ភ្នំពេញ៖ មន្ត្រីជំនាញបច្ចេកទេស ដែលជានាយបេសកកម្ម និងជាប្រធានគណៈកម្មការទទួលខុសត្រូវរួម ក្នុងការប្រកួតស៊ីហ្គេម បានបង្ហើបឲ្យដឹងថា ព្រឹត្តិការណ៍ប្រកួតស៊ីហ្គេម លើកទី ៣០ នៅប្រទេស ហ្វីលីពីន នាចុងឆ្នាំ ២០១៩ នេះ កម្ពុជាបានត្រៀមរួចរាល់នូវកីឡាចំនួន ៣០ ប្រភេទ សម្រាប់ចូលរួមប្រកួតវិញ្ញាសាចំនួន ១៧៩ ហើយនៅក្នុងនោះ កីឡាចំនួន ៩ ប្រទេស គឺមានសក្តានុពលខ្ពស់ ក្នុងការដណ្តើមបានមេដាយ ជូនប្រទេសជាតិ។
លោក វ៉ាត់ ចំរើន ជានាយបេសកកម្ម ក្នុងការដឹកនាំការប្រកួតស៊ីហ្គេម ដែលមានបទពិសោធរយៈពេល ១០ ឆ្នាំនោះ បានប្រាប់ភ្នំពេញ ប៉ុស្តិ៍ ថា៖ «នៅក្នុងចំណោមប្រភេទកីឡាទាំង ៣០ ប្រទេស ដែលយើងនឹងបញ្ជូនឲ្យទៅចូលរួមការប្រកួតស៊ីហ្គេម នៅប្រទេស ហ្វីលីពីន ចុងឆ្នាំ ២០១៩ ខាងមុខនេះ គឺកីឡាចំនួន ៩ ប្រភេទ មានសក្តានុពលខ្ពស់ និងលទ្ធភាព ក្នុងការដណ្តើមបានមេដាយជូនប្រទេសជាតិ»។
ចំពោះប្រភេទកីឡាទាំង ៩ ដែលលោក វ៉ាត់ ចំរើន វាយតម្លៃថា អាចមានលទ្ធភាពដណ្តើមបានមេដាយពីការប្រកួតស៊ីហ្គេម លើកនេះ គឺទី១ កីឡាតេក្វាន់ដូ ដែលនឹងបញ្ជូនកីឡាករ ៧ នាក់ កីឡាការិនី ៧ នាក់ ទៅប្រកួត ទី២ កីឡាប៉េតង់ មានកីឡាករ ៦ នាក់ កីឡាការិនី ៦ នាក់ ទី៣ កីឡាជឺជិតស៊ូ មានកីឡាករ ២ នាក់ កីឡាការិនី ២ នាក់ និងទី៤ កីឡាប្រដាល់គុនខ្មែរ ដែលនឹងបញ្ជូនកីឡាករ ៤ នាក់ កីឡាការិនី ១ នាក់ ទៅប្រកួត។
ចំណែកទី ៥ កីឡាសីដក់ នឹងបញ្ជូនកីឡាករ ៩ នាក់ ទៅប្រកួត ទី៦ កីឡាប្រដាល់សកល មានកីឡាករ ៥ នាក់ កីឡាការិនី ៣ នាក់ ទី៧ កីឡាវាយកូនបាល់ មានកីឡាករ ៤ នាក់ កីឡាការិនី ៣ នាក់ ទី៨ កីឡាគុនល្បុក្កតោ ដែលត្រូវប្រកួតកីឡា Arnis នោះ មានកីឡាករ ៥ នាក់ កីឡាការិនី ៥ នាក់ និងកីឡាចំបាប់ ដែលនឹងបញ្ជូនកីឡាករ ៩ នាក់ និងកីឡាការិនីចំនួន ៣ នាក់ ទៅការប្រកួតស៊ីហ្គេមលើកនេះ បន្ទាប់ប្រភេទកីឡាមួយនេះ ត្រូវបានដកចេញពីស៊ីហ្គេម កាលពីឆ្នាំ ២០១៥ និងឆ្នាំ ២០១៧ កន្លងមក។
លោក វ៉ាត់ ចំរើន បានបន្ថែមថា៖ «ចំណែកកីឡា ដែលមានប្រជាប្រិយមានបាល់ទះលើក្តារ បាល់ទះឆ្នេរខ្សាច់ បាល់ទាត់ U22 និងបាល់បោះ។ ចំណែកប្រភេទកីឡា ដែលចាំបាច់ មិនអាចខ្វះបាន មានហែលទឹក និងកីឡាអត្តពលកម្ម ប៉ុន្តែប្រភេទកីឡាទាំង ២ នេះ លំបាកប្រជែងយកមេដាយណាស់ ហើយកីឡាចំនួន ៤ ទៀត ដែលមិនស្ថិតនៅក្នុងការប្រមូលផ្តុំ រួមមានកីឡាហុកគី កីឡាអេឡិចត្រូនិក (E-Sports), ឃីក បុកស៊ីង និងបេស្បល ក៏នឹងត្រូវបង្ហាញវត្តមាន នៅក្នុងការប្រកួតស៊ីហ្គេម លើកទី ៣០ នេះផងដែរ»។
សម្រាប់បញ្ជីឈ្មោះប្រភេទកីឡាទាំង ៣០ ដែលនឹងត្រូវបញ្ជូនទៅប្រកួតស៊ីហ្គេម លើកទី ៣០ ឆ្នាំ ២០១៩ ដោយមានការចុះហត្ថលេខាទទួលស្គាល់ដោយលោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា នោះ គឺរួមមានកីឡាបាល់ទះឆ្នេរខ្សាច់, បាល់ទាត់ U22, បាល់បោះ, អត្តពលកម្ម, ហែលទឹក, កាយសម្ព័ន្ធ, វាយកូនឃ្លីលើតុ, វាយសី, ទោចក្រយាន, គុនដាវ, វាយកូនហ្គោល, ទូកក្ដោង, ការ៉ាតេ, យូដូ, ទ្រីយ៉ាត្លុង, កីឡារាំ, សូហ្វតិន្នីស, ទូកប្រពៃណីកានូ, ឃីកបុកស៊ីង (Kick Boxing), កីឡា E-Sports, កីឡាហុកគី, តេក្វាន់ដូ WT, ប៉េតង់, ជឺជិតស៊ូ.កីឡាប្រដាល់គុនខ្មែរ, កីឡាសីដក់, ប្រដាល់សកល, វាយកូនបាល់, កីឡាគុនល្បុក្កតោ និងកីឡាចំបាប់ ហើយយើងតាមរយៈឯកសារ ផ្លូវការ ដែលភ្នំពេញប៉ុស្តិ៍ទទួលបាន គឺនៅក្នុងប្រតិភូកីឡាដែលនឹងត្រូវបញ្ជូនទៅចូលរួម ចំនួន ៣៩៩ នាក់នោះ មានអត្តពលិក ២៧៦ នាក់ (ស្រី ៦៩ នាក់) ថ្នាក់ដឹកនាំ និងមន្ត្រីកីឡាចំនួន ៤១ នាក់,អ្នកដឹកនាំក្រុម ៩ នាក់ (ប្រធាន ឬអគ្គលេខាធិការ) គ្រូបង្វឹក និង គ្រូជំនួយចំនួន ៦៧ នាក់ ព្រមទាំងអ្នកដែលជាប់ឈ្មោះទៅធ្វើជាអាជ្ញាកណ្តាលអន្តរជាតិចំនួន ៦ នាក់៕