ភ្នំពេញៈ ប្រភេទកីឡាម្យ៉ាងដែលធ្លាប់មានវត្តមាននៅតាមមូលដ្ឋានក្នុងស្រទាប់មហាជន ដែលជាការនិយមភ្នាល់សាកកម្លាំងដៃគ្នា ឬហៅថា «កីឡាកាច់ដៃ» នោះត្រូវបានលោក មាស សារិន ទីប្រឹក្សាក្រសួងអប់រំ យុវជន និងកីឡា បានស្រាវជ្រាវចងក្រងបង្កើតជាសហព័ន្ធកីឡាជាតិថ្មីមួយនៅកម្ពុជា កាលពីថ្ងៃចន្ទហើយតាមឯកសារស្រាវជ្រាវផ្លូវការគឺកីឡាប្រភេទនេះមានជាសហព័ន្ធអន្តរជាតិយូរមកហើយ ពិសេសក្នុងប្រទេសទ្វីបអាស៊ីដោយមានសមាជិកជាង ២០ ប្រទេសកំពុងមានសកម្មភាព។
នៅក្នុងការបើកអង្គមហាសន្និបាតនៅទីស្នាក់ការ NOCC កាលពីថ្ងៃចន្ទគឺអង្គមហាសន្និបាតបានដាក់ឈ្មោះសហព័ន្ធនេះថា សហព័ន្ធកីឡាប្រយុទ្ធដៃកម្ពុជា ប៉ុន្តែមន្ត្រីជំនាញកីឡាបានផ្តល់យោបល់ឲ្យមានការកែប្រែឈ្មោះសហព័ន្ធនេះ ហើយបញ្ហានេះបានប្រែក្លាយមហាសន្និបាតនេះទៅជាមហាសន្និបាតត្រៀមទៅវិញដោយស្ថិតនៅក្នុងអន្តរកាលធ្វើការពិចារណាជ្រើសយកឈ្មោះថ្មីមួយទៀតឲ្យបានសមស្រប ដើម្បីកុំឲ្យជាន់ ឬត្រួតស៊ីគ្នាលើកីឡាប្រភេទដទៃ ដែលប្រកួតប្រើមធ្យោបាយដោយដៃដូចគ្នា។
តាមការត្រៀមសមាសភាពមន្ត្រីជាបេក្ខជនគណៈកម្មាធិការប្រតិបត្តិសហព័ន្ធកីឡាប្រយុទ្ធដៃកម្ពុជានេះមាន ១០ នាក់ក្នុងនោះមានលោក មាស សារិន ជាប្រធាន លោក ខៀវ ចានរ៉ា លោកជំទាវ លឹម ម៉ារីណា លោក សាមួន ដន និងលោក អ៊ឹម បញ្ញាវុធ ជាអនុប្រធានចំណែកលោក ប្រាក់ សុជាតិ ជាអគ្គលេខាធិការលោក សួស សីហា អគ្គលេខាធិការរង កញ្ញា មាស តឿ អគ្គលេខាធិការរង លោក គង់ សុភាព អគ្គហេរញ្ញិក និងកញ្ញា មាស ស្រីភាស់ ជា អគ្គហេរញ្ញិករង ក្នុងអាណត្តិទី ១ មានសុពលភាពពីឆ្នាំ ២០១៩ ដល់ឆ្នាំ ២០២៣។
តាមការឯកភាព និងពិភាក្សាបណ្តោះអាសន្នត្រូវបានទម្លាយចេញមកថា សហព័ន្ធកីឡាប្រយុទ្ធដៃនេះនឹងត្រូវប្តូរទៅជាសហព័ន្ធកីឡាហត្ថាកម្ពុជាវិញដែលសមទំនងជាង ហើយនឹងត្រូវប្រកាសជាថ្មី តែគណៈកម្មាធិការប្រតិបត្តិគឺនៅដដែល។
លោក វ៉ាត់ ចំរើន អគ្គលេខាធិការ NOCC ដែលបានចូលរួមក្នុងឱកាសនោះបានស្នើឲ្យរកឈ្មោះសហព័ន្ធនេះឲ្យប្រសើរសមរម្យល្អជាងនេះ ព្រោះអាចនឹងច្រឡំទៅនឹងកីឡាមួយចំនួនទៀតដែលប្រើដៃដូចគ្នា។ លោកបញ្ជាក់ថា៖ «តាមដែលយើងស្គាល់កីឡាប្រភេទនេះយើងធ្លាប់ហៅថាកាច់ដៃ ឬប្រកួតកាច់ដៃគ្នាដែលមាននៅក្នុងមូលដ្ឋានប្រជាពលរដ្ឋស្រាប់ ហេតុនេះខ្ញុំមានសុទិដ្ឋិនិយមគាំទ្រឲ្យមានលទ្ធភាព និងបង្កើតបាននូវសហព័ន្ធកីឡាជាតិបន្ថែមទៀតឲ្យបានច្រើន ប៉ុន្តែគប្បីសិក្សាលម្អិតពីរចនាសម្ព័ន្ធ ការគ្រប់គ្រង និងលក្ខខណ្ឌប្រកួតចងជាច្បាប់ ព្រមទាំងដឹងពីប្រវត្តិកីឡាប្រភេទនេះឲ្យបានច្បាស់លាស់»។
តាមឯកសារស្រាវជ្រាវរបស់លោក មាស សារិន ដែលជាប្រធានសហព័ន្ធ បានឲ្យដឹងថាកីឡាប្រយុទ្ធដៃមានប្រភពមកពីប្រទេសក្រិក និងមានលក្ខណៈស្តង់ដារតាមគោលការណ៍ច្បាប់កីឡាអន្តរជាតិ និងមានសកម្មភាពនិយមចូលចិត្តនៅលើពិភពលោកយ៉ាងច្រើន។ លោកបន្ថែមថា៖ «កីឡានេះបានកើតជាសហព័ន្ធអន្តរជាតិនៅឆ្នាំ ១៩៧៧ ហើយមានវត្តមាន និងបង្កើតឡើងនៅទ្វីបអាស៊ីនៅឆ្នាំ ២០០៤។ គិតមកដល់បច្ចុប្បន្ន Asian Arm Wrestling Federation (AAF) មានសមាជិក ២២ ប្រទេសដូចជា អារ៉ាប់រួម អ៊ីរ៉ង់ នេប៉ាល់ សិង្ហបុរី ចិន អ៊ីរ៉ាក់ ប៉ាឡេស្ទីន តៃវ៉ាន់ ម៉ាឡេស៊ី ជប៉ុន ឥណ្ឌូនេស៊ី ម៉ុងហ្គោលី និងនីហ្សេរីយ៉ា ជាដើម»៕