.jpg)
ការរត់ប្រណាំងចម្ងាយឆ្ងាយ ១២៨ គីឡូម៉ែត្រ ដែលត្រូវបានធ្វើឡើងទាំងយប់ និងបញ្ចប់នៅពេលថ្ងៃ។ CAMSOC
ភ្នំពេញ៖ ទិវារត់ប្រណាំងរត់ចម្ងាយឆ្ងាយ Angkor Ultra Trial លើកទី ៥ ឆ្នាំ ២០២០ នៅខេត្តសៀមរាប ដែលមានអ្នកចូលរួមមកពី ៤៥ ប្រទេសនោះ បានបញ្ចប់ដោយជោគជ័យស្របពេលមានកីឡាការិនីកម្ពុជា ២ នាក់ បានក្លាយជាម្ចាស់ជើងឯកលើវិញ្ញាសារត់ ៤២ គីឡូម៉ែត្រ និង ៣២ គីឡូម៉ែត្រ ប៉ុន្តែការរត់ចម្ងាយឆ្ងាយ ១២៨ គីឡូម៉ែត្រ លេខ ១ បានទៅកីឡាករបារាំង Guillon Antoine និងកីឡាការិនីបារាំង Messina Veronipue ក្រោយរត់ប្រណាំងគ្នាទាំងថ្ងៃទាំងយប់។
តាមរយៈការរត់ប្រណាំងគ្នាទាំងយប់ ហើយបានបញ្ចប់នៅថ្ងៃអាទិត្យនោះ កីឡាការិនីជើងចាស់ លី ណារី ដែលបានដកខ្លួនចេញពីការប្រកួតមួយរយៈពេលធំមកហើយនោះ បានវិលមកបង្ហាញភាពខ្លាំងជាថ្មី ដើម្បីក្លាយជាម្ចាស់ជើងឯកក្នុងការរត់ចម្ងាយ ៤២ គីឡូម៉ែត្រ ដោយប្រើថិរវេលា ៤:៥:១៥ ម៉ោង។ រីឯកីឡាការិនីកូនកាត់ខ្មែរ-បារាំង ឡូរី ក៏ដណ្ដើមបានលេខ ១ ផ្នែកនារីលើវិញ្ញាសារត់ចម្ងាយ ៣២ គីឡូម៉ែត្រផងដែរ ដោយប្រើពេល ២ ម៉ោង និង ៤២ នាទី។
ដោយឡែកសម្រាប់វិញ្ញាសាធំក្នុងព្រឹត្តិការណ៍ Angkor Ultra Trial លើចម្ងាយ ១២៨ គីឡូម៉ែត្រ លេខ ១ ផ្នែកបុរសបានទៅកីឡាករបារាំង Guillon Antoine ដោយប្រើថិរវេលា ១២:១២:៥៧ ម៉ោង លេខ ២ កីឡាករបារាំង Le Saux Christophe ចំណាយពេល ១៣:៤២:៣២ ម៉ោង។ ចំណែកឯផ្នែកនារី លេខ ១ បានទៅកីឡាការិនីបារាំង Messina Veronipue ប្រើពេល ១៧:៣០:២៦ ម៉ោង ខណៈលេខ ២ បានទៅកីឡាការិនីហុងកុង Cheng Yin Kwan ជាមួយនឹងថិរវេលា ២០:៤៤:៧ ម៉ោង។
ចំពោះវិញ្ញាសារត់ចម្ងាយ ៦៤ គីឡូម៉ែត្រផ្នែកបុរសលេខ ១ បានទៅកីឡាករបារាំង Dercourt Yohan ប្រើថិរវេលា ៥:១៨:៤៩ ម៉ោង លេខ ២ កីឡាករមកពីអង់គ្លេស King Ali ដោយចំណាយពេល ៥:៤៥:៤០ ម៉ោង ចំណែកផ្នែកនារីលេខ ១ បានកីឡាការិនីបារាំង Corne Katell ប្រើពេល ៦:៥៥:៣៨ ម៉ោង និងលេខ ២ កីឡាការិនីអង់គ្លេស Washington Harri ជាមួយថិរវេលា ៧:២២:០៥ វិនាទី។
លោកបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាប្រធាន NOCC បានថ្លែង នៅក្នុងពិធីបំពាក់មេដាយថា៖ «ព្រឹត្តិការណ៍កីឡា និងទេសចរណ៍មួយនេះ កម្ពុជាបានធ្វើជាម្ចាស់ផ្ទះ ៥ ឆ្នាំហើយ ដូច្នេះយើងមានការប្រារព្ធពិធីកាត់នំ ដើម្បីស្វាគមន៍ខួប ៥ ឆ្នាំ ដែលទទួលបានជោគជ័យ និងរលូន។ ក្នុងនាមក្រសួងទេសចរណ៍ និងគណៈកម្មាធិការជាតិអូឡាំពិកកម្ពុជា (NOCC) ក៏ដូចរាជរដ្ឋាភិបាលកម្ពុជា ខ្ញុំសូមបញ្ជាក់ថា ព្រឹត្តិការណ៍កីឡាដ៏ធំនេះ នាំឲ្យមានសកម្មភាពវិស័យទេសចរណ៍ជាតិ ពិសេសខេត្តសៀមរាប ដែលជាមូលដ្ឋានផ្ទាល់ទទួលបានផលចំណេញច្រើនពីកីឡា និងទេសចរណ៍ក្នុងការចូលរួមចំណែកស្រូបយកប្រាក់ចំណូលពីភ្ញៀវ»។
ចំណែកលោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC បានបង្ហាញនូវក្ដីសោមនស្សរីករាយខ្លាំងចំពោះកំណើនអ្នកចូលរួមព្រឹត្តិការណ៍ Angkor Ultra Trial ឆ្នាំ ២០២០ ដោយមានអ្នកចូលរួមសរុបចំនួន ១ ២៥៥ នាក់ មកពី ៤៥ ប្រទេស ហើយក្នុងនោះប្រជាពលរដ្ឋកម្ពុជាក៏មានចំនួនច្រើនជាងឆ្នាំមុន គួរឲ្យកត់សម្គាល់។
លោក វ៉ាត់ ចំរើន បានបញ្ជាក់ថា៖ «ក្នុងចំណោមអ្នកចូលរួមរត់ប្រណាំងទាំងអស់នៅក្នុងព្រឹត្តិការណ៍នេះ ប្រទេស បារាំង មានចំនួនច្រើនជាងគេ ឈរនៅលេខ ១ បន្ទាប់មកកម្ពុជា លេខ ២ ប្រទេស អង់គ្លេស លេខ ៣ និងប្រទេស កូរ៉េ ឈរនៅលេខ ៤ ហើយអ្វីដែលចាប់អារម្មណ៍ខ្លាំងនោះ គឺជនបរទេសចូលរួមរត់ឆ្នាំ ២០២០ នេះ បានបង្ហាញនូវការកោតសរសើរ ចំពោះការរៀបចំកាន់តែល្អទាំងផ្លូវរត់ និងការផ្ដល់នូវការស្វាគមន៍យ៉ាងកក់ក្ដៅពីថ្នាក់ដឹកនាំ និងពលរដ្ឋខ្មែរ ដែលផ្តល់នូវស្នាមញញឹមក្នុងការទទួលភ្ញៀវ»៕
