថា៖ «នៅក្នុងចំណោម ៣ នាក់ ដែល វិឆ័យ ត្រូវប្រកួតក្នុងសប្តាហ៍នេះ ពិតជាលំបាកឈ្នះណាស់ គឺជាឧបសគ្គធំណាស់ និងត្រូវធ្វើការងារធ្ងន់ណាស់ ព្រោះតាមប្រវត្តិប្រកួតកន្លងមក វិឆ័យ ធ្លាប់ចាញ់សន្លប់ទាំង ៣ លើក ក្រោមកណ្តាប់ដៃ ថៃ រិទ្ធី ហើយធ្លាប់ចាញ់ ធឿន ធារ៉ា ម្តង និងធ្លាប់ឈ្នះ ឡុង សុភី ម្តង និងចាញ់ ២ ដង។ ហេតុនេះ ខ្ញុំមិនហ៊ានរំពឹងឈ្នះច្រើនទេ ប៉ុន្តែធានាវ៉ៃអស់ពីសមត្ថភាព គឺស៊ីសងជាក់ស្តែង»។
ចំណែក ឡុង សុភី និង ធឿន ធារ៉ា បានប្រាប់ស្រដៀងគ្នាថា៖ «ការប្រកួតនេះមិនអីទេ ចាប់ឆ្នោតប៉ះជាមួយអ្នកណាក៏បានដែរ ប៉ុន្តែកណ្តាប់ដៃធ្ងន់របស់ ថៃ រិទ្ធី ជាបញ្ហាលំបាកទប់ទល់ គឺខ្ញុំបារម្ភខ្លាចភ្លាត់ស្នៀតចូលកណ្តាប់ដៃដែរ»។ យ៉ាងណាក៏ដោយ ធឿន ធារ៉ា សង្ឃឹមឈ្នះ ៧០ ភាគរយ តែ សុភី គឺតែងតែមានទម្លាប់សង្ឃឹមត្រឹម ៥០ ភាគរយ មុនការប្រកួតចាប់ផ្តើម។
ចំពោះ ថៃ រិទ្ធី វិញ បានប្រាប់ថា៖ «នៅក្នុងចំណោមអ្នកប្រដាល់ទាំង ៣ នេះ ខ្ញុំមិនធ្លាប់ជួបតែរៀមច្បង ឡុង សុភី ម្នាក់ទេ ចំណែក វង្ស វិឆ័យ និង ធឿន ធារ៉ា ធ្លាប់ចាញ់ខ្ញុំទាំងអស់។ យ៉ាងណាក៏ដោយ ខ្ញុំមិនហ៊ានអួតថា ឈ្នះ ឬយ៉ាងណានោះទេ ព្រោះខ្ញុំនៅមានបទពិសោធខ្ចីជាងពួកគាត់ ហើយចំនួនប្រកួតក៏តិចជាង ប៉ុន្តែខ្ញុំធានាវ៉ៃអស់ពីសមត្ថភាពមិនមែនប្រកួតលេងៗយកតែលុយនោះឡើយ»។
ចំណែក លោក ធន់ សុភា គ្រូបង្វឹករបស់ ថៃ រីទ្ធី បាននិយាយថា៖ «ខ្ញុំរំពឹងឈ្នះ ៧០ ភាគរយ ព្រោះកូនសិស្សខ្ញុំចិត្តធំណាស់ និងមានស្នៀតសម្លាប់ល្អ គឺកណ្តាប់ដៃ។ ចំណុចពិសេសរបស់ រិទ្ធី គឺចូលវ៉ៃប្តូរធ្ងន់ៗឲ្យដៃគូសន្លប់ភ្លាមៗ ប៉ុន្តែបើគេធ្វើមិនបានសម្រេចទេ អាចនឹងសន្លប់ខ្លួនឯងក៏ថាបាន គឺនិយាយទៅ ១ ចានគោក ១ ចានទឹក»៕
