.jpg)
កីឡាការិនី Roth Sokunthea Sam ដែលអាចនឹងមកប្រកួតតំណាងឲ្យកម្ពុជា លើវិញ្ញាសារត់ល្បឿន ១០០ ម៉ែត្រ។ រូបភាព យឺន ពន្លក
ភ្នំពេញៈ ស្របតាមគោលនយោបាយកីឡាបើកទូលាយ របស់គណៈកម្មាធិការជាតិអូឡាំពិកកម្ពុជា (NOCC) និងក្រសួងអប់រំ យុវជន និងកីឡា ក្នុងការស្វែករកអត្តពលិកឆ្នើម ដែលជាកូនខ្មែរនៅក្រៅប្រទេស មានសមត្ថភាព និងកម្រិតបច្ចេកទេសល្អឲ្យចូលរួមចំណែក ដើម្បីធ្វើឲ្យការប្រកួតស៊ីហ្គេម ឬអន្តរជាតិនានា ទទួលបានលទ្ធផលល្អនោះ កាលពីព្រឹកថ្ងៃព្រហស្បតិ៍នេះ លោក វ៉ាត់ ចំរើន បានជួបកីឡាការិនីរត់ប្រណាំង Roth Sokunthea Sam ដែលជាកូនខ្មែរនៅអាមេរិក ដើម្បីលើកទឹកចិត្តឲ្យមកចូលរួមលេងតំណាងឲ្យកម្ពុជា នៅលើឆាកអន្តរជាតិ នាពេលអនាគត។
ដោយមានអាយុ ២០ ឆ្នាំ កីឡាការិនី Roth Sokunthea មានឱពុកម្តាយ មានដើមកំណើតនៅខ្មែរ ហើយបច្ចុប្បន្ន នាងកំពុងសិក្សាផ្នែកពាណិជ្ជកម្មឆ្នាំទី ៣ នៅសាកលវិទ្យាល័យCalifonia State University, Northridge។ ជាមួយគ្នា Roth Sokunthea បាននឹងកំពុងតែហ្វឹកហាត់ និងលេងកីឡាវិញ្ញាសារត់ល្បឿន ១០០ ម៉ែត្រ ដោយទទួលបានលទ្ធផលល្អគួរកត់សម្គាល់ទៀតផង។
នៅក្នុងជំនួបសម្ភាសជាមួយលោក វ៉ាត់ ចំរើន អគ្គលេខាធិការ NOCC កាលពីព្រឹកថ្ងៃព្រហស្បតិ៍នេះ Roth Sokunthea បានប្រាប់ថា នាងចូលលេងកីឡារត់ប្រណាំងនេះ តាំងពីកុមារភាព និងបានចូលប្រកួតក្នុងព្រឹត្តិការណ៍កីឡាថ្នាក់សកលវិទ្យាល័យ នៅសហរដ្ឋអាមេរិកទទួលបានចំណាត់ថ្នាក់ល្អ។
កញ្ញា Roth Sokunthea ដែលបានមកដល់ប្រទេសកម្ពុជា កាលពីថ្ងៃពុធនោះបានបន្ថែមថា៖«កម្រិតបច្ចេកទេសរបស់ខ្ញុំ ដែលល្អជាងគេ ក្នុងការរត់ល្បឿន ១០០ ម៉ែត្រ ចុងក្រោយ គឺប្រើថិរវេលា ១២.០៥ វិនាទីប៉ុណ្ណោះ និងទទួលបានជ័យលាភី ពីសាកលវិទ្យាល័យ Califonia StateUniversity, Northridge»។
លោក វ៉ាត់ ចំរើន បានថ្លែងថា៖«ខ្ញុំសូមលើកទឹកចិត្តខ្លាំង ចំពោះវត្តមានរបស់អត្តពលិកពូកែ ល្អៗមួយចំនួននៅក្រៅប្រទេស មានដើមកំណើតខ្មែរ ដែលស្ម័គ្រចិត្តចូលហ្វឹកហាត់ និងប្រកួតតំណាងឲ្យខ្មែរ ព្រោះនេះជាគោលនយោបាយកីឡា បើកទូលាយរបស់ព្រះរាជាណាចក្រកម្ពុជា ក្នុងគោលបំណង ធ្វើឲ្យវិស័យកីឡាយើង ទទួលបានការរីកចម្រើនទាន់ប្រទេសជឿនលឿន»។
លោក លឹម សុខន ដែលជាឪពុករបស់កីឡាការិនី Roth Sokunthea Sam ពេលលោកនាំកូនស្រី មកជួបលោក វ៉ាត់ ចំរើន។ រូបថត យឺន ពន្លក
លោកបានបន្ថែមថា៖«សម្រាប់អត្តពលិក ដែលនៅក្រៅប្រទេស មិនចាំបាច់មកប្រមូលផ្តុំនៅក្រុមជម្រើសជាតិក្នុងប្រទេសនោះទេ គឺអាចហ្វឹកហាត់នៅប្រទេស ដែលខ្លួនរស់នៅជាមួយគ្រូបង្វឹករបស់ខ្លួន ដោយគ្រាន់តែផ្ញើនូវសមត្ថភាព ឬកម្រិតបច្ចេកទេសមក គឺយើងទទួលបានសម្រាប់ជ្រើសរើសទៅចូលរួមប្រកួតថ្នាក់អន្តរជាតិនានាបាន»។
ជាមួយគ្នានេះ លោក វ៉ាត់ ចំរើន បានគាំទ្រ និងលើកទឹកចិត្តចំពោះវត្តមានរបស់កីឡាករិនី Roth Sokunthea Sam ដែលមានសមត្ថភាពល្អ អាចនឹងបណ្តុះបណ្តាលឲ្យល្អនិងឆ្នើមបាន ដើម្បីបានផ្តល់ជូននូវសម្លៀកបំពាក់កីឡា សម្រាប់កីឡាករិនី Roth Sokunthea ផងដែរ។
លោក ផៃ សុខ គ្រូបង្វឹកជម្រើសជាតិកីឡាអត្តពលកម្ម បានប្រាប់ថា៖«ក្មេងស្រី( Roth Sokunthea) អាយុប៉ុណ្ណឹង ហើយធ្វើបានក្នុងថិរវេលា ១២.០៥ វិនាទី ក្នុងចម្ងាយ១០០ ម៉ែត្រ គឺល្អណាស់ អាចនឹងបង្វឹកទៅ គឺធានាយកមេដាយ ក្នុងចំណាត់ថ្នាក់អាស៊ានចំនួន១១ប្រទេសបាន»។
លោកបន្ថែមថា នៅក្នុងកម្រិតអាស៊ានចុងក្រោយ នៅម៉ាឡេស៊ីកន្លងមក គឺចំណាត់ថ្នាក់មេដាយមាស លើការរត់ល្បឿន ១០០ ម៉ែត្រ មានថិរវេលា ១១.៣៥ វិនាទី ហើយមេដាយប្រាក់ ប្រើពេល ១១.៤០ វិនាទី។
លោក ផៃ សុខ បានបញ្ជាក់ថា៖ «ធនធានកីឡាការិនី Roth Sokunthea Sam នេះ អាចចាត់ទុកថា ល្អ និងធានាបានមេដាយ ក្នុងព្រឹត្តិការណ៍ស៊ីហ្គេម នៅខែតុលា ឆ្នាំ២០១៩នៅប្រទេសហ្វីលីពីន បើសិនខំហ្វឹកហាត់ពីឥឡូវនេះទៅ»។
ចំណែកលោក ម៉ក់ សំអុល ទីប្រឹក្សាជាន់ខ្ពស់របស់ NOCC ដែលបានទំនាក់ទំនងកីឡាករិនី Roth Sokunthea Sam មកពីប្រទេសអាមេរិក បានថ្លែងថា៖«Roth Sokunthea មានឪពុកម្តាយ មានដើមកំណើតខ្មែរ និងជាមិត្តភ័ត្ត្ររបស់ខ្ញុំ ប៉ុន្តែកីឡាការិនីរូបនេះ មានកំណើត និងកំពុងរស់នៅសហរដ្ឋអាមេរិក។ Roth Sokunthea ជាធនធានមានសមត្ថភាពល្អ ទើបខ្ញុំទាក់ទងឲ្យនាង បានមកស្រុកខ្មែរ ជួនគ្រូជំនាញកីឡា ធ្វើការពិនិត្យ»។
លោក លឹម សុខន ជាអ្នកនិពន្ធដឹកនាំសម្តែងភាពយន្ត ត្រូវជាឪពុកបង្កើតរបស់កីឡាការិនី Roth Sokunthea បានប្រាប់ថា៖«និស្ស័យរបស់កូនខ្ញុំ គឺស្រឡាញ់កីឡារត់ប្រណាំងនេះខ្លាំងណាស់ គឺតាំងពីក្មេងមកម្ល៉េះ»។
លោកបានបន្ថែមថា៖«ពីដំបូងខ្ញុំមិនសូវបានចាប់អារម្មណ៍ទេ ប៉ុន្តែក្រោយមកគាត់រត់បានចំណាត់ថ្នាក់ល្អ ត្រូវបានសកលវិទ្យាល័យ Califonia State University, Northridge បានហៅខ្ញុំ ជាអាណាព្យាបាលទៅចូលរួម ព្រមទាំងមានការកោតសរសើរ ចំពោះសមត្ថភាព ដែលគាត់ធ្វើបានល្អ។ ខ្ញុំពេញចិត្តខ្លាំងណាស់ និងចង់ឲ្យកូនស្រីរបស់ខ្ញុំ ចូលលេងកីឡារត់នេះតំណាងឲ្យប្រទេសកម្ពុជា»៕
