ភ្នំពេញ៖ អ្នកប្រដាល់ទម្ងន់ធ្ងន់ ដែលមានប្រជាប្រិយខ្លាំងជាងគេ កែវ រំចង់ បានសម្រេចចិត្តរួចហើយក្នុងការចូលរួមប្រកួតជ្រើសរើសជើងឯកថ្នាក់ជាតិ ប្រចាំឆ្នាំ ២០១៩ ដែលជាការប្រកួតផ្លូវការក្រោមគម្រោងកញ្ចប់ថវិការបស់ក្រសួងអប់រំ យុវជន និងកីឡា ហើយនាយកដ្ឋានអប់រំកាយ និងកីឡា និងសហព័ន្ធកីឡាប្រដាល់គុនខ្មែរជាអង្គភាពអនុវត្តលើគម្រោងនេះ។
កែវ រំចង់ ដែលបានបង្ហាញវត្តមានប្រកួតភាគច្រើនតែក្នុងសង្វៀនបាយ័ននោះ ទំនងជាមានកិច្ចសន្យាផ្តាច់មុខជាថ្នូរទៅនឹងប្រាក់បន្ថែមក្រៅការប្រកួត ដែលភាសាក្នុងពិភពអ្នកមើលប្រដាល់ហៅថា «ចងជើង» មិនឲ្យទៅប្រកួតសង្វៀនដទៃ។ ទោះជាយ៉ាងណាសម្រាប់ការប្រកួតជម្រើសជើងឯកជាតិប្រចាំឆ្នាំ ដែលមានប្រាក់តម្លៃខ្លួនប្រកួត ឬប្រាក់រង្វាន់ឈ្នះជយលាភីតិចតួចនោះ គឺជាកាតព្វកិច្ចរបស់កីឡាករគ្រប់រូបចូលរួម។
ប៉ុន្តែរយៈពេលជាង ១០ ឆ្នាំកន្លងមកនេះ កីឡាករប្រដាល់ឆ្នើមៗល្បីៗមួយចំនួនធំ មិនចាប់អារម្មណ៍ចូលរួមប្រកួតឡើយ ដោយពួកគេភាគច្រើនបានប្រៀបធៀបការប្រកួតនេះ ទៅនឹងការប្រកួតនៅតាមសង្វៀនឯកជន តាមបែបផ្សព្វផ្សាយពាណិជ្ជកម្ម ដោយបាន ១ លើក មានពី ២៥០ ដល់ ១ ០០០ ដុល្លា ខណៈដែលប្រកួតជម្រុះថ្នាក់ជាតិ ១ ប្រកួត គឺអ្នកឈ្នះបានត្រឹម ៤ ម៉ឺនរៀល និងចាញ់ ៣ ម៉ឺនរៀលប៉ុណ្ណោះ។
ទាក់ទងទៅនឹងការប្រកួតជើងឯកថ្នាក់ជាតិឆ្នាំនេះ កែវ រំចង់ ដែលដំបូងឡើយ មានភាពស្ទាក់ស្ទើរ ក្នុងការចូលរួមនោះ បានប្រាប់ភ្នំពេញប៉ុស្តិ៍ថា៖ «ខ្ញុំសម្រេចចិត្តចូលរួមប្រកួតថ្នាក់ជាតិនេះ ដែលមានទម្ងន់ ៧១ គីឡូក្រាម។ តាមពិតការប្រកួតជាមួយកីឡាករខ្មែរគ្នាឯង គឺហាក់ដូចជាលំបាក ព្រោះក្នុងលំដាប់កីឡាករឆ្នើមទម្ងន់ធ្ងន់ដូចគ្នានេះ ភាគច្រើនបានក្លាយទៅជាមិត្តភក្តិ និងបានរាប់អានគ្នា ពិសេសពួកយើងធ្លាប់ចេញទៅប្រកួតនៅក្រៅប្រទេសជាមួយគ្នា ជួយឲ្យទឹកគ្នាទៅវិញទៅមកដូចបងប្អូនហើយ»។
រំចង់ បន្ថែមថា៖ «ទោះជាការប្រកួតទទួលបានតម្លៃខ្លួនតិចតួច ប៉ុន្តែខ្ញុំត្រូវបានថ្នាក់ដឹកនាំពន្យល់ថា នេះជាកាតព្វកិច្ចរបស់កីឡាករដែលត្រូវចូលរួមការប្រកួតជ្រើសរើសជើងឯក ក្រោមការគ្រប់គ្រងរបស់ក្រសួងអប់រំ យុវជន និងកីឡា សហការជាមួយសហព័ន្ធកីឡាប្រដាល់គុនខ្មែរ ព្រោះ ១ ឆ្នាំ មានតែម្តងទេ»។
កីឡាកររូបនេះ បានទទួលស្គាល់ថា៖ «ខ្ញុំពិតជាខកខានចូលរួមការប្រកួតថ្នាក់ជាតិនេះ អស់រយៈពេល ១២ ឆ្នាំមកហើយ ហើយខ្ញុំនៅចាំបានថា ធ្លាប់ចូលរួមប្រកួតបានម្តងកាលពីឆ្នាំ ២០០៧ ដោយខ្ញុំទទួលបានចំណាត់ថ្នាក់លេខ ១ ក្នុងទម្ងន់ ៦០ គីឡូក្រាម ដោយកាលនោះ ខ្ញុំបានយកឈ្នះ សេង រតនា មកពីខេត្តសៀមរាប នៅវគ្គផ្តាច់ព្រ័ត្រ»។
បច្ចុប្បន្ន កែវ រំចង់ ទទួលបានក្របខ័ណ្ឌជាប៉ូលិសតាមរយៈសមាគមប្រដាល់ក្រសួងមហាផ្ទៃ។ ប្រវត្តិស្ថិតិប្រកួតរបស់ កែវ រំចង់ គឺល្អផ្តាច់គេក្នុងចំណោមកីឡាករខ្មែរដូចគ្នាដោយឆ្លងកាត់ការប្រកួតបានចំនួន ១៦៤ ដង ចាញ់តែ ១២ និងស្មើ ៤ ដង ក្រៅពីនេះឈ្នះទាំងអស់។ រយៈពេលជាង ១០ ឆ្នាំមកនេះ កែវ រំចង់ ដណ្តើមបានខ្សែក្រវាត់ចំនួន ៤ គឺខ្សែក្រវាត់អាស៊ីអឺរ៉ុបនៅបារាំង ចំនួន ២ ព្រមទាំងខ្សែក្រវាត់ Khmer Fighter និងខ្សែក្រវាត់នៅសង្វៀនបាយ័ន។
យោងតាមសេចក្តីជូនដំណឹងរបស់សហព័ន្ធកីឡាប្រដាល់គុនខ្មែរ និងអគ្គនាយកដ្ឋានកីឡានឹងបើកការប្រកួតជើងឯកថ្នាក់ជាតិ នៅក្នុងពហុកីឡដ្ឋានជាតិ រយៈពេល ៥ ថ្ងៃប៉ុណ្ណោះ គឺចាប់ពីថ្ងៃទី ៧ ដល់ថ្ងៃទី ១១ ខែ តុលា ឆ្នាំ ២០១៩ ដោយកំណត់ឲ្យសមាគម ឬក្លិប ឬតំណាងមកពីខេត្ត-រាជធានី ជ្រើសរើសយកកីឡាករមកចូលរួមបានតែម្នាក់ ក្នុង ១ ប្រភេទទម្ងន់។ ជាមួយគ្នានេះ ទម្ងន់ ៧១ គីឡូក្រាម ស្របគ្នាជាមួយ កែវ រំចង់ នៅមិនទាន់ដឹងថា មានកីឡាករណាខ្លាំងហ៊ានដាក់ពាក្យចូលរួមប៉ះជាមួយ រំចង់ ឬក៏អត់ទេ។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរមានប្រសាសន៍ថា៖ «ខ្ញុំស្វាគមន៍ការចូលរួមប្រកួតរបស់កីឡាករឆ្នើមៗ ពិសេសដូចជា កែវ រំចង់។ ឥឡូវនេះយើងមិនទាន់ដឹងថា ទម្ងន់ ៧១ គីឡូក្រាមនេះ ប្រតិភូមកពីខេត្ត ឬសមាគមមួយចំនួន មានកីឡាករ ដែលមានសមត្ថភាពល្អ ប៉ះជាមួយ កែវ រំចង់ ឬអត់ គឺមិនទាន់ដឹងនៅឡើយ។ ទោះជាយ៉ាងណា កីឡាករស្ថិតក្នុងទម្ងន់ ៧១ គីឡូក្រាម មានមិនច្រើនដូចទម្ងន់ក្រោមនេះទេ»៕