ភ្នំពេញ: គណៈកម្មាធិការកណ្តាលនៃព្រឹត្តិការណ៍ប្រកួតកីឡាជាតិលើកទី ២ ឆ្នាំ២០១៨ កាលពីព្រឹកថ្ងៃ ទី ១៣ ខែឧសភាឆ្នាំ ២០១៨ នៅពហុកីឡដ្ឋានជាតិអូឡាំពិកកម្ពុជា បានធ្វើការចាប់ពូលសម្រាប់កីឡាចំនួន ៤ ប្រភេទដែលប្រភេទកីឡាជាក្រុម រួមមានកីឡាបាល់ទាត់ កីឡាបាល់ទះ កីឡាបាល់បោះ និងកីឡាសីដក់។
ក្នុងកម្មវិធីនេះ គណៈអធិបតីអញ្ជើញចូលរួមជាសាក្សីមាន លោកព្រហ្ម ប៊ុណ្ណយី ទីប្រឹក្សាក្រសួង អប់រំ យុវជន និងកីឡា លោកហ៊ុន សាមុត ប្រធាន នាយកដ្ឋានកីឡា រួមជាមួយនឹងមន្ត្រីបច្ចេកទេសរបស់សហព័ន្ធទាំង ៤ ព្រមទាំងប្រតិភូមកពីក្លិបសមាគមទាំងអស់ ទូទាំងប្រទេស។
លោកហ៊ុន សាមុត មានប្រសាសន៍កាលពីព្រឹកម្សិលមិញថា៖ «សម្រាប់ការចាប់ពូលក្នុងកីឡាចំនួន ៤ ប្រភេទនេះមុនគេ ដោយសារតែជាប្រភេទពិបាកជាងគេ ប្រសិនបើប្រៀបធៀបទៅនឹងកីឡាដទៃក្នុងប្រភេទកីឡាផ្សេងៗទៀត ព្រោះយើងត្រូវបែងចែកចេញជាពូលដែលមានច្រើនពូលផងដែរ»។
នៅក្នុងពិធីចាប់ឆ្នោតនោះ លោកបានឲ្យដឹងថា៖ «ប្រភេទបាល់ទាត់មានក្រុមបាល់ទាត់បុរសមាន ២៤ ក្រុម ចែកចេញជា ៨ ពូល និងក្រុមបាល់ទាត់នារី ៩ ក្រុម ហើយកីឡាបាល់ទះមានក្រុមបាល់ទះបុរសមាន ១៤ ក្រុម ចែកចេញជា ៤ ពូល និងក្រុមបាល់ទះនារី ១៣ ក្រុម ចែកចេញជា ៨ ពូល រីឯ កីឡាបាល់ទះឆ្នេរខ្សាច់ មាន ៨ ក្រុមបុរសចែកចេញជា ២ ពូល»។
ដោយឡែកកីឡាបាល់បោះវិញ ក្រុមបាល់បោះបុរសមាន ១៣ ក្រុម ចែកចេញជា ៤ ពូល ខណៈដែលក្រុមបាល់បោះនារីមាន ៨ ក្រុម ចែកចេញជា ២ ពូលដែរ។
ចំពោះប្រភេទកីឡាសីដក់ មានក្រុមសីដក់បុរសមាន ១០ ក្រុម និងក្រុមបាល់សីដក់នារី ៥ ក្រុម ក្នុងនោះក្រុមសីដក់បុរស ចែកចេញជា ២ វិញ្ញាសាទៀត ដោយមាន ៣ នាក់ទល់ ៣ នាក់ និង ២ នាក់ទល់ ២ នាក់ ខណៈដែលក្រុមបាល់សីដក់នារី ក៏ចែកចេញដូចក្រុមបុរសដែរ។
គួរបញ្ជាក់ថា ព្រឹត្តិការណ៍កីឡាជាតិលើកទី ២ ឬ National Games ឆ្នាំ ២០១៨ នឹងត្រូវចាប់បើកការប្រកួតជាផ្លូវការនៅថ្ងៃទី ២៥ ខែឧសភា ឆ្នាំ ២០១៨ ហើយនឹងបិទនៅថ្ងៃ ៤ ខែមិថុនា ឆ្នាំ ២០១៨ ក្រោមអធិបតីភាពលោកនាយករដ្ឋមន្ត្រីហ៊ុន សែន ដែលមានស្ថាប័នចំនួន ២៨ ចូលរួមមកពីខេត្តចំនួន ២៥ និងក្រសួងចំនួន ៣ មានអត្តពលិកចំនួនជាង ៤០០០ នាក់៕