.jpg)
បេក្ខភាពត្រូវប្រកួតដណ្តើមប្រាក់លាន នៅសប្តាហ៍នេះ។ រូប សហការី
ភ្នំពេញ៖ កីឡាករ វ៉ាន់ វឿន, អេ ណារ័ត្ន, ខេម ចាន់ និង អ៊ូច ធារិទ្ធ ដែលគេស្គាល់ថា ជាជើងខ្លាំងក្នុងប្រភេទទម្ងន់ ៥៧ គីឡូក្រាម មានឈ្មោះល្បី ហើយធ្លាប់ឈ្នះពាន និងខ្សែក្រវាត់យកមកគ្រប់គ្រងដូចគ្នានោះ គឺហាក់មានការញញើតគ្នានៅពេលអ្នកទាំង ៤ ត្រូវបានដាក់ឱ្យប្រកួតម៉ារ៉ាតុងដណ្តើមប្រាក់លាននៅសង្វៀនថោន នាយប់ថ្ងៃអាទិត្យ ចុងសប្តាហ៍នេះ។
ម្ចាស់មេដាយសំរឹទ្ធស៊ីហ្គេម វ៉ាន់ វឿន ដែលជាកីឡាករមានចិត្តធំ និងមានរបៀបប្រកួតវ៉ៃសម្រុកខ្លាំង ហើយធ្លាប់ឈ្នះខ្សែក្រវាត់ជាច្រើននោះ បាននិយាយថា៖ «សម្រាប់កីឡាករទាំង ៣ នាក់នេះ ខ្ញុំធ្លាប់ប្រកួតជាមួយគ្នា និងដឹងពីសមត្ថភាបគ្នា ប៉ុន្តែមិនអាចនិយាយថា សង្ឃឹមឈ្នះច្រើនបានទេ គឺអាស្រ័យលើពេលប្រកួត តើគួរចេញអាវុធ ឬក្បាច់អ្វីផ្ទាល់នៅលើសង្វៀន។ មួយវិញទៀត ការឈ្នះ ឬចាញ់ជាមួយគ្នាកន្លងមក គឺពិតជាមានលក្ខណៈតឹងតែងស្វិតស្វាញណាស់»។
វ៉ាន់ វឿន បន្ថែមថា៖ «ចំពោះ អេ ណារ័ត្ន ខ្ញុំធ្លាប់ជួប ៣ លើក និងឈ្នះទាំង ៣ លើក រីឯ ខេម ចាន់ ជួបគ្នា ៤ លើក ខ្ញុំឈ្នះ ៣ និងចាញ់ ១ លើក ចំណែក អ៊ូច ធារិទ្ធ ខ្ញុំធ្លាប់ជួបប្រកួតម្តងចាញ់គាត់ ហេតុនេះខ្ញុំសង្ឃឹមឈ្នះត្រឹម ៥០ ភាគរយប៉ុណ្ណោះ គឺចាំមើលស្ថានភាពប្រកួតជាក់ស្តែងថា តើយើងអាចលេងយុទ្ធសាស្ត្រណា ហើយអ្នកទាំង ៣ នេះ សុទ្ធតែលំបាកឈ្នះដូចគ្នា»។
ចំណែកកីឡាករ ខេម ចាន់ ក្លិបបញ្ជាការដ្ឋានទ័ពពិសេស ធ្លាប់ល្បីល្បាញជា កីឡាករប្រកួតចាញ់តិចបំផុត ដោយធ្លាប់ឈ្នះ មេដាយ សំរឹទ្ធ នៅស៊ីហ្គេម និងធ្លាប់គ្រងតំណែងជើងឯកជាតិចំនួន ៣ ឆ្នាំជាប់ៗគ្នា ប៉ុន្តែក្នុងប្រកួតជ្រើសរើសជើងឯកជាតិ កាលពីពេលថ្មីៗនេះ ចាន់ បានចាញ់កីឡាករ កាន់ ម៉េងហុង នៅវគ្គផ្តាច់ព្រ័ត្រ ដោយបោះបង់ការប្រកួត ព្រោះឈឺជើង ហើយ ខេម ចាន់ ក៏ទើបចាញ់ វ៉ាន់ វឿន ក្នុងទឹកទី៣ នៅលើសង្វៀន CNC កាលសប្តាហ៍មុនផងដែរ។
សម្រាប់ការប្រកួតលើកនេះ ខេម ចាន់ បានប្រាប់ថា៖ «ខ្ញុំមិនហ៊ានសង្ឃឹមឈ្នះច្រើនទេព្រោះពួកគេ ពិតជាលំបាកប្រកួតណាស់ ដោយបទពិសោធល្អដូចគ្នា។ ចំពោះ អេ ណារ័ត្ន និង អ៊ូច ធារិទ្ធ ខ្ញុំមិនសូវបារម្ភទេ ប៉ុន្តែ វ៉ាន់ វឿន ពិតជាលំបាកឈ្នះ ដោយសារគាត់មានក្បាច់គេចរហ័ស និងវាយបកលឿន ហេតុនេះ ខ្ញុំសង្ឃឹមឈ្នះបានប្រាក់រង្វាន់នេះត្រឹម ៥០ ភាគរយប៉ុណ្ណោះ»។
ចំណែក អ៊ូច ធារិទ្ធ មានបទពិសោធប្រហាក់ប្រហែល វ៉ាន់ វឿន ប៉ុន្តែធ្លាប់ឈ្នះ វឿន ដោយពិន្ទុ ក្នុងវគ្គផ្តាច់ព្រ័ត្រប្រាក់រង្វាន់នៅសង្វៀនថោននេះ ហើយគេធ្លាប់ឈ្នះជើងឯកប្រដាល់សកលថ្នាក់ជាតិ ៣ ឆ្នាំមកហើយ។ ធារិទ្ធ និយាយថា៖ «ក្នុងចំណោមអ្នកទាំង ៣ នេះ វ៉ាន់ វឿន ខ្ញុំធ្លាប់ឈ្នះមែន ប៉ុន្តែពិតជាលំបាកប្រកួតណាស់ ហើយការប្រកួតលើកនេះ ខ្ញុំមិនហ៊ានគិតថា ឈ្នះច្រើនទេ គឺរំពឹងត្រឹម ៥០ ភាគរយ»។
ដោយឡែក អេ ណារ័ត្ន មិនអាចទាក់ទងបានទេ ប៉ុន្តែតាមរយៈគណៈកម្មការផ្គូផ្គង លោក ជួប វុត្ថា ដែលជួបសម្ភាស អេ ណារ័ត្ន ក្នុងពេលផ្គូផ្គង បានអះអាងថា៖ «អេ ណារ័ត្ន មិនខ្លាចញញើតទេ គឺគេឡើងប្រកួតដឹងតែវ៉ៃ និងហ៊ានតតាំងចំពោះជើងខ្លាំងទាំង ៣ នាក់នេះ ប៉ុន្តែឈ្នះ ឬចាញ់ មិនទាន់ហ៊ានកំណត់មុនបានឡើយ ព្រោះតាមរយៈបទពិសោធ អេ ណារ័ត្ន នៅខ្ចីវស្សាជាងគេ»៕
