ភ្នំពេញៈ ព្រឹត្តិការណ៍ប្រចាំឆ្នាំបុណ្យទន្លេលើកទី ៥ ដែលផ្លាស់វេនទៅដល់ខេត្តកំពង់ឆ្នាំងនាពាក់កណ្តាលខែមីនា ឆ្នាំ ២០១៩ នេះក្រោមប្រធានបទ «ទន្លេផ្សារភ្ជាប់សន្តិភាពប្រជាជន និងទេសចរណ៍» នោះត្រូវបានគណៈកម្មការរៀបចំបុណ្យទន្លេ ដែលទទួលបានការអនុញ្ញាតពីរាជរដ្ឋាភិបាលបានប្រាប់ថា នឹងមានដាក់កីឡា ១២ ប្រភេទឲ្យចូលរួមប្រកួតជូនមហាជនទស្សនាដោយសេរី ដើម្បីបង្កភាពសប្បាយរីករាយ ហើយការតាំងពិព័រណ៍ផលិតផលជាស្នាដៃរបស់ជាតិ និងពាណិជ្ជកម្មផ្សេងៗក៏ត្រូវដាក់បង្ហាញក្នុងឱកាសនោះដែរ។
លោក វ៉ាត់ ចំរើន ប្រធានអនុគណៈកម្មការកីឡាបុណ្យទន្លេ និងជារដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC បានថ្លែងប្រាប់ភ្នំពេញ ប៉ុស្តិ៍ថា៖ «បុណ្យទន្លេឆ្នាំនេះនឹងប្រព្រឹត្តទៅ ៣ ថ្ងៃពីថ្ងៃទី ១៥ ដល់ទី ១៧ ខែមីនានៅក្នុងក្រុងកំពង់ឆ្នាំង ខេត្តកំពង់ឆ្នាំង ហើយក្នុងពេល ៣ ថ្ងៃនេះ NOCC បានសហការជាមួយសហព័ន្ធកីឡាជាតិត្រៀមរួចរាល់ហើយនូវកីឡាចំនួន ១២ ប្រភេទដើម្បីប្រកួតប្រជែងក្នុងព្រឹត្តិការណ៍ដ៏ទាក់ទាញមួយនេះ»។
លោកបានលម្អិតពីប្រភេទកីឡា និងទីតាំងប្រកួតថាទី ១ កីឡារត់ប្រណាំងកម្សាន្តដោយមានរត់ ៣ គីឡូម៉ែត្រ និង ៥ គីឡូម៉ែត្រចាប់ផ្តើមនៅម៉ោង ៦ ព្រឹកនាថ្ងៃទី ១៥ ខែមីនាដោយចាប់ផ្តើមពីចំណុចរូបសំណាកពុទ្ធសែននាងកង្រី និងបញ្ចប់នៅទីនោះវិញ ប៉ុន្តែនេះជាការរត់លក្ខណៈមហាជនសប្បាយរីករាយ និងសុខភាពគឺគ្មានសំដៅរកជើងឯក ឬរង្វាន់ជយលាភីជាធំនោះឡើយដែលភាគច្រើនជាសិស្សានុសិស្ស។
ចំណែកទី ២ កីឡាបាល់ទាត់មានការប្រកួត ៣ ថ្ងៃពេញនៅកីឡដ្ឋានខេត្តកំពង់ឆ្នាំងគឺចាប់ពីម៉ោង ៨ ព្រឹកដល់ម៉ោង ១ រសៀល និងចាប់ពីម៉ោង ៣ ដល់ម៉ោង ៥ ល្ងាចទី ៣ កីឡាបាល់ទះប្រកួត ៣ ថ្ងៃពេញដែរ នៅកីឡដ្ឋានខេត្តពីម៉ោង ១៥ ដល់ម៉ោង ១៧។ ទី ៤ កីឡាចំបាប់បុរាណប្រកួត ៣ ថ្ងៃពេញនៅកីឡដ្ឋានខេត្តចាប់ពីម៉ោង ១៧ ដល់ម៉ោង ២០ ហើយទី ៥ កីឡាទាញព្រ័ត្រ ប្រកួតនៅថ្ងៃទី ១៥ និងទី ១៦ ខែមីនា ពីម៉ោង ១៥ ដល់ម៉ោង ១៧ នៅកីឡដ្ឋានខេត្ត និងទី ៦ កីឡាវាយសី ប្រកួត ៣ ថ្ងៃពេញនៅទីលានសាលាខេត្តកំពង់ឆ្នាំងចាប់ពីម៉ោង ៨ ដល់ម៉ោង ១១។
ទី ៧ កីឡាប្រណាំងសេះរយៈពេល ១ ថ្ងៃចុងក្រោយពីវេលាម៉ោង ១៥ ដល់ម៉ោង ១៧ នៅឃុំស្វាយជ្រំក្អមមាសទី ៨ កីឡាជិះកង់កម្សាន្តប្រកួតនៅថ្ងៃទី ១៦ ខែមីនានៅរូបសំណាកពុទ្ធសែននាងកង្រីពីម៉ោង ៧ ដល់ ម៉ោង ៩ ព្រឹក។ រីឯទី ៩ ប្រដាល់គុនខ្មែរពីថ្ងៃទី ១៥ ដល់ទី ១៦ ខែមីនានៅកីឡដ្ឋានខេត្ត ដោយមានការផ្សាយផ្ទាល់តាមទូរទស្សន៍ប៉ុស្តិ៍លេខ ១១ ទី ១០ ប្រណាំងទូកនៅមាត់ទន្លេចាប់ពីរសៀលម៉ោង ២ តទៅ ទី ១១ កីឡាបាល់បោះពីថ្ងៃ ១៥ ដល់ទី ១៦ ខែមីនានៅកីឡដ្ឋានខេត្តពីម៉ោង ១៥ ដល់ម៉ោង ១៧ ហើយទី ១២ កីឡាល្បុក្កតោប្រកួតនៅថ្ងៃទី ១៦ និងទី ១៧ ខែមីនានៅពហុកីឡដ្ឋានខេត្តពីម៉ោង ១៧ ដល់ម៉ោង ១៨។
ជុំវិញមតិមហាជនដែលចង់រៀបចំការប្រកួតប្រដាល់គុនខ្មែរឲ្យបានធំនោះ លោក វ៉ាត់ ចំរើន បានបកស្រាយថានៅក្នុងចំណោមកីឡាទាំង ១២ ប្រភេទនេះប្រដាល់គុនខ្មែរចំណាយធំជាងគេ អ៊ីចឹងបើយើងរៀបចំឲ្យធំតាមការចង់បានរបស់មហាជននោះ វាចំណាយច្រើនគឺអាចនិយាយថាការចំណាយតែប្រដាល់មួយអាចធ្វើកីឡាប្រភេទផ្សេងៗបានជិត ១០ ឯណោះ ហេតុនេះយើងរៀបចំក្នុងលក្ខណៈថ្នាក់មិត្តភាពជាតិដែលផ្តល់ឱកាសឲ្យកីឡាករមានសមត្ថភាពទាប និងមធ្យមបានប្រកួតផង។
លោកបន្ថែមថា៖ «ការចំណាយថវិការបស់ជាតិគឺមានកំណត់ច្បាស់លាស់ មិនអាចយកទៅប្រៀបធៀបនឹងការប្រកួតរបស់វិស័យឯកជនដែលគេសម្រួចឆ្ពោះទៅលើការផ្សាយពាណិជ្ជកម្មជាធំនោះទេ ព្រោះយើងធ្វើក្នុងលក្ខណៈបច្ចេកទេសស្របតាមគោលការណ៍ និងច្បាប់កីឡា ខណៈអត្តពលិកដែលចូលរួមមានទស្សនៈជាលក្ខណៈស្ម័គ្រចិត្ត ពេញចិត្ត មិនគិតពីផលប្រយោជន៍បុគ្គលជាធំ»៕