ភ្នំពេញ៖ គ្រូបង្វឹកសហព័ន្ធកីឡាគុនដាវកម្ពុជា កំពុងមានការព្រួយបារម្ភខ្លាំង ហើយបានអះអាងថា គម្រោងធំៗរបស់សហព័ន្ធទំនងមិនអាចដំណើរការទៅបាន ឬស្ថិតនៅក្នុងការរង់ចាំ បើសិនជាវិបត្តិជំងឺកូវីដ ១៩ នៅតែអូសបន្លាយ រយៈពេលវែង មិនទាន់បញ្ចប់បាន ខណៈគម្រោងប្រចាំឆ្នាំ ២០២១ នេះ មានការប្រកួតគុនដាវវេស្ទើនខាប់ លើកទី៣ ការប្រកួតថ្នាក់ជាតិ ការបើកវគ្គបណ្តុះបណ្តាល និងបញ្ជូនអត្តពលិកទៅហាត់នៅក្រៅប្រទេស ព្រមទាំងការចូលរួមប្រកួតស៊ីហ្គេម លើកទី៣១ នៅប្រទេសវៀតណាម នាចុងឆ្នាំ ២០២១ នេះ ដោយយើងមិនទាន់ហ៊ានវាយតម្លៃទេ។
លោក សុខ អាង គ្រូបង្វឹកជម្រើសជាតិកីឡាគុនដាវកម្ពុជាបានប្រាប់ថា៖ «កីឡាគុនដាវលំបាកនឹងវាយតម្លៃពីសមត្ថភាពក្នុងការចេញទៅប្រកួតនៅស៊ីហ្គេម ចុងឆ្នាំ ២០២១ នេះណាស់ ព្រោះវាជាប់ទាក់ទងទៅនឹងបញ្ហាចំនួន ៣ ទៅ ៤ ទៀត ពិសេសបញ្ហាកូវីដ មិនទាន់ថមថយហេតុនេះសហព័ន្ធ មិនអាចធ្វើសកម្មភាពបានដូចគម្រោងទេ។ អ៊ីចឹង នៅក្នុងផែនការយុទ្ធសាស្ត្ររបស់សហព័ន្ធ ដែលត្រូវធ្វើនៅក្នុងឆ្នាំនេះ គឺយើងមិនដឹងថា អនុវត្តបានប៉ុន្មានភាគរយ?»។
លោកបានបន្ថែមថា៖ «ការប្រកួតស៊ីហ្គេម ឆ្នាំនេះ គឺប្រភេទកីឡាគុនដាវម្ចាស់ផ្ទះវៀតណាម បានដាក់ឱ្យប្រកួតប្រជែងចំនួន ១២ វិញ្ញាសា ប៉ុន្តែគិតមកដល់ពេលនេះ សហព័ន្ធគុនដាវ មិនទាន់ទទួលបាន ឬការអនុញ្ញាតពីក្រសួងអប់រំ យុវជន និងកីឡា ឬស្ថាប័នពាក់ព័ន្ធកីឡាថា បានអនុញ្ញាតឱ្យចេញទៅប្រកួតប៉ុន្មានវិញ្ញាសា និងជ្រើសរើសយកវិញ្ញាសាណាខ្លះនៅឡើយទេ។ តែទោះជាយ៉ាងណា គុនដាវកម្ពុជាមានលទ្ធភាពអាចបញ្ជូនអត្តពលិកជម្រើសជាតិ ឬវិញ្ញាសាចំនួន ១០ ដើម្បីចូលរួមប្រកួតនៅវៀតណាម។
គ្រូបង្វឹករូបនេះ បញ្ជាក់ថា៖ «បញ្ហានេះ វាលំបាកឆ្លើយតប ពីព្រោះបើស្ថានភាពជំងឺកូវីដ ១៩ នៅតែបង្ក្រាបមិនបាន អ៊ីចឹងលទ្ធផលហាត់ហ្វឹកហ្វឺនក្តី ការរៀបចំការប្រកួតក្តី ពិសេសការបញ្ជូនអត្តពលិកទៅហ្វឹកហាត់នៅសហរដ្ឋអាមេរិក មិនអាចធ្វើបាន គឺប្រឈមខ្លាំងណាស់ដែលមិនអាចប៉ាន់ស្មានបានពីលទ្ធផលនោះឡើយ»។
លោក សុខ អាង ដែលជាអ្នកជំនាញផ្នែកគម្រោងប្រតិបត្តិកីឡាផងនោះ បានពន្យល់ពីបច្ចេកទេសថា៖ «លទ្ធផលកីឡាដែលល្អ វាចេញពីការហ្វឹកហាត់ តាមបទដ្ឋានបច្ចេកទេសល្អ, បង្កើតព្រឹត្តិការណ៍ប្រកួតឱ្យបានច្រើន និងបើកវគ្គបណ្តុះបណ្តុះបណ្តាល និងមានថវិកាទ្រទ្រង់សមរម្យផង។ ប៉ុន្តែបច្ចុប្បន្ន គុនដាវទទួលបានថវិកាពីក្រសួងអប់រំ ក្នុង ១ ឆ្នាំ សម្រាប់ចំណាយទៅលើ ៣ ចំណុច មានការបណ្តុះបណ្តាលការរៀបចំការប្រកួតថ្នាក់ជាតិ និងទំនាក់ទំនងរដ្ឋបាលចំនួនត្រឹម ៦០ លានរៀលប៉ុណ្ណោះ»។
អ្នកជំនាញរូបនេះ បានបញ្ជាក់ថា៖ «ចំនួននេះ វាស្តួចស្តើងបំផុត មិនអាចដំណើរការបានល្អទេ បើគ្មានវិស័យឯកជនជួយឧបត្ថម្ភ ព្រោះប្រទេសយើងក្រ។ បើនិយាយលម្អិតពីការចំណាយឱ្យចំគោលដៅ និងឱ្យមានប្រសិទ្ធភាពល្អ ទាំងទៅលើការហ្វឹកហាត់បណ្តុះបណ្តាលក្រៅប្រទេសរួមទាំងការរៀបចំប្រកួតឱ្យបានច្រើន តាមជាទម្រង់បែបវិទ្យាសាស្ត្រកីឡា ទីតាំង និងសម្ភារទំនើបនោះ គឺកីឡាគុនដាវកម្ពុជា ត្រូវការជាមធ្យមក៏ប្រាក់ចំនួន ២០០ លានរៀលដែរ ក្នុង ១ ឆ្នាំ»។
គួរបញ្ជាក់ថា សហព័ន្ធកីឡាគុនដាវកម្ពុជា ឆ្នាំ ២០២១ នេះ មានអត្តពលិកជម្រើសជាតិ ១០ នាក់ គ្រូបង្វឹក ៤ នាក់ ប៉ុន្តែនៅមានក្រុមអត្តពលិកបម្រុង ៦ នាក់បន្ថែមទៀត។ សហព័ន្ធនេះ មានចក្ខុវិស័យស្វែងរកអត្តពលិកវ័យក្មេងមានទេពកោសល្យ ជាពិសេសអ្នកមានកម្ពស់ចាប់ពី ១,៧៥ ម៉ែត្រឡើង តែមិនទាន់រកបាននូវគម្រោងចំណាយ៕