ក្រុងមីឡាន៖ ក្លិបលំដាប់កំពូលរបស់ប្រទេស អ៊ីតាលី គឺសេះបង្កង់ Juventus បានប្រកាសឲ្យដឹងថាក្លិបបានសម្រេចកាត់បន្ថយប្រាក់ខែរបស់កីឡាករ ព្រមទាំងគ្រូបង្វឹក លោក Maurizio Sarri ហើយ បន្ទាប់ពីវិស័យកីឡារបស់ប្រទេសនេះ ត្រូវបានផ្អាករហូតដល់ថ្ងៃទី ៣ ខែមេសា ដោយសារការរាតត្បាតរបស់វីរុសកូរ៉ូណា។
នៅក្នុងសេចក្ដីប្រកាសនោះ ក្លិប Juventus បានឲ្យដឹងថា៖ «ដោយពិចារណាពីផលប៉ះពាល់ផ្អែកហិរញ្ញវត្ថុ និងសេដ្ឋកិច្ច យើងបានឈានដល់ការយោគយល់គ្នា ប្រកបដោយផលវិជ្ជមាន ពោលគឺក្លិបចំណេញប្រាក់ប្រហែល ៩០ លានអឺរ៉ូ (១០០,៥ លានដុល្លារ) សម្រាប់ហិរញ្ញវត្ថុប្រចាំរដូវកាល ២០១៩-២០២០»។
ស្របពេលជំងឺកូវីដ ១៩ កំពុងឆ្លងរាលដាលទៅប្រទេសជាច្រើននៅទូទាំងពិភពលោក អ៊ីតាលីត្រូវបានគេរាយការណ៍ថា មានចំនួនអ្នកស្លាប់ច្រើនជាងប្រទេសផ្សេងៗ ពោលគឺមានដល់ទៅជាង ១០ ០០០ នាក់។
ដោយសារវិបត្តិដែលកំពុងតែកើតមាននេះ Juventus ជាក្រុមជើងឯកក្របខ័ណ្ឌ Serie A ដែលកំពុងនាំមុខក្រុមលេខ ២ Lazio ត្រឹមតែ ១ ពិន្ទុក្នុងតារាងពិន្ទុ មុនការប្រកួតនៅសល់ត្រូវបានពន្យារពេលនោះបានប្រាប់ថា ខាងក្លិបបានព្រមព្រៀងគ្នាកាត់ប្រាក់ខែនេះ ចាប់ពីខែមីនា ដល់ខែមិថុនា។ ក្លិបសេះបង្កង់បានបន្ថែមឲ្យដឹងទៀតថា ប្រសិនបើរដូវកាលនឹងបញ្ចប់នៅចុងឆ្នាំនេះ កីឡាករទាំងអស់អាចទទួលបានប្រាក់បន្ថែមក្នុងខែទាំងនោះវិញ។
ស្របពេលជាមួយគ្នានេះ ក្លិបយក្សដែលមានទីតាំងនៅទីក្រុង Turin មួយនេះក៏មិនភ្លេចអរគុណដល់សមាជិករបស់ក្លិបក្នុងសេចក្ដីប្រកាសនោះដែរ ក្រោយមានការយោគយល់នេះ ដោយបន្តថា៖ «ក្លិប Juventus សូមថ្លែងអំណរគុណដល់បណ្ដាកីឡាករ និងក្រុមគ្រូបង្វឹកទាំងអស់ ចំពោះការប្ដូរផ្ដាច់របស់ពួកគេក្នុងពេលវេលាដ៏លំបាកសម្រាប់គ្រប់គ្នានេះ»។
ទោះយ៉ាងណា មិនមែនមានតែក្លិប Juventus ទេ ដែលកីឡាករព្រមកាត់ប្រាក់ខែរបស់ខ្លួន គឺនៅមានកីឡាករក្នុងក្លិបធំៗប្រចាំទ្វីបអឺរ៉ុបដទៃទៀត ក៏បានយល់ព្រមបន្ថយប្រាក់ប្រចាំខែរបស់ពួកគេផងដែរ ក្នុងនោះមានដូចជាកីឡាករក្នុងក្លិប Bayern Munich និង Borussia Dortmund នៅប្រទេស អាល្លឺម៉ង់ ជាដើម។
គួរបញ្ជាក់ថា តារាបាល់ទាត់ដែលមានប្រាក់ខែខ្ពស់ជាងគេនៅក្នុងក្រុម Juventus គឺខ្សែបម្រើប្រយុទ្ធសញ្ជាតិព័រទុយហ្គាល់ Cristiano Ronaldo ដែលធ្លាប់ឈ្នះពាន Ballon d''Or ចំនួន ៥ ដង និងខ្សែបម្រើសញ្ជាតិវេលស៍ Aaron Ramsey ដែលធ្វើដំណើរមកអ៊ីតាលី ដោយចាកចេញពីក្រុមកាំភ្លើងធំ Arsenal ជាមួយនឹងលក្ខខណ្ឌគ្មានតម្លៃខ្លួនកាលពីឆ្នាំមុន។
ជាមួយនឹងភាពមិនប្រាកដប្រជា ដែលកំពុងតែកើតមាននេះ កាលពីដើមសប្ដាហ៍កន្លងទៅ រដ្ឋមន្ត្រីផ្នែកកីឡារបស់ប្រទេស អ៊ីតាលី លោក Vincenzo Spadafora បាននិយាយថា លោកកំពុងតែសង្ស័យខ្លាំងមែនទែន ថាតើសកម្មភាពនៃការប្រកួតបាល់ទាត់ក្នុងក្របខ័ណ្ឌ Serie A អាចនឹងចាប់ផ្ដើមមានឡើងវិញ ដូចការរំពុងទុកនៅដើមខែឧសភា ឬយ៉ាងណា? AFP/VN