ភ្នំពេញៈ កីឡាករវាយសីឆ្នើមចំនួន ៤ នាក់ ដែលទទួលបានគ្របខ័ណ្ឌជាមន្ត្រីនគរបាលជាតិ មកពីក្រសួងមហាផ្ទៃ ត្រូវបានក្លិបចាស់រារាំងមកគណៈកម្មការ មិនឲ្យចូលប្រកួតកីឡាជាតិ លើកទី ២ ឆ្នាំ ២០១៨ ខាងមុខ ដោយបានអះអាងថា កីឡាករទាំង ៤ នាក់នេះ និងគ្រូបង្វឹកម្នាក់ទៀតធ្លាប់លេងឲ្យសមាគមវាយសីរបស់ខ្លួន នៅឯខេត្តកំពង់ឆ្នាំង កន្លងមក។
លោកឧត្តមសេនីយ៍ឯក ជា ប៊ុនហេង ទីប្រឹក្សាលោកឧបនាយករដ្ឋមន្ត្រី ស ខេង និងជាប្រធានអង្គភាពកីឡាក្រសួងមហាផ្ទៃ បានប្រាប់ ភ្នំពេញ ប៉ុស្តិ៍ថា បច្ចុប្បន្នវត្តមានរបស់កីឡាករវាយសី ៤ នាក់ មាន ទេព ច័ន្ទម៉ារ៉ា,ទេព ទិត្យណារ៉ូ, វ៉ាន់ សៅមុន្នី,និងយ៉ាន កុសល បានចូលក្របខ័ណ្ឌនគរបាលជាតិ លេងឲ្យសមាគមកីឡាវាយសីក្រសួងមហាផ្ទៃ និងគ្រូបង្វឹក ២ នាក់ទៀតមានលោក តាន់ ម៉េងហុង និងគ្រូជំនួយ ម៉ៅ ចាន់ថន បានដាក់ពាក្យចូលប្រកួតកីឡាជាតិ លើកទី ២ រួចហើយ។
លោកបន្តថា ប៉ុន្តែមានលោក ចេង ញ៉ាន់ អតីតអភិបាលខេត្តរងកំពង់ឆ្នាំង ដែលទើបផ្ទេរទៅកាន់តំណែងអភិបាលរងខេត្តប៉ៃលិនបានរារាំងវត្តមានកីឡាករ និងគ្រូបង្វឹកទាំងនេះ មិនឲ្យប្រកួតក្នុងគំនិតទុច្ចរិតឈ្នានីស មិនឲ្យកីឡាករវាយសីក្រសួងមហាផ្ទៃ ចូលប្រកួតព្រោះពួកគេខ្លាំងៗអាចនឹងឈ្នះមេដាយមាស។
លោក ជា ប៊ុនហេង បញ្ជាក់ថា៖ «នេះជាគំនិតដើរថយក្រោយ ព្រោះការប្រកួតកីឡាជាតិនេះ រាជរដ្ឋាភិបាលចំណាយលុយយ៉ាងច្រើន ដើម្បីស្វែងរកអ្នកខ្លាំងពូកែមានសមត្ថភាពពិត សម្រាប់ជាតិទាំងមូល មិនមែនសម្រាប់ក្រុម ឬបុគ្គលមួយចំនួនតូចទេ ហើយសមាសភាពអត្តពលិកមកពីមហាផ្ទៃមួយចំនួន តែងតែរងនូវភាពអយុត្តិធម៌ ពីបុគ្គលខ្លះដែលរារាំងរកលេសមិនឲ្យចូលប្រកួត ព្រោះខ្លាចមហាផ្ទៃបានមេដាយច្រើន ធ្វើឲ្យបាក់មុខមាត់ពួកគេ»។
ពាក់ព័ន្ធបញ្ហានេះ លោក ជាម សុភា អគ្គលេខាសហព័ន្ធកីឡាវាយសី និង ជាអនុគណៈកម្មការវាយសី ក្នុងកីឡាជាតិ លើកទី ២ បានប្រាប់ថា ទាំងក្រសួងអប់រំ និង សហព័ន្ធវាយសីមិនជំទាស់ទេ ប៉ុន្តែ ត្រូវបំពេញលក្ខខណ្ឌឲ្យបាន ត្រឹមត្រូវ ព្រោះគណៈកម្មការ មានច្បាប់ប្រកួតឲ្យគោរពតាម។
លោក តាន់ ម៉េងហុង ជាគ្រូបង្វឹកប្រាប់ថា ពួកលោកធ្លាប់នៅក្នុងសមាគមវាយសីខេត្តកំពង់ឆ្នាំងមែន ប៉ុន្តែមិនដែលចុះកិច្ចសន្យានៅមួយជីវិតរបស់ខេត្តនេះទេ គឺមានសិទ្ធិទៅលេងឲ្យក្លិប ឬសមាគមណាក៏បានដែរ ហើយបច្ចុប្បន្នកីឡាករទាំងនេះ ជាមន្ត្រីនគរបាលជាតិ គឺត្រូវលេងឲ្យក្រសួងមហាផ្ទៃហើយ គឺគ្មានអ្វីខុសច្បាប់ទេ។ លោកបន្តថា៖ «រឿងនេះគន្លឹះសំខាន់គឺនៅលើលោកជាម សុភា ដែលជាអគ្គលេខាធិការសហព័ន្ធផង និងជាអនុគណៈកម្មការវាយសី កីឡាជាតិ លើកទី ២ ផង ដែលមានសិទ្ធិសម្រេច មិនគប្បីទៅខ្លាច ឬធ្វើតាមតំណាងក្លិប ឬសមាគមមកពីខេត្តកំពង់ឆ្នាំងនោះទេ»។
ចំពោះបញ្ហានេះ លោក ជា ប៊ុនហេង បានហៅជាម សុភា ថាដើរតួជាអ្នកទាត់បាល់ផង ធ្វើអាជ្ញាកណ្តាលផង គឺមានន័យថា ឲ្យទៅសុំការអនុញ្ញាតពីលោក ចេង ញ៉ាន់ ប៉ុន្តែពួកគេអាចឃុបឃិតគ្នា ជំទាស់តវ៉ា មិនឲ្យកីឡាករឆ្នើមទាំង ៤ នាក់នេះបានឡើងប្រកួត។
ចំណែកលោក គាត ហូ មន្ត្រីចូលនិវត្តន៍ ហើយបច្ចុប្បន្នជាទីប្រឹក្សាកីឡាក្រសួងមហាផ្ទៃបានថ្លែងថា៖ «ខ្ញុំបានទូរស័ព្ទទៅលោក ចេង ញ៉ាន់ កាលពីថ្ងៃសៅរ៍ សួរពីមូលហេតុនេះ ប៉ុន្តែលោក ចេង ញ៉ាន់ ប្រកែកមិនទទួលយកសំណើណាមួយទេ ដោយលោកបញ្ជាក់ថា មិនឲ្យពួកវាចូលប្រកួតបានឡើយ ព្រោះលោកធ្លាប់ចឹញ្ចឹកពួកវា យូរមកហើយ ឥឡូវវាទៅលេងឲ្យមហាផ្ទៃ»។
លោក វ៉ាត់ ចំរើន អគ្គលេខាធិការ NOCC ជាអ្នកជំនាញច្បាប់កីឡា បានថ្លែងថា ការប្រកួតកីឡាជាតិលើកទី ២ នេះរាជរដ្ឋាភិបាលចំណាយប្រាក់រៀបចំ ដើម្បីជ្រើសរកអ្នកខ្លាំងពូកែ ទោះជានៅក្លិបណា សមាគមណា ខេត្តណា ក៏ជារបស់ជាតិតែមួយ។ ហេតុនេះគួរមន្ត្រីពាក់ព័ន្ធកីឡា យោគយល់ដើម្បីឲ្យការប្រកួតជ្រើសរើសបានអ្នកខ្លាំងពិតប្រាកដ ជាអត្តពលិកខ្មែរ។
លោក ស៊ាន បូរ៉ាត រដ្ឋលេខាធិការ ក្រសួងអប់រំ យុវជន និងកីឡា ដែលភ្នំពេញប៉ុស្តិ៍បានសាកសួរចុងក្រោយ កាលពីល្ងាចថ្ងៃអាទិត្យ បានមានប្រសាសន៍ថា៖ «រឿងនេះតាមខ្ញុំដឹងគឺឲ្យសម្របសម្រួលគ្នាហើយ គឺមិនឲ្យមានបញ្ហានោះទេ»៕