ភ្នំពេញៈ កីឡាការិនីស្នូកឃ័រ និងប៊ីយ៉ាជម្រើសជាតិកម្ពុជា ស្រួង ភាវី ដែលកំពុងស្នាក់នៅប្រទេសកូរ៉េខាងត្បូងត្រូវបានក្រសួងកិច្ចការនារីនៃសាធារណរដ្ឋកូរ៉េផ្តល់ងារជាបេក្ខនារីឆ្នើមក្នុងគណៈកម្មាធិការពហុវប្បធម៌ និងកីឡា ប្រចាំកូរ៉េខាងត្បូង ហើយនៅក្នុងខែកក្កដានេះដែរ ភាវី នឹងនាំសប្បុរសជនមកពីកូរ៉េ ដើម្បីចែកសៀវភៅ និងសម្ភារសិក្សាដល់ក្មេងទីទាល់ក្រ ខ្វះទីពឹងនៅខេត្តមួយចំនួនក្នុងប្រទេសកម្ពុជា។
លោក ជា វ៉ាន់សាន្ត សិស្សកីឡាហាប់គីដូ កំពុងបំពេញការងារនៅកូរ៉េ ដែលជាមិត្តស្និទ្ធស្នាលរបស់ ស្រួង ភាវី បានប្រាប់តាមទូរស័ព្ទកាលពីថ្ងៃអង្គារថា៖ «នៅក្នុងពិធីតែងតាំងនោះរដ្ឋមន្ត្រីក្រសួងកិច្ចការនារីបានសម្រេចតែងតាំង ស្រួង ភាវី ជាប្រធានគណៈកម្មាធិការពហុវប្បធម៌ និងកីឡាគឺជាជនឆ្នើមទី ១ ប្រចាំសាធារណរដ្ឋកូរ៉េខាងត្បូង ខណៈប្រិយភាពរបស់គាត់ល្បីល្បាញខ្លាំង តាមរយៈការលេងកីឡាស្នូកឃ័រនេះឯង ហើយក្រុមហ៊ុនពាណិជ្ជកម្មធំៗនៅកូរ៉េ គេនិយមគាំទ្រ ស្រួង ភាវី ខ្លាំងណាស់ក្នុងនោះដែរសប្បុរសជនមួយចំនួនទៀត គេជួយឧបត្ថម្ភតាមរយៈ ស្រួង ភារី នេះតែម្តង ដើម្បីការងារមនុស្សធម៌»។
ចំណែកឯ ស្រួង ភាវី បានប្រាប់តាមហ្វេសប៊ុកកាលពីម្សិលមិញថា៖ «ខ្ញុំគឺជាស្ត្រីខ្មែរដំបូងគេ តំណាងឲ្យកម្ពុជាយើងដែលបានទទួលតំណែងមួយនេះ។ នៅស្រុកកូរ៉េនេះនៅពេលដែលយើងល្បីគឺមានការគាំទ្រសព្វបែបយ៉ាង ក្នុងនោះសូម្បីតែក្លិប ឬសមាគមកីឡាស្នូកឃ័រល្បីៗមួយចំនួនក៏សុំយើងថត ដើម្បីតាំងរូបប្រចាំក្លិបរបស់គេដែរ។ បន្ថែមលើសនេះមានក្រុមហ៊ុនល្បីៗមួយចំនួនទាក់ទងជួយឧបត្ថម្ភគាំទ្រ និងចុះកិច្ចសន្យាជាមួយខ្ញុំក្នុងការផ្សាយពាណិជ្ជកម្មបានញឹកញាប់ផងដែរ»។
ជាមួយគ្នានេះ ស្រួង ភាវី ដែលជាសមាជិកប្រតិបត្តិសហព័ន្ធកីឡាស្នូកឃ័រ និងប៊ីយ៉ាកម្ពុជាផងនោះបានសន្យាផ្តល់ប្រាក់មួយចំនួនធំ ដើម្បីជួយលើកស្ទួយសហព័ន្ធនេះឲ្យមានការរីកចម្រើនដោយផ្តោតទៅលើបង្វឹកអត្តពលិកក្មេងៗ និងផ្តល់ជូនដល់ក្មេងៗដែលក្រីក្រ។
ស្រួង ភាវី បានបន្ថែមថា៖ «នាងខ្ញុំពិតជារំភើបចិត្តឥតឧបមាគឺរកអ្វីមកប្រៀបផ្ទឹមមិនបាន ហើយខ្ញុំពិតជាអរគុណខ្លាំងណាស់ដល់បងប្អូនរួមជាតិខ្មែរយើងដែលនៅតែជួយគាំទ្រ លើកស្ទួយធ្វើឲ្យនាងខ្ញុំមានកម្លាំងចិត្តហ្វឹកហាត់បន្ត និងប្រកួតបានលទ្ធផលល្អ។ ជាមួយគ្នានេះខ្ញុំជាស្ត្រីខ្មែរដែលមានឱកាសធ្វើកិច្ចការល្អៗតាមជំនាញ ពិសេសដើម្បីបង្ហាញនូវវប្បធម៌អត្តសញ្ញាណជាតិយើង មិនប្តូរសញ្ជាតិ ដើម្បីប្រាប់ទៅកាន់ពិភពលោកអំពីខ្មែរគឺនៅតែមានសមត្ថភាពខ្លាំងដូចគេដែរ»។
កីឡាការិនី ស្រួង ភាវី ធ្លាប់ដណ្ដើមបានមេដាយ និងសាងកេរ្តិ៍ឈ្មោះល្បីល្បាញនៅកូរ៉េសឹងរាប់ភ្លេច ពិសេសថ្មីៗនេះនាងបានទទួលជ័យជម្នះម្តងទៀតក្នុងការប្រកួតជម្រើសជើងឯកជាតិនៅកូរ៉េ។ នៅសប្តាហ៍ទី ២ ក្នុងខែកកដ្កានេះ ស្រួង ភាវី នឹងនាំសប្បុរសជននៅប្រទេសកូរ៉េមកជួយក្មេងក្រីក្រមួយចំនួនទៅតាមកម្លាំងសទ្ធាដែលក្នុងនោះគ្រោងទៅខេត្តនៅជនបទមានកំពង់ចាម កំពង់ធំ កំពត និងបាត់ដំបង។
ស្រួង ភាវី និយាយថា៖ «គម្រោងផ្តល់ជូននឹងមានសម្ភារសិក្សារបស់ក្មេងៗ និងមានគោលបំណងស្វែងរកពិនិត្យមើលទីតាំងសម្រាប់បើកក្លិបស្នូកឃ័រ ដើម្បីបណ្តុះបណ្តាលក្មេងៗមួយចំនួនដែលគ្មានទីពឹង និងមានឧបនិស្ស័យផ្នែកកីឡាប្រភេទនេះ៕