The Phnom Penh Post Search

Search form

កែវ​ សុខផេង បញ្ចេញ​ប្រតិកម្ម ក្រោយ​ចាញ់​ក្រុម​វៀតណាម ៥-០

Content image - Phnom Penh Post
កែវ សុខផេង របស់​កម្ពុជា បាន​ស៊ុត​បាល់​កាត់​មុខ​កីឡាករ​វៀតណាម ក្នុងការ​ប្រកួត​ជើង​ទី ១។ ស្រេង ម៉េងស្រ៊ុន

កែវ​ សុខផេង បញ្ចេញ​ប្រតិកម្ម ក្រោយ​ចាញ់​ក្រុម​វៀតណាម ៥-០

ភ្នំពេញៈ ខ្សែប្រយុទ្ធ​ដ៏មាន​ប្រជាប្រិយ​មក​ពី​ក្លិប​ភ្នំពេញក្រោន កែវ សុខផេង បាន​បញ្ចេញ​ប្រតិកម្ម​ជាមួយ​សារ​ដ៏គួរ​ចាប់អារម្មណ៍​មួយ ដែល​ហាក់​បង្ហាញ​ឲ្យ​ឃើញ​ពីការ​មិន​ពេញចិត្ត​ទៅ​លើ​សមាជិក​មួយ​ចំនួន​ក្នុង​ក្រុម​ជម្រើសជាតិ​កម្ពុជា បន្ទាប់​ពី​ក្រុម​មួយ​នេះ បាន​បន្ត​ចាញ់​ក្រុម​ជម្រើសជាតិ​វៀតណាម រហូតដល់ ៥-០ ក្នុងការ​ប្រកួត​ជម្រុះ​ជើង​ទី ២ ប្រចាំ​ពូល C នៃ​ពានរង្វាន់ AFC Asian Cup 2019 នៅ​ទីក្រុង​ហាណូយ ប្រទេស​វៀតណាម កាល​ពី​យប់​ថ្ងៃ​អង្គារ។

អមដោយ​រូបថត​របស់​ខ្លួន​មួយ​សន្លឹក កែវ សុខផេង បាន​សរសេរ​បង្ហោះ​នៅ​លើ​ផេក​ហ្វេសប៊ុក​ផ្ទាល់​ខ្លួន បន្ទាប់​ពី​រូបគេ និង​ក្រុម​កម្ពុជា បាន​វិល​ត្រឡប់​មក​ដល់​ប្រទេស​កម្ពុជា​វិញ កាល​ពី​ថ្ងៃ​ពុធ ម្សិលមិញ​ថា៖ «លេង ១០ ឆ្នាំ​ទៀត ក៏​នៅ​តែ​មិន​ឈ្នះ​អាណា​ដែរ បើ​នៅ​តែ​ហួសចិត្ត​នៅ​ពេល​ដឹង អ្នកខំ​នៅ​តែខំ»។

ជាមួយ​សារ​បែប​បង្កប់ន័យ មួយ​ឃ្លា​នេះ ត្រូវ​បាន​គេ​ឃើញ​ពី​ភាព​អាក់អន់​ស្រពន់​ចិត្ត​របស់ កែវ សុខផេង ទៅ​លើ​មិត្ត​រួម​ក្រុម​មួយ​ចំនួន ក្នុង​ក្រុម​ជម្រើសជាតិ​កម្ពុជា ដែល​មិនសូវ​យកចិត្ត​ទុកដាក់​លេង ទើប​បង្កើត​ឲ្យ​មាន​ចន្លោះ​ប្រហោង នាំ​ឲ្យ​ក្រុម​កម្ពុជា ចាញ់​ក្រុម​ម្ចាស់ផ្ទះ​វៀតណាម ៥-០ បន្ថែម​ទៅ​លើ​ការ​ចាញ់ ២-១ ក្នុងការ​ប្រកួត​នៅ​លើ​ទឹកដី​ខ្លួនឯង កាល​ពីថ្ងៃ​ទី ៥ ខែ​កញ្ញា។ ប៉ុន្តែ​ដោយសារ​មាន​ប្រតិកម្ម​តប​ខ្លាំង​ជាមួយ​សារ​នេះ បាន​ធ្វើ​ឲ្យ កែវ សុខផេង សម្រេច​លប់​វា​ចោល​វិញ បន្ទាប់​ពី​រូបគេ​បង្ហោះ​បាន​ជាង ១ ម៉ោង។

សម្រាប់​ការប្រកួត​នៅ​កីឡដ្ឋាន My Dinh National Stadium ទីក្រុង​ហាណូយ ប្រទេស​វៀតណាម ក្រោម​តំណក់​ទឹកភ្លៀង កាល​ពី​យប់​ថ្ងៃ​អង្គារ​នោះ ក្រុម​ម្ចាស់ផ្ទះ​វៀតណាម បាន​ធ្វើការ​ដាក់​សម្ពាធ​ទៅ​លើ​ក្រុម​កម្ពុជា ជា​បន្តបន្ទាប់ ខណៈ​ការព្យាយាម​វាយបក​របស់​កម្ពុជា បាន​ជាប់គាំង​នៅ​ត្រឹម​តំបន់​ការពារ​របស់​ពួកគេ​នោះ។

បើទោះ​បី​ជា បញ្ហា​ទីលាន​មាន​ទឹក និង​មាន​ភ្លៀង ធ្វើ​ឲ្យ​ពួកគេ​រក​បាន​ត្រឹម ១ គ្រាប់ នៅ​ក្នុង​តង់​ទី ១ ដែល​រក​បាន​ដោយ​កីឡាករ Dinh Thanh Trung នៅ​នាទី​ទី ១៣ ប៉ុន្តែ​សម្រាប់​ការប្រកួត​នៅ​តង់ទី ២ ក្រុម​វៀតណាម បាន​ទម្លុះ​សំណាញ់​ទី​របស់​ក្រុម​កម្ពុជា បាន ៤ គ្រាប់​ទៀត ដែល​រក​បាន​ដោយ Nguyen Van Quyet នៅ​នាទី​ទី ៥៦ Nguyen Anh Duc នាទី​ទី ៦០ Nguyen Cong Phuong នាទី​ទី ៧៦ និង Mac Hong Quan នៅ​នាទី​ទី​បន្ថែម ៩០+២។

ចំណែក​ក្រុម​ហ្ស៊កដានី បាន​វាយ​បក​តាម​ស្មើ​ក្រុម​ម្ចាស់ផ្ទះ​អាហ្វហ្គានីស្ថាន ៣-៣ នៅ​នាទី​ទី ៨៦ កាល​ពី​ថ្ងៃ​អង្គារ​នោះ​ដែរ ដើម្បី​បន្ត​ឈរ​នៅ​លើ​កំពូល​ប្រចាំ​ពូល C នេះ បើ​ទោះបី​ជា​ពួកគេ​មាន ៨ ពិន្ទុ ស្មើ​ក្រុម​វៀតណាម ក៏ដោយ ព្រោះ​ហ្ស៊កដានី មាន​គ្រាប់បាល់​ចំណេញ​ច្រើន​ជាង​វៀតណាម ចំនួន ៤ គ្រាប់។ រីឯ​ក្រុម​កម្ពុជា បន្ត​ឈរ​នៅ​លេខ​រៀង​ទី ៣ ដោយ​មាន ៣ ពិន្ទុ ខណៈ​ក្រុម​អាហ្វហ្គានីស្ថាន មាន២ ពិន្ទុ។

ការចាញ់​ក្រុម​វៀតណាម ៥-០ នៅ​ក្រៅ​ទឹកដី​នេះ ក៏​បាន​ធ្វើ​ឲ្យ​គ្រូបង្វឹក​ក្រុម​លីក​កំពូល​កម្ពុជា មួយ​ចំនួន រិះគន់​ទៅ​ដល់ការ​ដឹកនាំ​របស់​គ្រូបង្គោល​លោក Leonardo Vitorino ផងដែរ ព្រោះ​ក្រោមការ​ដឹកនាំ​របស់​គ្រូបង្វឹក​រូបនេះ ក្រុម​កម្ពុជា បាន​ចាញ់​ជាប់ៗគ្នា ក្នុងការ​ប្រកួត​ផ្លូវការ។

យ៉ាងណា​ក៏ដោយ លោក Leonardo បាន​និយាយ​ក្នុង​សន្និសីទ​កាសែត ក្រោយ​ការប្រកួត​ថា៖ «ខ្ញុំ​ទទួល​ស្គាល់​ពីភាព​ខុសគ្នា​រវាង​កម្រិត​បាល់ទាត់​នៃ​ប្រទេស​ទាំងពីរ ហើយ បន្ទាប់​ពីការ​ប្រកួត​នេះ​ខ្ញុំ​នឹង​និយាយ​ទៅ​កាន់​កីឡាករ​របស់​ខ្ញុំ​ពី​ភាព​ខ្សោយ​ផ្នែក​កាយសម្បទា និង​សហព័ន្ធ លើការ​ហ្វឹកហាត់​កីឡាករ និង​គុណភាព​លីក​ម្តង​ទៀត»៕

អត្ថបទគួរចាប់អារម្មណ៍

  • សណ្ឋាគារ​ប្រណីត​នៅ​កោះរ៉ុង បើក​ជា​ផ្លូវការ

    ភ្នំពេញៈ សណ្ឋាគារ​ដ៏ប្រណីត Royal Sands នៅលើ​កោះរ៉ុង​របស់​លោក គិត ម៉េង បាន​បើក​ដំណើរការ​ជា​ផ្លូវការ​កាលពី​ថ្ងៃ​ម្សិលមិញ ដែល​គេ​រំពឹង​ថា​នឹង​ទាក់ទាញ​ភ្ញៀវទេសចរ​កាន់តែ​ច្រើន​។

  • ដំរី​ដែល​ចូល​ចម្ការ​អ្នក​ភូមិ​បាន​គេច​ទៅ​ភ្នំ​ដងរែក

    ឧត្តរមានជ័យៈ ក្រុម​មន្ត្រី​បាន​និយាយ​ថា​សត្វ​ដំរី​ញី​មួយ​ក្បាល​ដែល​បាន​ចូល​លុកលុយ​ក្នុង​ចម្ការ​អ្នកភូមិ​រំដួល​ចាស់ ឃុំ​អម្ពិល ស្រុក​បន្ទាយ​អម្ពិល ខេត្ត​ឧត្តរមានជ័យ​កាលពី​ព្រឹក​ថ្ងៃ​អាទិត្យ​នោះ​បាន​គេច​ខ្លួន​ចូល​ទៅ​ក្នុង​តំបន់​ជួរ​ភ្នំ​ដងរែក​វិញ​ហើយ ខណៈ​ដែល​ក្រុម​មន្ត្រី​ជំនាញ​បរិស្ថាន និង​អាជ្ញាធរ​កំពុង​បន្ត​ឃ្លាំ​មើល​ពី​ដំណើរ​របស់​វា​។

  • ព្រះមហាក្សត្រ​អំពាវនាវ​ឲ្យ​ធានា​ការពារ​យុត្តិធម៌​ និង គោរព​សិទ្ធិ​មនុស្ស

    ភ្នំពេញៈ ក្រោយពី​ឈ្នះ​អាសនៈ​ទាំង​ ៥៨ ដោយ​មិន​មាន​អតីត​បក្ស​សង្គ្រោះ​ជាតិ​ដែល​ជា​គូប្រកួត​ដ៏ស័ក្តិសម​នឹង​គ្នា​សម្រាប់​ការបោះឆ្នោត​ព្រឹទ្ធសភា​ពី​ខែ​កុម្ភៈ គណបក្ស​កាន់​អំណាច​ដែល​ទទួល​ជ័យជម្នះ​បាន​បន្ត​គ្រប់គ្រង​ស្ថាប័ន​នីតិប្បញ្ញត្តិ​ជាថ្មី​ដោយ​បើក​សម័យប្រជុំ​លើក​ដំបូង នីតិកាល​ទី​ ៤ ​នៃ​ព្រឹទ្ធសភា​ពី​ម្សិលមិញ​ក្រោម​ព្រះរាជាធិបតីភាព​ព្រះមហាក្សត្រ​ព្រះបាទ​សម្តេច​ព្រះនរោត្តម សីហមុនី ដែល​ព្រះអង្គ​អំពាវនាវ​ឲ្យ​មាន​ការធានា​ការពារ​យុត្តិធម៌ និង​គោរព​សិទ្ធិ​មនុស្ស និង​រួម​សាមគ្គី​គ្នា​ជា​ធ្លុង​មួយ​។

  • នាយក​រដ្ឋមន្ត្រី​បញ្ជា​ឲ្យ​ដកហូត​កោះ​ ៣០ ​មក​វិញ និង​ឲ្យ​ពិនិត្យ​អ្នក​នៅ​ពី​ក្រោយ​ការទន្ទ្រាន​យក​ដី

    ព្រះសីហនុៈ លោក​នាយករដ្ឋមន្ត្រី ហ៊ុន សែន បាន​បញ្ជា​ឲ្យ​ដកហូត​កោះ​ដែល​មិន​បាន​អភិវឌ្ឍ​ប្រមាណ​ ៣០ ​មក​វិញ​ ខណៈ​អត្តសញ្ញាណ​របស់​ម្ចាស់​ក្បាល​ដី​ចំនួន​ ៥៨៤ ​ដែល​មាន​ទាំង​មន្ត្រី​មាន​អំណាច​កំពុង​ត្រូវបាន​ពិនិត្យ​រឿង​នៅ​ពី​ក្រោយ​ខ្នង​ការកាប់​ទន្ទ្រាន​យក​ដី​ដ៏ក្តៅគគុក​នៅ​កោះរ៉ុង ហើយ​មន្ត្រី​ជាន់ខ្ពស់​ខ្លះ​នឹង​មិន​ត្រូវ​ឲ្យ​ចូលរួម​បង្កើត​រដ្ឋាភិបាល​ថ្មី​នៅ​​អាណត្តិ​ក្រោយ​ឡើយ​។