.jpg)
ក្រុមសមត្ថកិច្ចបាននាំយកអំណោយមកជួយដល់ក្រុមគ្រួសាររបស់ ម៉ន វិរៈ ក្នុងពេលធ្វើចត្តាឡីស័កនៅក្នុងផ្ទះ។
ភ្នំពេញ៖ អ្នកប្រដាល់ ម៉ន វិរៈ របស់ក្លិបព្រែកឯងកីឡា ដែលត្រូវបានរកឃើញថា មានផ្ទុកជំងឺកូវីដ១៩ តាំងពីថ្ងៃ ១៧ ខែមេសា ឆ្នាំ ២០២១ ហើយបានដឹកទៅសម្រាកព្យាបាលនៅមណ្ឌលព្យាបាលកោះពេជ្រនោះ គឺបានពិនិត្យសំណាកជាលើកទី ៣ នៅថ្ងៃចន្ទនេះ ដោយឃើញថា រូបគេបានជាសះស្បើយ គឺអវិជ្ជមានហើយត្រៀមចេញនៅល្ងាចនេះតែម្តង។
ជាមួយគ្នានេះ ក្រុមគ្រួសារនៅផ្ទះ រួមមានឪពុក ម្តាយ ប្រពន្ធ កូន និងប្អូនសរុបចំនួន ៩ នាក់ ដែលត្រូវបានអាជ្ញាធរបិទខ្ទប់មិនឱ្យចេញក្រៅពីផ្ទះបាននោះ គឺមានប្រជាពលរដ្ឋក្នុងភូមិជិតខាង ប៉ូលិស មេប៉ុស្តិ៍ ព្រមទាំងព្រះចៅអធិការវត្តចំនួន ២ បានយកស្បៀងអាហារទៅផ្គត់ផ្គង់ហូបចុកបានគ្រប់គ្រាន់ដល់ផ្ទះ។ នេះតាមការឱ្យដឹងពី ម៉ន សាម៉េត ជាបងបង្កើតរបស់ ម៉ន វិរៈ ដែលមានផ្ទះនៅក្បែរនោះ គឺភូមិចុងព្រែក សង្កាត់ព្រែកឯង ខណ្ឌច្បារអំពៅ។
កីឡាករ ម៉ន សាម៉េត បានប្រាប់ថា៖ «ពីដំបូង ខ្ញុំមានការព្រួយបារម្ភខ្លាំងនៅពេលទទួលដំណឹងថា ម៉ន វិរៈ ពិនិត្យឃើញវិជ្ជមានជំងឺកូវីដ១៩ កាលពីក្រោយចូលឆ្នាំ ព្រោះជីវភាពយើងជាអ្នកប្រដាល់ ពេលឡើងវ៉ៃ ទើបបានប្រាក់ចំណូលជួយគ្រួសារប្រពន្ធ កូន ហើយ ម៉ន វិរៈ វាមានកូន ៤ និងប្រពន្ធនៅក្នុងបន្ទុកទៅទៀត»។
កីឡាករ ម៉ន វិរៈ (អាវទឹកពណ៌ក្រូច) ពេលថតរួបរួមគ្នាជាមួយក្រុមអ្នកប្រដាល់ត្រកូល«ម៉ន» នាពេលកន្លងមក។
សាម៉េត បានបន្ថែមថា៖ «កង្វល់បន្ថែម គឺក្រុមគ្រួសាររបស់ខ្ញុំត្រូវជាប់ធ្វើចតាឡីស័កច្រើនថ្ងៃ មិនដឹងថា បានអ្វីហូបនោះទេ ប៉ុន្តែផ្ទុយទៅវិញ ក្រោយពីសារព័ត៌មានផ្សព្វផ្សាយរួចមក គឺមានបងប្អូនក្នុងភូមិ និងបងៗជាប៉ូលិសប៉ុស្តិ៍ព្រែកឯង និងព្រះសង្ឃបាននាំយកគ្រឿងហូបប្រចាំថ្ងៃ ជាបន្តបន្ទាប់ មិនដាច់ ធ្វើឱ្យជីវភាពហូបចុកក្នុងគ្រួសារមានលោកពុក ម៉ាង ម៉ន អ្នកម្តាយ,ប្រពន្ធ ម៉ន វិរៈ និងកូនទាំង ៤ ព្រមទាំង ម៉ន ព្រហ្មម៉ាញ និងប្រពន្ធទៀត សរុប ៩ នាក់បានហូបគ្រប់គ្រាន់ល្អណាស់»។
កីឡាករជើងចាស់រូបនេះបានបញ្ជាក់ថា៖ «រាល់ព្រឹក មានប៉ូលិស នៅចុងព្រែក ប៉ុស្តិ៍ព្រែកឯង មកឃ្លាំមើល និងចែកអាហារ មានអង្ករ មី ត្រីខ ព្រមទាំងរបស់ហូបផ្សេងៗ ពិសេសមានលោកព្រះចៅអធិការវត្តវាលស្បូវ ព្រះនាម អ៊ុក សារ៉ា និងព្រះចៅអធិការវត្ត ខេមរៈ ប៊ុណ្ណារាម ហៅវត្តថ្មី ព្រះនាម យ៉ា ដារិន តែងតែយកអាហារមកឱ្យរាល់ថ្ងៃ ធ្វើឱ្យគ្រួសារខ្ញុំ ដែលជាប់ក្នុងតំបន់ហាមឃាត់នេះ គឺទទួលបានហូបចុកគ្រប់គ្រាន់បានល្អប្រសើរ និងសប្បាយចិត្ត»។
ចំណែកលោក ម៉ាង ម៉ន ជាឪពុក និងជាគ្រូបង្វឹក ដែលមួយគ្រួសារពឹងផ្អែកលើប្រដាល់ទាំងអស់នោះបាននិយាយថា៖ «មុខរបរយើងខ្ញុំជាពូជអ្នកប្រដាល់ អ៊ីចឹងបើអត់បានឡើងប្រកួត គឺអត់អីហូបមែនហើយ ប៉ុន្តែការជាប់ឃុំក្នុងផ្ទះជិត ២០ ថ្ងៃ និងការខកខានប្រកួតចំនួន ៦ សប្តាហ៍មកហើយនេះ គឺបានបងប្អូនប្រជាពលរដ្ឋក្នុងភូមិចុងព្រែក និងព្រះសង្ឃ លោកដឹងតាមព័ត៌មានផ្សាយ ហើយបានមកជួយរាល់ថ្ងៃ ធ្វើឱ្យការហូបចុកបានគ្រប់គ្រាន់ ល្អប្រសើរ អត់មានក្តីបារម្ភទេ»។
ព្រះសង្ឃ បាននាំយកអំណោយមកជួយដល់ក្រុមគ្រួសារត្រកូល «ម៉ន» ពេលជាប់ឃុំក្នុងផ្ទះ។
លោកបានបន្តថា៖ «ចំណែក ម៉ន វិរៈ បានតេមកថា បន្តិចទៀតវាបានចេញមកហើយ ដោយគ្រូពេទ្យប្រាប់ថា ពិនិត្យសំណាក ៣ លើកចុងក្រោយ អស់មេរោគកូវីដ១៩ហើយ ពោលគឺរង់ចាំតែពេលវេលា គេឱ្យចេញប៉ុណ្ណោះ។ តាមកូននិយាយ ការព្យាបាលបាន ១៦ ថ្ងៃមកនេះ អស់កូវីដ១៩ គឺគេពិនិត្យសំណាកឡើងវិញចំនួន ៣ លើក ហើយគ្មានទៀតទេ»។
លោក ម៉ាង ម៉ន បានបន្ថែមថា៖ «ខ្ញុំអរគុណខ្លាំងដល់អ្នកព័ត៌មាន ដែលបានផ្សាយឱ្យគេដឹង ហើយគេមកជួយខ្ញុំ ពិសេសបងប្អូន ព្រមទាំងព្រះសង្ឃទាំង ២ វត្ត»។
ចំណែកកីឡាករ ម៉ន វិរៈ ផ្ទាល់ បានប្រាប់នៅរសៀលថ្ងៃចន្ទនេះថា៖ «ល្ងាចបន្តិច គេឱ្យខ្ញុំចេញហើយ ហើយក្នុងការស្នាក់នៅព្យាបាលជាច្រើនថ្ងៃនេះ គឺគេមើលថែទាំបានល្អ ហូបគ្រប់គ្រាន់»៕
