.jpg)
សកម្មភាពប្រកួតរវាងកីឡាករកម្ពុជា (ឆ្វេង) និងកីឡាករបរទេស ក្នុងព្រឹត្តិការណ៍គុនខ្មែរអន្តរជាតិកាលពីឆ្នាំ ២០១៧។ ស្រេង ម៉េងស្រ៊ុន
ភ្នំពេញ: កម្មវិធីប្រកួតកីឡាដ៏ធំអស្ចារ្យ ១ នឹងបើកឲ្យមានការប្រកួតដើម្បីអបអរសាទរពិធីសម្ពោធវិមានឈ្នះឈ្នះ រំឭកខួបឆ្នាំទី ២០ នៃការបញ្ចប់សង្គ្រាម ស៊ីវិលនៅកម្ពុជា ក្នុងពហុកីឡដ្ឋានជាតិមរតកតេជោ នៅខណ្ឌឫស្សីកែវ រាជធានីភ្នំពេញ ដែលសម្រិតសម្រាំងកីឡាល្បីៗ ពេញនិយម និងប្លែកចំនួន ១២ ប្រភេទ សម្រាប់ការប្រកួតរយៈពេល ៤ ថ្ងៃពេញនាចុងខែធ្នូ ឆ្នាំ ២០១៨។ នេះបើយោងទៅតាមប្រភពច្បាស់ការពីគណៈកម្មាធិការជាតិអូឡាំពិកកម្ពុជា ប្រាប់ភ្នំពេញ ប៉ុស្តិ៍។
លោកវ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជាគណៈកម្មការគ្រប់គ្រងកីឡា មានប្រសាសន៍ប្រាប់ភ្នំពេញ ប៉ុស្តិ៍ កាលពីម្សិលមិញថា៖ «នៅក្នុងពិធីសម្ពោធវិមានឈ្នះឈ្នះ ដែលបានសាងសង់ រួចរាល់នៅក្នុងបរិវេណពហុកីឡដ្ឋានមរតកតេជោ នឹងដាក់ឲ្យមានការប្រកួតកីឡាចំនួន ១២ ប្រភេទ»។
អគ្គលេខាធិការរូបនេះបានប្រាប់បន្តថា៖ «កីឡាទាំងនោះសុទ្ធសឹងជាកីឡាពេញនិយម និងប្លែកអារម្មណ៍ ដោយបើកទូលាយឲ្យមហាជនបានទស្សនា ដោយមិនគិតថ្លៃចាប់ពីថ្ងៃទី ២៨ ដល់ថ្ងៃទី ៣១ ខែធ្នូ ឆ្នាំ ២០១៨»។
លោកវ៉ាត់ ចំរើន បានបញ្ជាក់ថា៖ «កីឡាចំនួន ១២ ប្រភេទដែលដាក់ឲ្យប្រកួតនោះមានកីឡាប្រដាល់ លក្ខណៈដណ្តើមខ្សែក្រវាត់ពិភពលោកច្រើនជាង ១០ ប្រទេស។ កីឡាប្រណាំងកង់ បាល់ទះឆ្នេរខ្សាច់ អុកចត្រង្គ ល្បុក្កតោ ចំបាប់បុរាណ វាយកូនគោល ប្រណាំងសេះ ប្រណាំងរទេះគោ និងក្របី កីឡាកាយវប្បកម្ម និងការប្រកួតកីឡាបុរសខ្លាំងពិភពលោក»។
លោកវ៉ាត់ ចំរើន ដែលជាអ្នកជំនាញរៀបចំព្រឹត្តិការណ៍កីឡា បានបញ្ជាក់បន្ថែមទៀតថា៖ «យើងខិតខំប្រឹងប្រែងស្វែងរកកីឡាពេញនិយម និងប្លែកៗដើម្បីជាចំណីអារម្មណ៍របស់មហាជន ពីព្រោះកីឡាជាចំណីអារម្មណ៍សំខាន់របស់អ្នកទេសចរ ហើយភាពដដែលៗ ធ្វើឲ្យអ្នកទស្សនាធុញទ្រាន់ និងឈានទៅបរាជ័យ»។
លោកតែម ម៉ឺន ដែលជាអគ្គលេខាធិការរងនៃគណៈកម្មាធិការជាតិអូឡាំពិកកម្ពុជា និងជាប្រធានសហព័ន្ធកីឡាប្រដាល់គុនខ្មែរ បានឲ្យដឹងថា៖ «នៅក្នុងចំណោមកីឡាដែលដាក់ឲ្យ ប្រកួតជាច្រើនប្រភេទនោះ គឺមានកីឡាប្រដាល់ជាលក្ខណៈមិត្តភាពជាតិ មិត្តភាពអន្តរជាតិ និងដណ្តើមខ្សែក្រវាត់កម្រិតពិភពលោកផងដែរ»។
លោកបានប្រាប់បន្តថា៖ «កីឡាកររបស់កម្ពុជាខ្លាំងៗ និងមានប្រជាប្រិយចំនួន ២០ នាក់ បានត្រៀមខ្លួនសម្រាប់ការផ្គូផ្គងក្នុងពេលខាងមុខ ក្រោយពេលដែលយើងទទួលបានសមាសភាព អ្នកប្រដាល់មកពីប្រទេសនានាសិន»។
លោកតែម ម៉ឺន បានបញ្ជាក់បន្ថែមថា៖ «ជាមួយគ្នានេះ សម្រាប់គូដណ្តើមយកខ្សែក្រវាត់លំដាប់ពិភពលោក យើងបានត្រៀមប្រភេទទម្ងន់មាន ៥៧, ៦០, ៦៣,៥, ៦៥,៦៧, ៦៩ និង ៧១ គីឡូក្រាម ដែលមានរូបមន្តប្រកួតជម្រុះម៉ារ៉ាតុង។ អ្នកឈ្នះជួបអ្នកឈ្នះដណ្តើមយកខ្សែក្រវាត់តែម្តង»។
ក្រៅពីដណ្តើមខ្សែក្រវាត់ មានគូប្រកួតលក្ខណៈមិត្តភាពជាតិ និងមិត្តភាពអន្តរជាតិ ទៅតាមប្រភេទទម្ងន់ដែលការ ប្រកួតមានរយៈពេលចំនួន ៤ ថ្ងៃ ក្នុងនោះគុនខ្មែរពិភពលោកមានរយៈពេល ៣ ថ្ងៃ ចាប់ពីថ្ងៃទី ២៨ ដល់ទី ៣០ ខែធ្នូ ឆ្នាំ ២០១៨។ ថ្ងៃចុងក្រោយទី ៣១ ខែធ្នូ ឆ្នាំ ២០១៨ មានការប្រកួតអន្តរជាតិឈ្មោះថា ហ្វៃខ្មែរ ដែលនឹងមានការផ្សាយផ្ទាល់ពីទូរទស្សន៍កងយោធពលខេមរភូមិន្ទ ប៉ុស្តិ៍លេខ ៥ ទាំង ៤ ថ្ងៃ។ លោកម៉ាម រ៉ា ប្រធានសហព័ន្ធកីឡាប្រដាល់គុនខ្មែរអន្តរជាតិ និងជាទីប្រឹក្សាជាន់ខ្ពស់នៃគណៈកម្មាធិការជាតិអូឡាំពិកកម្ពុជា គឺជាអ្នកផ្គូផ្គងដឹកនាំសម្របសម្រួលខាងកីឡាករមកពីបរទេស»។
លោកបានប្រាប់ថា លោកបានផ្សព្វផ្សាយជូនដំណឹងទៅកាន់ប្រទេសនានា ជិត ៥០ ប្រទេស ដើម្បីឲ្យគេចូលរួមក្នុងព្រឹត្តិការណ៍កីឡាដ៏ធំនេះ ប៉ុន្តែការឆ្លើយតបមិនទាន់បានច្រើននៅឡើយទេ។
លោកម៉ាម រ៉ា បានឲ្យដឹងថា៖ «នៅថ្ងៃទី ១០ ខែវិច្ឆិកា ឆ្នាំ ២០១៨ យើងនឹងបញ្ចប់ការសុំចុះឈ្មោះ ហើយថ្ងៃទី ១៥ ខែវិច្ឆិកា ឆ្នាំ ២០១៨ យើងរៀបចំផ្គូផ្គង»។
ប៉ុន្តែ ទោះជាយ៉ាងណា បើគិតត្រឹមពេលបច្ចុប្បន្ននេះ មានប្រទេសចំនួន ១០ ហើយដែលបានធ្វើទំនាក់ទំនងចុះឈ្មោះប្រកួតមានកម្ពជា ជាម្ចាស់ផ្ទះ អ៊ីរ៉ង់ ឥណ្ឌា នេប៉ាល់ វៀតណាម ឡាវ ថៃ មីយ៉ាន់ម៉ា ម៉ាឡេស៊ី និងប្រទេសហ្វីលីពីន។
ព្រឹត្តិការណ៍កីឡាលំដាប់អន្តរជាតិបែបនេះមានឈ្មោះថា គុនខ្មែរអន្តរជាតិលើកទី ១ ត្រូវបានរៀបចំឡើងម្តង ហើយកាលពីថ្ងៃទី ៨ ដល់ទី ១០ ខែវិច្ឆិកា ឆ្នាំ ២០១៧ នៅក្នុងពហុកីឡដ្ឋានជាតិអូឡាំពិក ដោយទទួលបានលទ្ធផលល្អ ហើយនេះជាលើកទី ២ ដែលនឹងធ្វើឡើងក្នុងពិធី អបអរសាទរសម្ពោធវិមានឈ្នះឈ្នះ នៅពហុកីឡដ្ឋានមរតកតេជោ នាថ្ងៃទី ២៨ ដល់ទី ៣១ ខែធ្នូ ឆ្នាំ ២០១៨ រយៈពេល ៤ ថ្ងៃ ជាមួយប្រភេទកីឡាទាំងអស់ចំនួន ១២ ប្រភេទ៕
