ភ្នំពេញ: កីឡាករឌុម កែវដា មកពីក្លិបមកុដរាជសីហ៍នៃក្រសួងមហាផ្ទៃ នឹងត្រូវដាក់ឲ្យប្រកួតជាមួយជើងខ្លាំងថៃ Den Phichhit ក្នុងទម្ងន់ ៦៣,៥ គីឡូក្រាម ខណៈជើងខ្លាំងទម្ងន់ធ្ងន់ ព្រំ សំណាង ត្រូវប៉ះជាមួយ Ali Qaradaghi មកពីអ៊ីរ៉ាក់ ក្នុងទម្ងន់ ៧៥ គីឡូក្រាម ក្នុងលក្ខណៈមិត្តភាពអន្តរជាតិនៅសង្វៀនប្រដាល់ខារ៉ាបាវ អាស៊ីអាគ្នេយ៍ នាថ្ងៃសៅរ៍ ទី ២០ ខែមករា ឆ្នាំ ២០១៨។
តាមរយៈការប្រកួតកន្លងមក ឌុម កែវដា និង Den Phichhit មានសមត្ថភាពប្រហាក់ប្រហែលគ្នា ប៉ុន្តែប្រវត្តិប្រកួតចុងក្រោយរបស់ពួកគេគឺចាញ់ពិន្ទុដៃគូទាំងប្រផិតប្រផើយដូចគ្នា ដោយ ឌុម កែវដា ចាញ់ Kong Sayam ហើយ Phichhit ចាញ់កីឡាករវ៉េង សុភ័ក្ត្រ។
ឌុម កែវដា ប្រកួតបានចំនួន ៨៧ លើក ឈ្នះ ៦៩ លើក ចាញ់ ១៥ លើក ស្មើ ៣ លើក ក្នុងនោះរយៈពេលជាង ៣ ឆ្នាំចុងក្រោយនេះ ប្រកួតជាមួយកីឡាករបរទេសជិត ៣០ លើក និងធ្លាប់ឈ្នះខ្សែវាត់ ២ ស្ថាប័ន ពោលគឺខ្សែក្រវាត់ខារ៉ាបាវ ១ និងខ្សែក្រវាត់គុនខ្មែរអន្តរជាតិ។
ចំណែកកីឡាករថៃ Den Phichhit ទោះបីធ្លាប់ចាញ់ក្រោមស្នាដៃ វ៉េង សុភ័ក្ត្រ ប៉ុន្តែកម្រិតវិជ្ជាគុនមិនធម្មតារបស់គេពិតជាខ្លាំង ដោយគេមានស្នៀតជង្គង់ និងកណ្តាប់ដៃល្អ ផងដែរ។
តាមការឲ្យដឹងពីគណៈកម្មការផ្គូផ្គង កីឡាករថៃ Den Phichhit មានប្រវត្តិប្រកួតបានចំនួន ៨៣ លើក ឈ្នះ ៦៨ លើក ចាញ់ ១៤ លើក ស្មើ ១ លើក។
លោកឈិន ក្វាន់ចៃ គ្រូបង្វឹកឌុម កែវដា បាននិយាយថា៖ «ការហ្វឹកហាត់របស់ឌុម កែវដា បានល្អ ហើយការជួបប្រកួតជាមួយកីឡាករថៃ Den Phichhit នេះមិនបារម្ភទេ ខ្ញុំមានទំនុកចិត្តឈ្នះ ៨០ ភាគរយ»។
ឌុម កែវដា បាននិយាយថា៖ «ការប្រកួតធានារបស់ខ្ញុំធានាវាយអស់ពីសមត្ថភាព ប៉ុន្តែរឿងចាញ់ ឬឈ្នះ មិនទាន់ហ៊ាននិយាយមុនប្រកួតទេ ពីព្រោះមិនធ្លាប់ប្រកួតគ្នា»។
លោកថៃ អ៊ូ ប្រតិភូនាំកីឡាករថៃមកប្រកួត បាននិយាយថា៖ «សមត្ថភាពរបស់កីឡាករថៃ Den Phichhit ល្អគួរសម ប៉ុន្តែ អាចចាញ់ប្រៀបស្នៀតកែងរបស់ឌុម កែវដា ហេតុនេះខ្ញុំមានសង្ឃឹមទទួលបានជ័យជម្នះតិចតួចណាស់»។
លោកថៃ អ៊ូ បានបញ្ជាក់ថា៖ «រឿងវាយគ្នាលើសង្វៀន យើងលំបាកទស្សន៍ទាយណាស់ ពោលគឺវាស៊ីសងពេលប្រកួតជាក់ស្តែង ហើយអ្វីដែលយើងសង្ឃឹមខ្ពស់ ក៏មិនប្រាកដកើតឡើងដែរ។ ទោះជាយ៉ាងណា ខ្ញុំសង្ឃឹមលើ Den Phichhit ឈ្នះតែ ៥០ ភាគរយ»។
សម្រាប់មតិលើកឡើងរបស់អ្នកនិយមទស្សនាប្រដាល់ជាប្រចាំភាគច្រើនលើសលុប គេមានជំនឿខ្ពស់ទៅលើកីឡាករឌុម កែវដា ជាអ្នកឈ្នះ។ ចំណែកកីឡាករព្រំ សំណាង ដែលវាយសឹងតែរកដៃគូប្រកួតមិនបាននោះ នឹងត្រូវប៉ះអ្នកចំណូលថ្មី Ali Qaradaghi ក្នុងទម្ងន់ ៧៥ គីឡូក្រាម មកពីប្រទេសអ៊ីរ៉ាក់។
អ្នកចំណូលថ្មី Qaradaghi ត្រូវបានគណៈកម្មការផ្គូផ្គងឲ្យដឹងថា មានប្រវត្តិប្រកួតបានតែ ២៨ លើកប៉ុណ្ណោះ ក្នុងនោះឈ្នះ ២៤ លើក ចាញ់តែ ៤ លើកទេ។ ព្រំ សំណាង មានប្រវត្តិប្រកួតបានចំនួន ៨៦ លើក ឈ្នះ ៧៤ លើក ចាញ់ ១០ លើក និងស្មើ ២ លើក ដែលច្រើនជាដៃគូដល់ទៅ ៥៨ លើកឯណោះ៕