ភ្នំពេញ៖ ដោយមិនរាប់ពីការប្រកួតខ្នាតតូចៗ នៅតាមខេត្តជនបទ គឺយ៉ាងតិចក៏មានស្ថានីយទូរទស្សន៍ចំនួន ៥ បានរៀបចំការប្រកួតប្រដាល់រៀងរាល់ចុងសប្តាហ៍ ក្រោមការគ្រប់គ្រងពីសហព័ន្ធកីឡាប្រដាល់គុនខ្មែរ នៅក្នុងរាជធានីភ្នំពេញ ហើយក្នុង ១ សប្តាហ៍ មានកីឡាករត្រូវចាប់គូប្រកួតសរុបខ្ទង់ ៦៩ គូ ឬស្មើនឹង ១៣៨ នាក់។
ជាមួយគ្នានោះ មានកីឡាករលំដាប់ល្បីៗ ដែលត្រូវប្រកួតលក្ខណៈមិត្តភាពអន្តរជាតិ ឬប្រកួតអន្តរជាតិដណ្តើមខ្សែក្រវាត់តាមកម្មវិធីត្រៀមទុកមុនជាស្រេច មានចំនួនប្រហែល ៣០ គូផងដែរ។ ដោយឡែកកីឡាករឆ្នើម និងល្បីបំផុតជួរមុខ ដែលមានប្រជាប្រិយជាងគេនោះ បានស្នើសុំឡើងតម្លៃខ្លួនប្រកួតសម្រាប់ឆ្នាំ ២០២០ នេះ។
រឿង សោភ័ណ្ឌ អ្នកប្រដាល់ឆ្នើមមកពីក្លិបមកុដរាជសីហ៍ ដែលមានសេវាប្រកួតសឹងគ្រប់សប្តាហ៍នោះបាននិយាយថា៖ «ឆ្នាំនេះ ការប្រកួតនៅសង្វៀនក្នុងរាជធានីភ្នំពេញ គឺខ្ញុំសុំតម្លៃខ្លួនប្រកួតម្តង ៧០០ ដុល្លារ ចំណែកទៅតាមខេត្ត ធ្វើដំណើរឆ្ងាយ ហូបចុកស្នាក់នៅ ព្រមទាំងសោហ៊ុយធ្វើដំណើរនោះ គឺស្នើសុំចំនួន ១ ០០០ ដុល្លារយ៉ាងតិច»។
សោភ័ណ្ឌ បន្តថា៖ «កាលពីដើមឆ្នាំ ២០១៩ ខ្ញុំប្រកួតម្តងបាន ៥០០ ដុល្លារ ហើយចុងឆ្នាំឡើងបាន ៥៥០ ដុល្លារ ក្នុង ១ លើក គឺសឹងតែរកពេលថែទាំសុខភាពសម្រាប់ការប្រកួតឲ្យកម្មវិធីរបស់គេមិនទាន់ផង ព្រោះការប្រកួតញឹកញាប់ពេក ឈឺខ្លួនមានបញ្ហាសុខភាព ព្រមទាំងវ៉ៃមិនសូវបានល្អនាំឲ្យមានការរិះគន់ពីមហាជនផង។ ទោះជាយ៉ាងណាសម្រាប់ការប្រកួតក្នុងប្រទេសដែលមានព្រឹត្តិការណ៍ធំៗម្តងម្កាលម្ចាស់កម្មវិធីក៏លើកទឹកចិត្តឲ្យតម្លៃខ្លួនប្រកួតមួយលើកចំនួន ១ ០០០ ដុល្លារផងដែរ»។
ទោះជាយ៉ាងណាសង្វៀនប្រដាល់ខ្លះ បានរៀបចំការប្រកួតគ្មានតម្លាភាព គឺប្រជែងយកកីឡាករខ្លាំងៗ ដោយផ្តល់តម្លៃខ្លួនឲ្យកីឡាករនីមួយៗ មិនដូចគ្នាឡើយ គឺកីឡាករម្នាក់ប្រកួតនៅសង្វៀនផ្សេងពីគ្នា តម្លៃខ្លួនខុសពីគ្នា ពិសេសមានសង្វៀនខ្លះមានចាយលុយក្រោមតុ ដើម្បីទាក់ទាញ និងលួងលោមកីឡាករឲ្យប្រកួតនៅសង្វៀនរបស់ខ្លួនជានិច្ច។
ចំណែក ឡុង សុភី មកពីក្លិបកុលបុត្រគុនខ្មែរទួលគោក បាននិយាយថា៖ «ឆ្នាំចាស់ខ្ញុំទទួលបានតម្លៃខ្លួនប្រកួតប្រហែល រឿង សោភ័ណ្ឌ ដែរ គឺ ៥០០ ដុល្លារ ក្នុង ១ លើក ហើយមានកម្មវិធីពិសេសខ្លះ ក៏បានច្រើនជាងនេះដូចគ្នា ប៉ុន្តែខ្ញុំមិនសូវមានប្រជាប្រិយដូច រឿង សោភ័ណ្ឌ ទេ ទោះបីខ្ញុំធ្លាប់ឈ្នះ រឿង សោភ័ណ្ឌ ច្រើនជាងក៏ដោយ»។
អ្នកលេងស្នៀតជង្គង់រូបនេះ បានបន្ថែមថា៖ «ខ្ញុំចង់សុំឡើងតម្លៃខ្លួនដែរ ប៉ុន្តែមិនហ៊ានដាក់តម្លៃទេ គ្រាន់តែសុំច្រើនជាងឆ្នាំចាស់។ ចំណែកការចេញប្រកួតក្រៅប្រទេស ខ្ញុំសុំ ១ ៥០០ ដុល្លារ ក្នុងការប្រកួតម្តង ដោយការចំណាយសោហ៊ុយ និងហូបចុក ជាបន្ទុករបស់ម្ចាស់កម្មវិធី។ សម្រាប់ឆ្មាំថ្មី ២០២០ នេះ ខ្ញុំប្រកួតនៅសង្វៀន Mas Fight បានតម្លៃខ្លួន ៥០០ ដដែល ប៉ុន្តែបន្ថែមវ៉ៃដៃគូឲ្យសន្លប់ គឺខ្ញុំទទួលបានទឹកប្រាក់សរុប ១ ១០០ ដុល្លារ ហើយខ្ញុំគិតថា ២០២០ ខ្ញុំសុំលើសឆ្នាំចាស់ ទើបទទួលការប្រកួត»។
ចំណែកកីឡាករ កែវ រំចង់ ជើងល្បីនៅខេត្តបាត់ដំបង បាននិយាយថា៖ «ការប្រកួតស្រុក ខ្ញុំសុំតម្លៃប្រកួត ១ ០០០ ដុល្លារ ហើយនៅក្រៅស្រុក គឺទាល់តែ ២ ០០០ ដុល្លារ ដោយមិនទាន់គិតពីសោហ៊ុយហូបចុកធ្វើដំណើរផង»។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានថ្លែងថា៖ «បញ្ហាតម្លៃខ្លួនកីឡាករ គឺអាស្រ័យលើភាគីខាងម្ចាស់កម្មវិធី និងអ្នកឧបត្ថម្ភកម្មវិធី គេស្វែងរកថវិកា តើបានប៉ុនណា? ចំណែកខាងសហព័ន្ធគ្រប់គ្រងលើបច្ចេកទេសទោះយ៉ាងណា យើងក៏ចង់ឲ្យកីឡាកររបស់យើង ទទួលបានតម្លៃខ្លួនកើនឡើងខ្ពស់ជាងមុន ដែលសមរម្យ តែក៏ត្រូវមានការឯកភាពពីគ្រប់ភាគីដែរ ព្រោះការប្រកួតដំណើរការទៅបាន គឺជាថវិការបស់វិស័យឯកជនដែលឧបត្ថម្ភ មិនមែនសហព័ន្ធ ឬស្ថាប័នរដ្ឋនោះឡើយ»។
លោក ញាន សុធី នាយកគ្រប់គ្រងកម្មវិធី នៅសង្វៀន SEATV និយាយថា៖ «រឿង សោភ័ណ្ឌ ស្នើសុំតម្លៃខ្លួនប្រកួតម្តង ៧០០ ដុល្លារ ហើយខាងខ្ញុំកំពុងសិក្សាតម្លៃជាមួយខាងស្ពនស័រ តើទៅរួច ឬយ៉ាងណា ព្រោះបើកីឡាករល្បីសុំឡើង គឺកីឡាករល្បីមួយទៀត នឹងសុំឡើងដូចតែគ្នា អ៊ីចឹងតើយើងអាចរត់រួច ឬយ៉ាងណា គឺមិនទាន់ដឹងនៅឡើយ»៕