The Phnom Penh Post Search

Search form




Logo of Phnom Penh Post newspaper Phnom Penh Post - កែវ​ រំចង់ ​ថា នឹង​វ៉ៃ​ដោយ​មិន​បន្ធូរ​ដៃ​ ខណៈ ​វង្ស ​ណយ​ មិន​ចង់​ឮ​ការ​ជេរ​




កែវ​ រំចង់ ​ថា នឹង​វ៉ៃ​ដោយ​មិន​បន្ធូរ​ដៃ​ ខណៈ ​វង្ស ​ណយ​ មិន​ចង់​ឮ​ការ​ជេរ​

Content image - Phnom Penh Post
វង្ស ណយ គេចចេញ​ពី​ការ​ម៉ាត់របស់ កែវ រំចង់ តែ​លើកនេះ​ពួកគេ​ប្រកួត​គ្នា ក្នុងទម្ងន់​៨៣គ.ក្រ។ រូប Sabay

កែវ​ រំចង់ ​ថា នឹង​វ៉ៃ​ដោយ​មិន​បន្ធូរ​ដៃ​ ខណៈ ​វង្ស ​ណយ​ មិន​ចង់​ឮ​ការ​ជេរ​

ភ្នំពេញ៖ ​កីឡករ​ជើង​ខ្លាំង​ចាស់​វស្សា កែវ រំចង់ និង វង្ស ណយ ដែល​សុទ្ធ​តែ​បាន​​ខកខាន​ប្រកួត​ និង​ឃ្លាត​ឆ្ងាយ​ពី​សង្វៀន​​ជិត ​១ ​ឆ្នាំ​ដូច​គ្នា​នោះ បាន​ណាត់​គ្នា​ឡើង​សង្វៀន​បាយ័ន​ស្ទឹងមានជ័យ នៅ​ល្ងាច​​ថ្ងៃ​អាទិត្យ​នេះ​ ហើយ​ការ​សម្រេច​ឡើង​សង្វៀន​ជា​ថ្មី​នេះ ត្រូវ​បាន​​អ្នក​ប្រដាល់​ឆ្នើម​ទាំង ​២ ​ ប្រាប់​ថា គឺ​ធ្វើ​​ទៅ​តាម​សំណូមពរ​បងប្អូន ​ដែល​ចង់​ឃើញ​ការ​ប្រកួត​រវាង​អ្នក​ទាំង ​២ ​​ឡើង​វិញ​។

យ៉ាង​ណា​ក៏​ដោយ កែវ រំចង់ និង វង្ស ណយ ដែល​​ធ្លាប់​អះអាង​ពី​ការ​​លាចាក​ពី​សង្វៀន​ប្រដាល់ ​ដោយ​ហេតុផល​ផ្សេងៗ​ពី​គ្នា​នោះ ​សុទ្ធ​តែ​បាន​​ឡើង​ទម្ងន់​ខ្ពស់​ ដោយ​​​ពួក​គេ​ត្រូវ​ប្រកួត​គ្នា​ក្នុង​ទម្ងន់ ​៨៣ ​គីឡូក្រាម ​ក្នុង​តម្លៃ​ខ្លួន​ពិសេស​មួយ ​ដែល​សុំ​មិន​ឱ្យ​បែក​ធ្លាយ​។ ​យ៉ាង​ណា​ក៏​ដោយ​កន្លង​មក​អ្នក​ទាំង ២ នេះ ​មិន​ព្រម​ចូល​ប្រកួត​ដោយសារ​បញ្ហា​តម្លៃ​ខ្លួន​នេះ​មួយ​ចំណែក​ផង​ដែរ ​ប៉ុន្តែ​ប្រភព​មួយ​ចំនួន​គួរ​ឱ្យ​ទុក​ចិត្ត​បាន​ខ្សឹប​ប្រាប់​ថា​ ​តម្លៃ​ខ្លួន​ប្រកួត​លើក​នេះ ​ប្រហែល​ស្មើ​នឹង​ប្រកួត​លក្ខណៈ​អន្តរជាតិ​មុនៗ​។​

កីឡាករ​​ វង្ស​ ណយ ​​បាន​​ប្រាប់​ថា​៖ «​ខ្ញុំ​ធ្លាប់​អះអាង​មែន​ថា ​លា​ចាក​ពី​សង្វៀន​ប្រដាល់​មក​លក់​ងៀត​ក្របី ដោយសារ​តែ​ពេល​ចាញ់​មាន​គេ​ជេរ​ ហើយ​កម្លាំង​ខ្ញុំ​ក៏​​ធ្លាក់​ចុះ​ ប៉ុន្តែ​ពេល​នេះ​មាន​បងប្អូន​ជា​ច្រើន​សំណូម​ពរ ​ពិសេស​កម្មវិធី​គេ​ហៅ​ឱ្យ​ប្រកួត​ អ៊ីចឹង​ខ្ញុំ​ក៏​សម្រេច​​ថា​ វិល​មក​វិញ​ទៅ​តាម​លទ្ធភាព​ ​ព្រោះ​អាច​ជួយ​ជីវភាព​បាន​ផង»​។​

សម្រាប់​ការ​បង្ហាញ​ខ្លួន​ជា​ថ្មី​នេះ វង្ស ណយ បាន​អះអាង​ថា នឹង​ប្រឹងប្រែង​ប្រកួត ដើម្បី​គេច​ឱ្យ​ផុត​ពី​ការ​ជេរ​នៅ​ពេល​ខ្លួន​ចាញ់។ វង្ស ណយ បញ្ជាក់​ថា៖​ «​ខ្ញុំ​នៅ​តែ​​​រក​ស៊ី​លក់​ងៀត​ក្របី​ដដែល​ ហើយ​ខំ​ហ្វឹកហាត់​បាន​មួយ​រយៈ​ ដើម្បី​មាន​សមត្ថភាព​ល្អ​ ឡើង​ប្រកួត​ឱ្យ​ល្អ​មើល​ និង​គេច​ចេញ​ពី​ការ​ជេរ​ប្រមាថ​ នៅ​ពេល​ខ្ញុំ​ចាញ់​ម្តងៗ​ ខណៈ​ការ​ប្រកួត​នេះ ​ខ្ញុំ​សង្ឃឹម​ឈ្នះ​ កែវ ​រំចង់ ​ត្រឹម ​៥០ ​ភាគរយ​ប៉ុណ្ណោះ​»។​

ចំណែក ​កែវ ​រំចង់ ​បាន​​ប្រាប់ ​ភ្នំពេញ ​ប៉ុស្តិ៍ កាល​ពី​ថ្ងៃ​ព្រហស្បតិ៍​ថា ​ការ​ឃ្លាត​ចាក​ពី​​សង្វៀន​ប្រដាល់​ជិត ​១ ឆ្នាំ​នេះ ដោយសារ​រូប​គេ​មិន​ចង់​ប្រកួត​ជាមួយ​ខ្មែរ​គ្នា​ឯង​ និង​ទាក់ទង​បញ្ហា​តម្លៃ​ខ្លួន​ផង​ដែរ គឺ​ចង់​ចាញ់ ​ឬ​ឈ្នះ ជាមួយ​កីឡាករ​បរទេស ​ហើយ​ក្រោយ​មាន​កូវីដ ​១៩​ កម្មវិធី​ប្រកួត​គ្មាន​អន្តរជាតិ​សោះ​។​

ជុំវិញ​ភាព​មន្ទិល​ដែល​ថា ការ​ឡើង​វ៉ៃ​ទម្ងន់​ធ្ងន់​ភាគ​ច្រើន ​​ប្រកួត​​លំៗ ​យក​តម្លៃ​ខ្លួន​នោះ កែវ​ រំ​ចង់ បាន​​បញ្ជាក់​​ថា​៖ «​ឆាក​ជីវិត​របស់​ខ្ញុំ​ នៅ​លើ​សង្វៀន​ប្រដាល់ បងប្អូន​បាន​ដឹង​ហើយ គឺ​​ឡើង​ទៅ​ ដឹង​តែ​វ៉ៃ​សម្រុក​ គ្មាន​ចេះ​បន្ធូរ​ដៃ​ឱ្យ​ដៃ​គូ​ទេ​ ហើយ​ភាព​ល្បីល្បាញ​របស់​ខ្ញុំ ​គឺ​វ៉ៃ​អស់​ពី​សមត្ថភាព​នេះ​ឯង​។​ យ៉ាង​ណា​ក៏​ដោយ វង្ស​ ណយ​ ជា​កីឡាករ​ជើង​ចាស់​ដូច​គ្នា ដោយ​គេ​ល្អ​កែង ​និង​​ជង្គង់​ដែរ ​ហេតុ​នេះ​វា​មិនមែន​ងាយ​ស្រួល​នោះ​ទេ ​ហេតុ​នេះ​ខ្ញុំ​សង្ឃឹម​ឈ្នះ ​៦០ ​ភាគរយ​ប៉ុណ្ណោះ​»។​

តាម​កំណត់ត្រា​ប្រកួត​​​កីឡាករ​​ជើង​ចាស់​ទាំង ​២ នាក់​នេះ គឺ​ធ្លាប់​ប្រកួត​គ្នា​ចំនួន ​៦ ​លើក ​ដោយ​ធ្លាប់​ឈ្នះ ​៣ ​លើក​ម្នាក់ ​ប៉ុន្តែ​កេរ្តិ៍ឈ្មោះ​ កែវ ​រំចង់ ​ល្បីល្បាញ​ជាង វង្ស ណយ។ យ៉ាង​ណា​ក៏​ដោយ វង្ស ​ណយ ​ជា​កីឡាករ​ដែល​ធ្វើ​ឱ្យ ​កែវ ​រំចង់ ​ចាញ់​ដោយ​ឈឺ​ចាប់​បំផុត​ចំនួន ​២ ​លើក​ កាល​ពី​នៅ​ទម្ងន់ ​៦៧​ និង ​៦៩ ​គីឡូក្រាម​ ព្រម​ទាំង​របូត​ខ្សែ​ក្រវាត់​ផង​ដែរ​។​

លោក​ កែវ ​សំអាង ជា​គ្រូបង្វឹក និង​ជា​ឪពុក កែវ រំចង់ បាន​ប្រាប់​ថា​៖ ​«ប្រកួត​លើក​នេះ​ ខ្ញុំ​មិន​បាន​បង្វឹក​ កែវ រំចង់ ផ្ទាល់​ដៃ​ទេ​ គឺ រំចង់ ​ហ្វឹកហាត់​ភាគ​ច្រើន​ផ្ទាល់​ខ្លួន ​ហេតុ​នេះ ​ខ្ញុំ​សង្ឃឹម​ឈ្នះ​មិន​ច្រើន​ទេ ​ដោយសារ​ខកខាន​ប្រកួត​យូរ​ផង​។ ​តែ​ទោះបី​ជា​​យ៉ាង​ណា​ រំចង់ ​ប្រកួត​មិន​ឱ្យ​មហាជន​ខក​ចិត្ត​នោះ​ទេ»​។

ចំណែក លោក ​រ័ត្ន ​សំអាត​ អ្នក​គ្រប់គ្រង​កីឡាករ វង្ស​ ណយ​ បាន​ប្រាប់​ថា៖ ​«​​វង្ស ណយ ​មក​ហាត់​បាន ​២ ​សប្តាហ៍​ ដោយសារ​ទទួល​ការ​ប្រកួត​ឡើង​វិញ​ ហើយ​​ខ្ញុំ​នៅ​តែ​គាំទ្រ​ជានិច្ច​​ ព្រោះ​កីឡាករ​​យើង​ស្ម័គ្រ​ចិត្ត​គ្មាន​បង្ខំ​ទេ ​អ៊ីចឹង​ពេល​ណា​សុខភាព​ល្អ​ ហាត់​បាន​ល្អ ​ចាប់​គូ​បាន​ឡើង​ប្រកួត​ទៅ​ គឺ​វាជា​រឿង​ធម្មតា​ទេ»​៕​

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ